ଜଣାଶୁଣା ଟିଭି ଅଭିନେତ୍ରୀ କବିତା ଚୌଧରୀଙ୍କ ପରଲୋକ: ହାର୍ଟ ଆଟାକରେ ଶେଷ ନିଃଶ୍ୱାସ ତ୍ୟାଗ କଲେ

ନୂଆଦିଲ୍ଲୀ: ମନୋରଞ୍ଜନଧର୍ମୀ ଜଗତରୁ ଆସିଛି ଏକ ଦୁଃଖ ଖବର । ଜଣାଶୁଣା ଟେଲିଭିଜନ ଅଭିନେତ୍ରୀ କବିତା ଚୌଧୁରୀଙ୍କର ହାର୍ଟ ଆଟାକରେ ପରଲୋକ ଘଟିଛି । ଦୀର୍ଘଦିନ ଧରି କର୍କଟ ରୋଗରେ ପୀଡ଼ିତ ଥିବାରୁ କବିତାଙ୍କର ଚିକିତ୍ସା ଚାଲିଥିଲା । ଶେଷରେ ସେ ୬୭ ବର୍ଷ ବୟସରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ଅଶୀ ଦଶକର ଜଣେ ପ୍ରତିଭାବାନ ଅଭିନେତ୍ରୀ ଭାବେ କବିତା ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିଲେ ।

୧୯୮୯-୯୧ରେ ଦୂରଦର୍ଶନରେ ପ୍ରସାରିତ ହୋଇଥିବା ଧାରାବାହିକ ‘ଉଡ଼ାନ’ରେ ସେ ଆଇପିଏସ ଅଧିକାରୀ କଲ୍ୟାଣୀ ସିଂହ ଭୂମିକାରେ ଅଭିନୟ କରି ଦର୍ଶକଙ୍କ ମଧ୍ୟରେ ବେଶ୍ ଲୋକପ୍ରିୟତା ହାସଲ କରିପାରିଥିଲେ । ଏଥିସହିତ ୨୦୦୦ରେ ‘ୟୋର ଅନର’ ଓ ୨୦୧୫ରେ ‘ଆଇପିଏସ ଡାଏରୀ’ରେ ସେ ଅଭିନୟ କରିଥିଲେ । ପଞ୍ଜାବର ଅମୃତସର ଜନ୍ମମାଟିରେ ତାଙ୍କର ଅନ୍ତିମ ସଂସ୍କାର କରାଯାଇଥିବା ବେଳେ ତାଙ୍କ ଭାଈ ତାଙ୍କୁ ମୁଖାଗ୍ନି ଦେଇଥିଲେ । ୧୯୫୭ ମସିହାରେ ସେ ଜନ୍ମ ଗ୍ରହଣ କରିଥିଲେ ।

କବିତାଙ୍କ ମୃତ୍ୟୁ ଖବର ପାଇବା ପରେ ଅଭିନୟ ଜଗତ ସହ ଜଡ଼ିତ ବହୁ ବିଶିଷ୍ଟ ବ୍ୟକ୍ତିବିଶେଷ ଶୋକ ପ୍ରକାଶ କରିବା ସହିତ ତାଙ୍କର ପ୍ରଶଂସକମାନେ ସୋସିଆଲ ମିଡ଼ିଆରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ହାର୍ଟ ଆଟାକ ପରେ ତାଙ୍କୁ ଅମୃତସରର ପବିତ୍ରା ଦେବୀ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେ ସୁସ୍ଥ ହୋଇ ଘରକୁ ଫେରିବେ ବୋଲି ସମସ୍ତେ ଆଶା କରିଥିଲେ, ମାତ୍ର ସେ ଶବ ହୋଇ ଫେରିଥିଲେ । ଫେବୃଆରୀ ୧୬ କବିତାଙ୍କ ଜୀବନର ଅନ୍ତିମ ଦିନ ଥିଲା । ଅନ୍ୟପକ୍ଷରେ କବିତାଙ୍କୁ ହରାଇ ଗଭୀର ଭାବେ ମର୍ମାହତ ହୋଇପଡ଼ିଛନ୍ତି ତାଙ୍କର ବାନ୍ଧବୀ ସୁଚିତ୍ରା ବର୍ମା । ନିଜର ବାନ୍ଧବୀଙ୍କୁ ଗତବର୍ଷ ଦେଖିଥିଲେ, ଶେଷ ସମୟରେ ତାଙ୍କୁ ଦେଖି ନପାରି ଭାବୁବ ହୋଇ ପଡ଼ିଛନ୍ତି ସୁଚିତ୍ରା ।