EPFOର ବଦଳିଲା ନିୟମ; ଆପଣଙ୍କ PF ଆକାଉଣ୍ଟର ଟଙ୍କା ରହିବ ଆହୁରି ସୁରକ୍ଷିତ

ନୂଆଦିଲ୍ଲୀ: ଚାକିରିରୁ ଅବସର ପରେ କର୍ମଚାରୀମାନଙ୍କ ଭବିଷ୍ୟତକୁ ଦୃଷ୍ଟିରେ ରଖି ସେମାନଙ୍କ ପାଇଁ ସରକାର କର୍ମଚାରୀ ଭବିଷ୍ୟ ନିଧି(ଇପିଏଫ) ଆରମ୍ଭ କରିଛନ୍ତି । ପ୍ରତ୍ୟେକ ମାସ କର୍ମଚାରୀଙ୍କ ରୋଜଗାରର କିଛି ପ୍ରତିଶତ ପିଏଫ ଆକାଉଣ୍ଟରେ ଜମା ହୋଇଥାଏ । କିନ୍ତୁ ଗତ କିଛି ଦିନରୁ ପିଏଫ ଆକାଉଣ୍ଟରେ ସମସ୍ୟା ଦେଖିବାକୁ ମିଳୁଛି । ଏହାପରେ ଇପିଏଫଓ ତରଫରୁ ପିଏଫ ଆକାଉଣ୍ଟକୁ ନେଇ ଅନେକ ନିୟମ ପରିବର୍ତ୍ତନ କରିଛନ୍ତି । ଏହାଦ୍ୱାରା ପିଏଫ ଆକାଉଣ୍ଟ ଗୁଡ଼ିକୁ ଅଧିକରୁ ଅଧିକ ସୁରକ୍ଷା ଦିଆଯିବ । ବର୍ତ୍ତମାନ ଇପିଏଫଓ ପରିଚୟ ସମ୍ବନ୍ଧିତ ତଥ୍ୟ ଅପଡେଟ କରିବା ନିୟମରେ ଏକ ଜରୁରୀ ପରିବର୍ତ୍ତନ କରାଯାଇଛି ।

ଇପିଏଫଓ ଏକ ସର୍କୁଲାର ଜାରି କରି ଏ ସମ୍ପର୍କରେ ସୂଚନା ଦେଇଛନ୍ତି । ଇପିଏଫଓ ତରଫରୁ କୁହାଯାଇଛି ଯେ, ପିଏଫ ଆକାଉଣ୍ଟରେ ନିଜ ବ୍ୟକ୍ତିଗତ ତଥ୍ୟ, ନାମ, ମାତା-ପିତାଙ୍କ ନାମ, ଘର ଠିକଣା ଇତ୍ୟାଦି ପରିବର୍ତ୍ତନ ପାଇଁ ଏବେ ଜଏଣ୍ଟ ଡିକ୍ଲାରେସନ୍ ଫର୍ମ ପୂରଣ କରିବାକୁ ହେବ । ନୂଆ ନିୟମ ଅନୁସାରେ, ଯଦି ବର୍ତ୍ତମାନ ଆପଣଙ୍କ ନିଜ ପିଏଫ ଆକାଉଣ୍ଟରେ ଥିବା ବ୍ୟକ୍ତିଗତ ତଥ୍ୟକୁ ଅପଡେ୍ କରିବାକୁ ଚାହୁଁଛନ୍ତି, ତେବେ ପ୍ରଥମେ ଆପଣ ନିଜ କମ୍ପାନୀକୁ ଜଣାଇବାକୁ ପଡ଼ିବ । ଏହାପରେ କମ୍ପାନୀ ଆପଣଙ୍କ ଅନୁରୋଧକୁ ଭେରିଫାଏ କରି ଜଏଣ୍ଟ ଡିକ୍ଲାରେସନ୍ ଫର୍ମ ପୂରଣ କରିବ । ଏହି କାମ ସରିବା ପରେ ହିଁ ହିତାଧିକାରୀ ନିଜ ଆକାଉଣ୍ଟରେ ଥିବା ବ୍ୟକ୍ତିଗତ ତଥ୍ୟକୁ ଅପଡେଟ୍ କରିପାରିବେ ।

ଏହାବ୍ୟତୀତ ସ୍ଥାନୀୟ ଅଫିସକୁ ଆଦେଶ ଦେଇ ଇପିଏଫଓ କହିଛି ଯେ, ବ୍ୟକ୍ତିଗତ ତଥ୍ୟରେ ପରିବର୍ତ୍ତନ କରିବାର ସମସ୍ତ ଡକ୍ୟୁମେଣ୍ଟକୁ ଭଲ ଭାବରେ ଯାଞ୍ଚ କରାଯିବା ଉଚିତ୍ । ଏଥିରେ ଖିଲାପ ହେଲେ ଠକାମୀର ଶିକାର ହେବାକୁ ପଡ଼ିପାରେ । ତେବେ ତଥ୍ୟ ଅପଡେଟ୍ କରିବା ପାଇଁ କେଉଁସବୁ ଡକ୍ୟୁମେଣ୍ଟ ଆବଶ୍ୟକ, ସେ ନେଇ ମଧ୍ୟ ସୂଚନା ଦେଇଛି ଇପିଏଫଓ । ବ୍ୟକ୍ତିଗତ ତଥ୍ୟ ଅପଡେଟ କରିବାକୁ ଇପିଏଫଓ ୨ଟି କାଟାଗୋରୀ:-(ମାଇନର ଏବଂ ମେଜର) ରେ ବିଭକ୍ତ କରିଛି । ମାଇନର ତଥ୍ୟ ଅପଡେଟ ପାଇଁ ଅତିକମରେ ୨ଟି ଡକ୍ୟୁମେଣ୍ଟ ଏବଂ ମେଜର ପରିବର୍ତ୍ତନ ପାଇଁ ୩ଟି ଡକ୍ୟୁମେଣ୍ଟ ଜମା କରିବାକୁ ପଡ଼ିବ ବୋଲି କୁହାଯାଇଛି ।