”ଗଣତନ୍ତ୍ର ସୁରକ୍ଷାକାରୀଙ୍କ ଉପରେ କବଜା କରିଛି ବିଜେପି, ସେଥିପାଇଁ ‘ଭାରତ ଯୋଡା ଯାତ୍ରା’ କରିବାକୁ ପଡିଲା”: ରାହୁଲ ଗାନ୍ଧୀ
ନୂଆଦିଲ୍ଲୀ: ବିଦେଶରେ ଭାରତକୁ ବଦନାମ କରିବା ଅଭିଯୋଗରେ କଂଗ୍ରେସ ନେତା ରାହୁଲ ଗାନ୍ଧୀ ବିଜେପିକୁ ଟାର୍ଗେଟ୍ କରିଛନ୍ତି। ଦେଶରେ ଗଣତନ୍ତ୍ରର ସୁରକ୍ଷା ତଥା ଅଭିବ୍ୟକ୍ତିର ସ୍ୱାଧୀନତା ପ୍ରଦାନ କରୁଥିବା ସମସ୍ତ ଅନୁଷ୍ଠାନ ବିଜେପିଙ୍କ ଅଧୀନରେ ଥିବାରୁ କନ୍ୟାକୁମାରରୁ କାଶ୍ମୀର ପର୍ଯ୍ୟନ୍ତ ପ୍ରାୟ ୪,୦୦୦ କିଲୋମିଟର ଲମ୍ବା ‘ଭାରତ ଯୋଡା ଯାତ୍ରା’ କରିବାକୁ ବାଧ୍ୟ ହୋଇଥିଲେ ବୋଲି ରାହୁଲ ଦୋହରାଇଛନ୍ତି।
ରାହୁଲ ଗାନ୍ଧୀ ଏହା ମଧ୍ୟ କହିଛନ୍ତି ଯେ ତାଙ୍କର ‘ଭାରତ ଯୋଡା ଯାତ୍ରା’ ସମଗ୍ର ଦେଶକୁ ଜଣାଇଛି ଯେ, ପ୍ରକୃତ ଭାରତ କ’ଣ? ସେ କହିଛନ୍ତି, ‘ଭାରତର ମୂଲ୍ୟ କ’ଣ? ଆମର ଧର୍ମ ଆମକୁ କ’ଣ ଶିଖାଏ? ଆମର ଭିନ୍ନ ଭାଷା କ’ଣ କୁହନ୍ତି? ଆମର ଭିନ୍ନ ସଂସ୍କୃତି ଆମକୁ କହିଥାଏ ଯେ ଆମେ ଭିନ୍ନ ଚିନ୍ତାଧାରା ସହିତ ଏକ ଦେଶ । ବିନା ଘୃଣା, କ୍ରୋଧରେ ଏବଂ ବିରକ୍ତି ବିନା ଏକତ୍ର ବଞ୍ଚିବାର କ୍ଷମତା ଆମର ଅଛି । ଏବଂ ଯେତେବେଳେ ଆମେ ତାହା କରିବା, ସେତେବେଳେ କେବଳ ଆମେ ସଫଳ ହୋଇଥାଉ। ଏହା ଥିଲା ଯାତ୍ରାର ବାର୍ତ୍ତା।’
କେମ୍ବ୍ରିଜରେ ରାହୁଲ ଗାନ୍ଧୀ ଦେଇଥିବା ଭାଷଣ ପରେ ବିଜେପି ଅଭିଯୋଗ କରିଛି ଯେ ବାରମ୍ବାର ନିର୍ବାଚନରେ ପରାଜୟ ପରେ ବିଦେଶରେ ସେ ଭାରତକୁ ଅପମାନିତ କରିଛନ୍ତି। ତେବେ ଶନିବାର ସନ୍ଧ୍ୟାରେ ଭାରତୀୟ ସାମ୍ବାଦିକ ସଂଘ (ଆଇଜେଏ) ଦ୍ୱାରା ଆୟୋଜିତ ଇଣ୍ଡିଆ ଇନ୍ସାଇଟ୍ସ କାର୍ଯ୍ୟକ୍ରମରେ ରାହୁଲ ଗାନ୍ଧୀ ଗଣମାଧ୍ୟମକୁ କହିଛନ୍ତି ଯେ ମୋର ମନେ ଅଛି ବିଭିନ୍ନ ଦେଶରେ ଅନେକ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ବିଦେଶ ଯାଇ କହିଛନ୍ତି ଯେ ସ୍ୱାଧୀନତାର ୬୦ କିମ୍ବା ୭୦ ବର୍ଷ ମଧ୍ୟରେ କିଛି କରାଯାଇ ନାହିଁ । ଯାହା ଦ୍ୱାରା ସେ ଭାରତକୁ ବିଦେଶରେ ଅପମାନିତ କରିଛନ୍ତି।
କେମ୍ବ୍ରିଜ୍ ବିଶ୍ୱବିଦ୍ୟାଳୟରେ ରାହୁଲ ଗାନ୍ଧୀ କହିଥିଲେ ଯେ, ଭାରତୀୟ ଗଣତନ୍ତ୍ର ଉପରେ ଆକ୍ରମଣ କରାଯାଉଛି ଏବଂ ତାଙ୍କ ସହ ଅନେକ ରାଜନେତାଙ୍କ ଉପରେ ନଜର ରଖାଯାଉଛି । ତେବେ ରାହୁଲଙ୍କ ଏହି ମନ୍ତବ୍ୟ ପରେ କଂଗ୍ରେସ ଏବଂ ବିଜେପି ମଧ୍ୟରେ ବିବାଦ ସୃଷ୍ଟି ହେବାର କାରଣ ହୋଇଛି ।
ରାହୁଲ ଗାନ୍ଧୀ ଏହା ମଧ୍ୟ କହିଥିଲେ ଯେ ସେ ଇସ୍ରାଏଲର ଗୁପ୍ତଚର ପେଗାସସ୍ ମାଧ୍ୟମରେ ବିଜେପି ଅନ୍ୟ ଦଳର ନେତାଙ୍କ ଉପରେ ନଜର ରଖିଛନ୍ତି । ସେ ଭାରତୀୟ ଗଣତନ୍ତ୍ର ଉପରେ ହୋଇଥିବା ଆକ୍ରମଣର ପାଞ୍ଚଟି ମୁଖ୍ୟ ଦିଗ ତାଲିକାଭୁକ୍ତ କରିଛନ୍ତି – ଗଣମାଧ୍ୟମ ତଥା ନ୍ୟାୟପାଳିକା ଉପରେ ନିୟନ୍ତ୍ରଣ, ନଜର ରଖିବା ଏବଂ ଭୟଭୀତତା, ଫେଡେରାଲ୍ ଆଇନ ପ୍ରଣୟନକାରୀ ସଂସ୍ଥା ଦ୍ୱାରା ବାଧ୍ୟବାଧକତା, ସଂଖ୍ୟାଲଘୁ, ଦଳିତ ତଥା ଆଦିବାସୀଙ୍କ ଉପରେ ଆକ୍ରମଣ ଏବଂ ଅସନ୍ତୋଷର ଦମନ ଭଳି ସାଘାତିକ ଅଭିଯୋଗ ଲଗାଇଥିଲେ ।
