Indian Squad for World Cup 2023: ବିଶ୍ୱକପ୍ରେ ଓହ୍ଲାଇପାରେ ଏହି ଭାରତୀୟ ଟିମ୍… ଏହି ଦିନ ହେବ ଘୋଷଣା, ୨ ଖେଳାଳି ରହିବେ ରିଜର୍ଭ
ନୂଆଦିଲ୍ଲୀ: ଭାରତ ଚଳିତ ବର୍ଷ ଦିନିକିଆ କ୍ରିକେଟ୍ ବିଶ୍ୱକପ୍ ୨୦୨୩ ଆୟୋଜନ କରୁଛି । ୫ ଅକ୍ଟୋବରରେ ଏହା ଆରମ୍ଭ ହେଉଥିବା ବେଳେ ୧୯ ନଭେମ୍ବରରେ ଶେଷ ହେବ । ଆନ୍ତର୍ଜତୀୟ କ୍ରିକେଟ୍ ପରିଷଦ(ଆଇସିସି) ନିୟମ ଅନୁଯାୟୀ ବିଶ୍ୱକପ୍ ସମସ୍ତ ଦେଶକୁ ୫ ସେପ୍ଟେମ୍ବର ସୁଦ୍ଧା କୋର୍ ଟିମ୍ ଘୋଷଣା କରିବାକୁ ପଡ଼ିବ । କୋର୍ ଟିମ୍ ଅର୍ଥ ହେଉଛି ଏଥିରେ ଆଇସିସି ଅନୁମତି ବିନା ପରିବର୍ତ୍ତନ ସୁଯୋଗ ରହିବ । କିନ୍ତୁ ଆଇସିସି ବିଶ୍ୱକପ୍ ପାଇଁ ଫାଇନାଲ ୧୫ ଜଣିଆ ଟିମ୍ ଘୋଷଣାର ଶେଷ ତାରିଖ ୨୮ ସେପ୍ଟେମ୍ବର ରହିଛି । ପରେ ଏହି ଦଳରେ ପରିବର୍ତ୍ତନ ପାଇଁ ଆଇସିସିର ଅନୁମତି ଆବଶ୍ୟକ ହେବ ।
ଏହା ପୁର୍ବରୁ ସମସ୍ତ ୧୦ ଦେଶକୁ ନିଜର ଫାଇନାଲ ଟିମ୍ ଘୋଷଣା କରିବାକୁ ପଡ଼ିବ । ଏହାକୁ ନେଇ ଅଷ୍ଟେଲିଆ, ଇଂଲଣ୍ଡ ସମେତ କିଛି ଦେଶ ନିଜର ଟିମ୍ ଘୋଷଣା କରିସାରିଲେଣି । ଏବେ ଭାରତୀୟ ଟିମ୍ର ଘୋଷଣା ସମୟ । ବିଶ୍ୱକପ୍ ପାଇଁ ଭାରତୀୟ ଦଳରେ ୧୫ ରୁ ଅଧିକ ଖେଳାଳି ହୋଇପାରନ୍ତି ।
ବିଶ୍ୱସ୍ତ ସୁତ୍ରରୁ ମିଳିଥିବା ସୂଚନା ଅନୁଯାୟୀ ବିସିସିଆଇ ଭାରତୀୟ ଟିମ୍ର ଘୋଷଣା ୩ ସେପ୍ଟେମ୍ବରକୁ କରିପାରେ । ଅଧିନାୟକ ଦାୟିତ୍ୱ ରୋହିତ ଶର୍ମାଙ୍କ ହାତରେ ରହିବ । ଏହାର ଗୋଟିଏ ଦିନ ପୁର୍ବରୁ ଅର୍ଥାତ୍ ୨ ସେପ୍ଟେମ୍ବରକୁ ପାକିସ୍ତାନ ବିପକ୍ଷରେ ଭାରତ ଏସିଆ କପ୍ରେ ମୁକାବିଲା କରିବ । କୁହାଯାଉଛି ଯେ, ୩ ସେପ୍ଟେମ୍ବରକୁ ଭାରତ ୧୫ ଜଣିଆ ଟିମ୍ ଘୋଷଣା କରିପାରେ । ଏଥିରେ ୨ ଖେଳାଳିଙ୍କୁ ରିଜର୍ଭ ରଖାଯିବ । ଏହି ଦୁଇ ଖେଳାଳି ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣା ଏବଂ ତିଳକ ବର୍ମା ହୋଇପାରନ୍ତି ।
