ଜାତିସଂଘ କୋର୍ଟଙ୍କ ରାୟ ପରେ ୩ ଇସ୍ରାଏଲ ବନ୍ଦୀ ମହିଳାଙ୍କ ଭିଡିଓ ଜାରି କଲା ହାମାସ
ନୂଆଦିଲ୍ଲୀ: ପାଲେଷ୍ଟାଇନ ଆତଙ୍କବାଦୀ ସଂଗଠନ ହାମାସ ଶୁକ୍ରବାର ଏକ ଭିଡିଓ ଜାରି କରିଛି, ଯେଉଁଥିରେ ଅକ୍ଟୋବର ୭ ଆକ୍ରମଣ ପରଠାରୁ ଗାଜାରେ ୩ ଜଣ ଇସ୍ରାଏଲ ମହିଳା ବନ୍ଦୀ ଥିବା ଦେଖାଯାଇଛି।
ପାଞ୍ଚ ମିନିଟ୍ର ଏହି ଭିଡିଓରେ ନଜର ଆସିଥିବା ଦୁଇ ଜଣ ମହିଳା କହିଛନ୍ତି ଯେ ସେମାନେ ଇସ୍ରାଏଲ ସୈନିକ ଏବଂ ତୃତୀୟ ଜଣକ କହିଛନ୍ତି ଯେ ସେ ଜଣେ ସାଧାରଣ ନାଗରିକ।
ସରକାରୀ ଏବଂ ଗୋଷ୍ଠୀ ସୂତ୍ରରୁ ଏଏଫପି ଏହି ତିନି ଜଣ ମହିଳାଙ୍କୁ ଚିହ୍ନଟ କରିଛି।
ମହିଳାମାନେ କହିଛନ୍ତି ଯେ ସେମାନଙ୍କୁ ୧୦୭ ଦିନ ଧରି ଅଟକ ରଖାଯାଇଥିଲା, ଯାହା ସୂଚାଉଛି ଯେ ଭିଡିଓଟି ରବିବାର ସୁଟିଂ ହୋଇଥାଇପାରେ।
ଗାଜାରେ ଗଣହତ୍ୟା କୁ ରୋକିବା ପାଇଁ ଇସ୍ରାଏଲ ଯଥାସମ୍ଭବ ଉଦ୍ୟମ କରିବା ଉଚିତ ବୋଲି ଜାତିସଂଘର ସର୍ବୋଚ୍ଚ ଅଦାଲତ ରାୟ ଦେବାର କିଛି ସମୟ ପରେ ଏହି ଭିଡିଓ ଜାରି କରାଯାଇଛି।
ଅକ୍ଟୋବର ୭ ଆକ୍ରମଣ ସମୟରେ ଅପହରଣ ହୋଇଥିବା ବନ୍ଦୀମାନଙ୍କୁ ତୁରନ୍ତ ଏବଂ ନିଃସର୍ତ୍ତ ମୁକ୍ତ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ଅକ୍ଟୋବର ୭ ରେ ହୋଇଥିବା ଅଭୂତପୂର୍ବ ହମାସ ଆକ୍ରମଣରେ ଇସ୍ରାଏଲରେ ପ୍ରାୟ ୧,୧୪୦ ଲୋକ ପ୍ରାଣ ହରାଇଥିଲେ, ସେମାନଙ୍କ ମଧ୍ୟରୁ ଅଧିକାଂଶ ସାଧାରଣ ନାଗରିକ ଥିଲେ ବୋଲି ଇସ୍ରାଏଲର ସରକାରୀ ତଥ୍ୟ ଆଧାରରେ ଏଏଫପି ତଥ୍ୟରୁ ଜଣାପଡ଼ିଛି।
ଆତଙ୍କବାଦୀମାନେ ପ୍ରାୟ ୨୫୦ ଜଣ ବନ୍ଦୀଙ୍କୁ ମଧ୍ୟ ଗିରଫ କରିଥିବା ବେଳେ ଇସ୍ରାଏଲ କହିଛି ଯେ ସେମାନଙ୍କ ମଧ୍ୟରୁ ପ୍ରାୟ ୧୩୨ ଜଣ ଗାଜାରେ ଅଛନ୍ତି, ଯେଉଁଥିରେ ଅତି କମରେ ୨୮ ଜଣ ମୃତ ବନ୍ଦୀଙ୍କ ମୃତଦେହ ରହିଛି।
ହାମାସ ସରକାରଙ୍କ ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଇସ୍ରାଏଲର ବୋମାମାଡ଼ ଏବଂ ସ୍ଥଳଆକ୍ରମଣରେ ଗାଜା ଷ୍ଟ୍ରିପ୍ରେ ଅତି କମରେ ୨୬,୦୮୩ ପାଲେଷ୍ଟାଇନୀ ପ୍ରାଣ ହରାଇଛନ୍ତି, ଯେଉଁଥିରେ ପ୍ରାୟ ୭୦ ପ୍ରତିଶତ ମହିଳା, ଛୋଟ ପିଲା ଏବଂ କିଶୋର ଅଛନ୍ତି।