BIG BREAKING…ହାଇଦ୍ରାବାଦରେ ଜାରି ହେଲା ୧୪୪ ଧାରା; ଏକ ମାସ ପାଇଁ ବିକ୍ଷୋଭ ଉପରେ ଲାଗିଲା କଟକଣା
ହାଇଦ୍ରାବାଦ: ହାଇଦ୍ରାବାଦ ସହରରେ ଏକ ମାସ ପାଇଁ ୧୪୪ ଧାରା ଜାରି କରାଯାଇଛି। ହାଇଦ୍ରାବାଦ ପୋଲିସ ନଭେମ୍ବର ୨୮ ପର୍ଯ୍ୟନ୍ତ କୌଣସି ପ୍ରକାର ଶୋଭାଯାତ୍ରା, ଧାରଣା ଏବଂ ସାଧାରଣ ସଭା ଉପରେ ପ୍ରତିବନ୍ଧକ ଲଗାଇଛି। ହାଇଦ୍ରାବାଦ ପୋଲିସ କମିଶନର ସିଭି ଆନନ୍ଦ ଏନେଇ ଏକ ନିର୍ଦ୍ଦେଶନାମା ଜାରି କରିଛନ୍ତି। ହାଇଦ୍ରାବାଦ ସହରରେ ଧାରଣା ଓ ବିକ୍ଷୋଭ ପ୍ରଦର୍ଶନ କରି ଅନେକ ସଂଗଠନ ଶାନ୍ତି ଶୃଙ୍ଖଳା ପରିସ୍ଥିତିକୁ ଖରାପ କରିବାକୁ ଚେଷ୍ଟା କରୁଛନ୍ତି ବୋଲି ବିଶ୍ବସ୍ତ ସୂଚନା ମିଳିଛି। ଜନଶୃଙ୍ଖଳା, ଶାନ୍ତି ଓ ସୌହାର୍ଦ୍ଦ୍ୟ ବଜାୟ ରଖିବା ଉଦ୍ଦେଶ୍ୟରେ ହାଇଦ୍ରାବାଦ ସହରରେ ୫ କିମ୍ବା ତା’ଠାରୁ ଅଧିକ ବ୍ୟକ୍ତିଙ୍କ ସମାବେଶ, ଶୋଭାଯାତ୍ରା, ଧାରଣା, ରାଲି କିମ୍ବା ସାଧାରଣ ସଭା କରିବାକୁ ଅନୁମତି ଦିଆଯିବ ନାହିଁ।
ହାଇଦ୍ରାବାଦ ପୋଲିସ କମିଶନର ସିଭି ଆନନ୍ଦଙ୍କ ଦ୍ୱାରା ଜାରି ବିଜ୍ଞପ୍ତିରେ କୁହାଯାଇଛି ଯେ ହାଇଦ୍ରାବାଦ ଏବଂ ସିକନ୍ଦରାବାଦ ସୀମାରେ ସାଧାରଣ ଶାନ୍ତି ଏବଂ ଶୃଙ୍ଖଳା କୁ ବ୍ୟାଘାତ ସୃଷ୍ଟି କରିବା ଭଳି କୌଣସି ଚିହ୍ନ, ପ୍ଲାକାର୍ଡ, ପତାକା ଏବଂ ବାର୍ତ୍ତା ପ୍ରଦର୍ଶନ କରିବା ଇତ୍ୟାଦି ପାଇଁ ଲୋକଙ୍କ ଗୋଷ୍ଠୀକୁ କୌଣସି ଭାଷଣ, ଇଙ୍ଗିତ କିମ୍ବା ଫଟୋ କରିବାକୁ ବାରଣ କରାଯାଇଛି। କେବଳ ଇନ୍ଦିରା ପାର୍କ ଧାରଣା ଛକରେ ଶାନ୍ତିପୂର୍ଣ୍ଣ ଧାରଣା ଓ ବିକ୍ଷୋଭ ପ୍ରଦର୍ଶନ କରାଯାଇପାରିବ। ହାଇଦ୍ରାବାଦ ଏବଂ ସିକନ୍ଦରାବାଦରେ ଅନ୍ୟ କୌଣସି ସ୍ଥାନରେ କୌଣସି ପ୍ରକାରଧାରଣା କିମ୍ବା ବିକ୍ଷୋଭ କୁ ଅନୁମତି ନାହିଁ।
ବିଶେଷକରି ସଚିବାଳୟ ଓ ଅନ୍ୟ ସମ୍ବେଦନଶୀଳ ସ୍ଥାନରେ ଏହି ନିର୍ଦ୍ଦେଶକୁ ଉଲ୍ଲଂଘନ କରୁଥିବା ବ୍ୟକ୍ତିଙ୍କ ବିରୋଧରେ ଉପଯୁକ୍ତ ଦଣ୍ଡବିଧାନ ବ୍ୟବସ୍ଥା ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୁଲିସ ପକ୍ଷରୁ ଜାରି ନିର୍ଦ୍ଦେଶନାମାରେ ଜନସାଧାରଣଙ୍କୁ ଅବଗତ କରାଯାଇଛି। ହାଇଦ୍ରାବାଦ ପୁଲିସ ଜାରି କରିଥିବା ଏହି ନିର୍ଦ୍ଦେଶ ଅକ୍ଟୋବର ୨୭ ସନ୍ଧ୍ୟା ୬ଟାରୁ ନଭେମ୍ବର ୨୮ ତାରିଖ ସନ୍ଧ୍ୟା ୬ଟା ପର୍ଯ୍ୟନ୍ତ ବଳବତ୍ତର ରହିବ। ଏହାବ୍ୟତୀତ ଡ୍ୟୁଟିରେ ଥିବା ପୁଲିସ ଅଧିକାରୀ ଓ ସେନା କର୍ମଚାରୀ, ଅନ୍ତିମ ସଂସ୍କାର, ଶିକ୍ଷା ବିଭାଗର ଫ୍ଲାଇଂ ସ୍କ୍ୱାଡ୍ ଏବଂ ସକ୍ଷମ କର୍ତ୍ତୃପକ୍ଷଙ୍କ ଦ୍ୱାରା ଉପଯୁକ୍ତ ଭାବେ ଛାଡ଼ ପାଇଥିବା ବ୍ୟକ୍ତି କିମ୍ବା ଗୋଷ୍ଠୀକୁ ଏହି ଆଦେଶରୁ ବାଦ୍ ଦିଆଯାଇଛି।
CP, Hyd city has issued Notification regarding the Prohibition of every kind of gathering of 5 or more persons, processions, dharnas, rallies public meeting in the limits of Hyderabad and Secunderabad. pic.twitter.com/onijgYgJ6w
— Hyderabad City Police (@hydcitypolice) October 27, 2024
