ସ୍ପଷ୍ଟ କଲା ଫକ୍ସକନ୍, ଭାରତରେ ନିବେଶ ପାଇଁ ‘ନିର୍ଦ୍ଦିଷ୍ଟ ଚୁକ୍ତି’ ହୋଇନାହିଁ

ନୂଆଦିଲ୍ଲୀ: ତାଇୱାନର ଟେକ୍ ଜିଆଣ୍ଟ ଫକ୍ସକନ୍ ଶନିବାର ସ୍ପଷ୍ଟ କରିଛି ଯେ, ଭାରତରେ କମ୍ପାନୀ କୌଣସି ନୂଆ ପୁଞ୍ଜି ନିବେଶ ପାଇଁ ଚୁକ୍ତି କରିନାହିଁ। ଭାରତର ତେଲେଙ୍ଗାନା ଏବଂ କର୍ଣ୍ଣାଟକରେ ଫକ୍ସକନ୍ ବିପୁଳ ନିବେଶ କରୁଥିବା ଖବର ଗତକାଲି ପ୍ରକାଶ ପାଇବା ପରେ କମ୍ପାନୀ ଏହି ପ୍ରତିକ୍ରିୟା ଦେଇଛି। ଫକ୍ସକନ୍ କହିଛି ଚେୟାରମ୍ୟାନ୍ ଭାରତ ଗସ୍ତ କରିଛନ୍ତି, କିନ୍ତୁ ଦେଶରେ ନୂତନ ପୁଞ୍ଜି ବିନିଯୋଗ ଯୋଜନା କରୁଥିବା ଖବର ପ୍ରକାଶ ପାଇବା ପରେ ଏହା କୌଣସି ବାଧ୍ୟତାମୂଳକ, ଚୁକ୍ତି କରି ନାହିଁ।

ମୂଲନାମ ‘ହନ୍ ହାଇ ପ୍ରାଇସିସନ୍ ଇଣ୍ଡଷ୍ଟ୍ରି’ ଦ୍ୱାରା ଜଣାଶୁଣା, ଫକ୍ସକନ୍ ହେଉଛି ବିଶ୍ୱର ସବୁଠୁ ବଡ ଇଲେକ୍ଟ୍ରୋନିକ୍ସ ଉତ୍ପାଦକ ଏବଂ ଆପଲ୍ ଆଇଫୋନର ଏକ ମୁଖ୍ୟ ଯୋଗାଣକାରୀ। ଗତ ବର୍ଷ କଠୋର କୋଭିଡ ନୀତି ଏବଂ ଆମେରିକା ସହିତ ଚାଲିଥିବା କୂଟନୈତିକ ତିକ୍ତତା ଉତ୍ପାଦନକୁ କ୍ଷତି ପହଞ୍ଚାଇବା ପରେ ଉଭୟ କମ୍ପାନୀ ଚୀନ୍ ଠାରୁ ବିବିଧ ହେବାକୁ ଚେଷ୍ଟା କରୁଛନ୍ତି, ଯେଉଁଠାରେ ସେମାନଙ୍କର ଅଧିକାଂଶ ଉତ୍ପାଦନ ହେଉଛି ।

