ଉଦୟପୁରରେ ସାମ୍ପ୍ରଦାୟିକ ଉତ୍ତେଜନା; ବନ୍ଦ ହେଲା ସ୍କୁଲ, ବଜାର ଓ ଇଣ୍ଟରନେଟ୍, ଭିଡ଼ ଉପରେ ଲାଗିଲା କଟକଣା
ଉଦୟପୁର: ରାଜସ୍ଥାନର ଉଦୟପୁରରେ ଶୁକ୍ରବାର ଏକ ସରକାରୀ ସ୍କୁଲର ଜଣେ ଛାତ୍ରଙ୍କୁ ଜଣେ ଦଶମ ଶ୍ରେଣୀ ଛାତ୍ର ଛୁରାମାଡ଼ କରିବା ପରେ ସାମ୍ପ୍ରଦାୟିକ ଉତ୍ତେଜନା ବୃଦ୍ଧି ପାଇଛି। ଏହି ଘଟଣା ପରେ ଉତ୍ତ୍ୟକ୍ତ ଲୋକେ କାର୍ରେ ନିଆଁ ଲଗାଇବା ସହ ପଥର ଫିଙ୍ଗିଥିଲେ। ପରିସ୍ଥିତିକୁ ଦୃଷ୍ଟିରେ ରଖି ଉଦୟପୁର ଓ ଆଖପାଖ ଅଞ୍ଚଳରେ ଆଜି ରାତି ୧୦ଟାରୁ ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଇଣ୍ଟରନେଟ୍ ବନ୍ଦ ରଖାଯାଇଛି।
ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଭାଟିଆଣୀ ଛୋଟସ୍ଥିତ ସରକାରୀ ସ୍କୁଲରେ ଛୁରାମାଡ଼ ଘଟଣାପଛର କାରଣ ଜଣାପଡ଼ିନାହିଁ। ପୀଡ଼ିତାଙ୍କୁ ଜିଲ୍ଲା ଡାକ୍ତରଖାନାର ଆଇସିୟୁରେ ଭର୍ତ୍ତି କରାଯାଇଛି ଏବଂ ତାଙ୍କ ଅବସ୍ଥା ସ୍ଥିର ରହିଛି। ଏହି ଘଟଣାକୁ ବିରୋଧ କରି ସହରର ମଧୁବନ ଅଞ୍ଚଳରେ କିଛି ହିନ୍ଦୁ ସଂଗଠନର ସଦସ୍ୟ ଏକତ୍ରିତ ହୋଇଥିଲେ। ଉତ୍ତ୍ୟକ୍ତ ଲୋକେ ପଥର ଫିଙ୍ଗିବା ସହ ୩-୪ଟି କାର୍ ରେ ନିଆଁ ଲଗାଇ ଦେଇଥିବା ପୋଲିସ କହିଛି।
ଉତ୍ତେଜନା ବଢିବାରୁ ଶୁକ୍ରବାର ସନ୍ଧ୍ୟାରେ ବାପୁ ବଜାର, ହାତୀପୋଲ, କ୍ଲକ୍ ଟାୱାର, ଚେତକ ସର୍କଲ ଓ ଆଖପାଖ ଅଞ୍ଚଳର ବଜାର ବନ୍ଦ ରହିଥିଲା। ହିନ୍ଦୁ ସଂଗଠନର ଲୋକମାନେ ବଜାରରେ ଦୋକାନ ବନ୍ଦ ରଖିଥିଲେ। କିଛି ହିଂସାତ୍ମକ ବ୍ୟକ୍ତି ଏକ ସପିଂ ମଲ୍ ଉପରକୁ ପଥର ମାଡ଼ କରିବା ସହ ଦୋକାନର କାଚ କବାଟ ନଷ୍ଟ କରିଛନ୍ତି। ଶହ ଶହ ଲୋକ ସରକାରୀ ଡାକ୍ତରଖାନା ବାହାରେ ଏକାଠି ହୋଇଥିବା ବେଳେ ପୋଲିସ ଭିଡ଼କୁ ନିୟନ୍ତ୍ରଣ କରିଥିଲା।