ବିଶ୍ୱକପ ପୂର୍ବରୁ ଭାରତୀୟ ଦଳକୁ ମଧ୍ୟ ଏସିଆ କପ୍ ଖେଳିବାକୁ ପଡିବ, ଯେଉଁଥି ପାଇଁ ବିସିସିଆଇ ୧୭ ଜଣିଆ ଦଳ ଚୟନ କରିଛି । ଏଥିରେ ୱିକେଟ୍ କିପର ବ୍ୟାଟ୍ସମ୍ୟାନ୍ ସଞ୍ଜୁ ସାମସନଙ୍କୁ ରିଜର୍ଭରେ ରଖାଯାଇଛି । କେ.ଏଲ୍ ରାହୁଲଙ୍କ ପାଇଁ ସାମସନ୍ଙ୍କୁ ଏକ ବିକଳ୍ପ ଭାବରେ ନିଆଯାଇଥିଲା । ରାହୁଲ ସାମାନ୍ୟ ଆଘାତ ସହ ସଂଗ୍ରାମ କରୁଛନ୍ତି । ଏସିଆ କପରେ ପାକିସ୍ତାନ ବିପକ୍ଷ ପ୍ରଥମ ମ୍ୟାଚରେ ରାହୁଲ ଖେଳିବା ନେଇ ସନ୍ଦେହ ରହିଛି । ଯଦିଓ ସେ ଏହି ମ୍ୟାଚ୍ ଖେଳନ୍ତି ନାହିଁ, ତଥାପି ସେ ବିଶ୍ୱକପ୍ ଦଳରେ ସ୍ଥାନ ପାଇବେ ।
ତେବେ ଏସିଆ କପ୍ ପରେ ଏବଂ ବିଶ୍ୱକପ୍ ପୂର୍ବରୁ ଭାରତୀୟ ଦଳକୁ ଅଷ୍ଟ୍ରେଲିଆ ବିପକ୍ଷରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବାକୁ ପଡିବ । ଏହି ସିରିଜ୍ ୨୭ ସେପ୍ଟେମ୍ବରରେ ଶେଷ ହେବ। ଏହି କ୍ରମରେ, ବିସିସିଆଇ ସେମାନଙ୍କ ଦଳ ଚେଷ୍ଟା କରିବାକୁ ଏକ ଭଲ ସୁଯୋଗ ପାଇବ । ପରଦିନ ଅର୍ଥାତ୍ ୨୮ ସେପ୍ଟେମ୍ବରରେ, ୧୫ ଜଣିଆ ଦଳ ବିଶ୍ୱକପ୍ ପାଇଁ ଘୋଷଣା କରିପାରେ।
ବିଶ୍ୱକପ୍ ୨୦୨୩ ପାଇଁ ଭାରତର ସମ୍ଭାବ୍ୟ ଦଳ।
ରୋହିତ ଶର୍ମା (ଅଧିନାୟକ), ଶୁଭମାନ ଗିଲ, ବିରାଟ କୋହଲି, ଶ୍ରେୟସ ଆୟର, ଇଶାନ କିଶନ (ୱିକେଟ୍ ରକ୍ଷକ), ସୂର୍ଯ୍ୟକୁମାର ଯାଦବ, କେ.ଏଲ୍ ରାହୁଲ (ୱିକେଟ୍ କିପର), ହାର୍ଦ୍ଦିକ ପାଣ୍ଡ୍ୟା (ଉପ-ଅଧିନାୟକ), ଜସପ୍ରୀତ ବୁମ୍ରା, ରବିନ୍ଦ୍ର ଜାଡେଜା, ଶାର୍ଦ୍ଦୁଲ ଠାକୁର କୁଲଦୀପ ଯାଦବ, ମହମ୍ମଦ ଶାମି ଏବଂ ମହମ୍ମଦ ସିରାଜ । ରିଜର୍ଭ ଖେଳାଳି: ତିଳକ ବର୍ମା ଏବଂ ପ୍ରସିଦ୍ଧ କ୍ରିଷ୍ଣା ।