ଫକ୍ସକନ୍ ଶନିବାର ଏକ ବିବୃତ୍ତିରେ କହିଛନ୍ତି ଯେ ଫେବୃଆରୀ ୨୭ ରୁ ମାର୍ଚ୍ଚ ୪ ପର୍ଯ୍ୟନ୍ତ ଚେୟାରମ୍ୟାନ୍ ତଥା ସିଇଓ ୟଙ୍ଗ ଲିୟୁଙ୍କ ଭାରତ ଗସ୍ତ ସମୟରେ କୌଣସି ଚୁକ୍ତି ହୋଇନାହିଁ। ଏହାର ବିବୃତ୍ତିରେ ସ୍ପଷ୍ଟ ଭାବେ କହିଛି ଯେ ଏହି ଯାତ୍ରା ସମୟରେ ନୂତନ ପୁଞ୍ଜି ବିନିଯୋଗ ପାଇଁ ଫକ୍ସକନ୍ ବାଧ୍ୟତାମୂଳକ, ନିର୍ଦ୍ଦିଷ୍ଟ ଚୁକ୍ତିନାମା କରି ନାହିଁ। ତେବେ ନିବେଶ ନେଇ ‘ଆଲୋଚନା ଏବଂ ଆଭ୍ୟନ୍ତରୀଣ ସମୀକ୍ଷା ଚାଲିଛି। ଗଣମାଧ୍ୟମରେ ଆଲୋଚନା ହୋଇଥିବା ଆର୍ଥିକ ବିନିଯୋଗ ରାଶି ଫକ୍ସକନ୍ ଦ୍ୱାରା ପ୍ରକାଶିତ ସୂଚନା ନୁହେଁ ।’

ତେବେ କର୍ଣ୍ଣାଟକ ମୁଖ୍ୟମନ୍ତ୍ରୀ ବାସଭାରାଜ ଏସ ବମ୍ମାଇ ଶୁକ୍ରବାର ଦିନ ଟୁଇଟ୍ କରି କହିଥିଲେ ଯେ ଆପଲ୍ ଖୁବ ଶୀଘ୍ର ରାଜ୍ୟର ଏକ ନୂତନ ଫ୍ୟାକ୍ଟ୍ରୀରେ ଆଇଫୋନ୍ ଉତ୍ପାଦନ କରିବ ଏବଂ ପ୍ରାୟ ୧୦୦,୦୦୦ ନିଯୁକ୍ତି ସୃଷ୍ଟି କରିବ । ସେହିଭଳି ବ୍ଲୁମବର୍ଗ ନ୍ୟୁଜ୍ ରିପୋର୍ଟ କରିଛି ଯେ ଫକ୍ସକନ୍ କର୍ଣ୍ଣାଟକର ଏକ ନୂତନ କାରଖାନାରେ ୭୦୦ ମିଲିୟନ୍ ଡଲାର୍ ବିନିଯୋଗ କରିବାକୁ ଯୋଜନା କରିଛି ।

ସେହିପରି ପଡୋଶୀ ତେଲେଙ୍ଗାନା ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓଙ୍କ କାର୍ଯ୍ୟାଳୟ ମଧ୍ୟ ଟ୍ୱିଟ୍ କରି କହିଥିଲା ଯେ ଇଲେକ୍ଟ୍ରୋନିକ୍ସ ଉତ୍ପାଦନ ସୁବିଧା ପ୍ରତିଷ୍ଠା ପାଇଁ ଲିୟୁ ଗୁରୁବାର ଦିନ ଏକ ଚୁକ୍ତିନାମା କରିଛନ୍ତି। କିନ୍ତୁ ଫକ୍ସକନ୍ କହିଛି ଯେ ବର୍ତ୍ତମାନ ରିପୋର୍ଟ ହୋଇଥିବା ନିଯୁକ୍ତି ସଂଖ୍ୟା କମ୍ପାନୀ ସହିତ ‘ପ୍ରତ୍ୟକ୍ଷ ଚାକିରି ସହ ସମାନ ନୁହେଁ।’

ତେବେ ଲିୟୁ ବିବୃତ୍ତିରେ କହିଛନ୍ତି ଯେ ‘ଭାରତ ସହିତ ଫକ୍ସକନ୍‌ର ସହଭାଗିତାକୁ ଆହୁରି ଗଭୀର କରିବା ପାଇଁ ଏହି ସପ୍ତାହରେ ମୋର ଯାତ୍ରା ଥିଲା … ଏବଂ ସେମିକଣ୍ଡକ୍ଟର ବିକାଶ ଏବଂ ବୈଦ୍ୟୁତିକ ଯାନ ଭଳି ନୂତନ କ୍ଷେତ୍ରରେ ସହଯୋଗ ଲୋଡିଛି।’