ଦୁନିଆର ଯୁବ ଆରବପତିଙ୍କ ତାଲିକାରେ ୧୯ ବର୍ଷୀୟ କ୍ଲେମେଣ୍ଟ
ବିଶ୍ୱର ଆରବପତିମାନଙ୍କ ତାଲିକା ମଧ୍ୟରେ ବିଲ୍ ଗେଟ୍ସ, ଏଲୋନ୍ ମସ୍କ, ଜୈଫ୍ ବେଜୋସ, ବାର୍ନାର୍ଡ଼ ଅର୍ନାଲ୍ଟ, ମାର୍କ ଜୁକର୍ବର୍ଗଙ୍କ ପରି ଅନେକ ନାମ ରହିଛି । ଏହା ପଛରେ ଲୁଚି ରହିଛି ଅନେକ ସଂଘର୍ଷ । ଏହି କ୍ରମରେ ଆଉ ଏକ ନାଁ ଚର୍ଚ୍ଚାର ବିଷୟ ପାଲଟିଛି । ଖୁବ୍ କମ ବୟସରେ ସେ କୋଟିପତିମାନଙ୍କ ତାଲିକାରେ ନିଜ ନାଁ ରେକର୍ଡ଼ କରିଦେଇଛନ୍ତି । କଲେଜ ଯିବା ବୟସରେ ଏତେ ଟଙ୍କା କମାଉଛନ୍ତି ଯେ ଜଣେ ସାଧାରଣ ମଣିଷ ୭ ଜନ୍ମରେ କରିବା ଅସମ୍ଭବ ।
ଏକ ରିପୋର୍ଟ ଅନୁଯାୟୀ ଆନ୍ତର୍ଜାତୀୟ ମ୍ୟାଗାଜିନ୍ ଫୋର୍ବ୍ସ ଆରବପତିମାନଙ୍କ ଏକ ତାଲିକା ପ୍ରକାଶ କରିଥିଲେ ଯେଉଁଥିରେ ୧୯ ବର୍ଷର ବାଳକର ନାଁ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ଏହି ବାଳକ ଜଣଙ୍କ ନାଁ ହେଉଛି କ୍ଲେମେଣ୍ଟ ଡ଼େଲ ୱେକ୍ଚିଓ । ତାଙ୍କର ମୋଟ୍ ସମ୍ପତ୍ତି ୪ ବିଲିୟନ ଡଲାର ଯାହା ଭାରତୀୟ ମୁଦ୍ରାରେ ୩୩ ହଜାର କୋଟିରୁ ବି ଅଧିକ । କ୍ଲେମେଣ୍ଟଙ୍କ ପିତା ଇତାୱିର୍ ଲିଓନାର୍ଡ଼ୋ ଡେଲ୍ ୱେକ୍ଚିଓ ଜଣେ ଅରବପତି ଥିଲେ । ସେ ଦୁନିଆର ସବୁଠାରୁ ବଡ଼ ଚଷମା କମ୍ପାନୀ ‘ଏସିଲୋରଲକ୍ସୋଟିକା’ର ପୂର୍ବତନ ଚେୟାରମ୍ୟାନ ଥିଲେ । ଗତ ବର୍ଷ ଜୁନରେ ୮୭ ବର୍ଷ ବୟସରେ ତାଙ୍କର ଦେହାନ୍ତ ହୋଇଥିଲା । ଏହା ପରେ ତାଙ୍କର ୨୫.୫ ବିଲିୟନ ଡ଼ଲାର ସମ୍ପତ୍ତିର ତାଙ୍କ ସ୍ତ୍ରୀ ଓ ୬ ପିଲାଙ୍କ ମଧ୍ୟରେ ଭାଗବାଣ୍ଟ ହୋଇଥିଲା । ଏହା ପରେ କ୍ଲେମେଣ୍ଟଙ୍କ ଭାଗରେ ଯେଉଁ ସମ୍ପତ୍ତି ଆସିଲା ତାହା ତାଙ୍କୁ କମ ବୟସରେ ଆରବପତି କରିଥିଲା । ତାଙ୍କ ପିତାଙ୍କ ମାଲିକାନାରେ ଲକ୍ଜମବର୍ଗ ସ୍ଥିତ ହୋଲ୍ଡିଂ କମ୍ପାନୀ ଡ଼େଲ୍ଫିୟନରେ ମାତ୍ର ୧୮ ବର୍ଷ ବୟସରେ ସେ ୧୨.୫%ର ଅଂଶୀଦାର ହୋଇଥିଲେ । ଏତେ ସମ୍ପତ୍ତିର ମାଲିକ ହୋଇ ମଧ୍ୟ କ୍ଲେମେଣ୍ଟ ନିଜ ପାଠପଢ଼ା ଜାରି ରଖିଛନ୍ତି ।
