Video: ଡାଲା ଅଟୋରେ ଆସି କଲେଜ ପିଲାଙ୍କୁ କିଏ ଉଠାଇ ନେଉଛି, ଖସି ଆସି ସବୁ କହିଲେ ଛାତ୍ର

କଟକ: ଅଭିନବ ଉପାୟରେ ଜଣେ ନାବାଳକକୁ କୌଶଳ କ୍ରମେ ବେହୋସ କରାଇ ଡାଲା ଅଟୋରେ ପକାଇ ନେଇଯାଉଥିଲେ ଦୁର୍ବୁତ୍ତ । ହେଲେ ସୌଭାଗ୍ୟ ବସତଃ ଦୀର୍ଘ ୫ ଘଂଟା ପରେ ଗାଡିରୁ ଡେଇଁ ଖସି ପକେଇ ଆସିଲା ବାଳକ ଜଣକ । ଏଭଳି ଘଟଣା ଘଟିଛି କଟକ ଜିଲ୍ଲା ସାଲେପୁର ଥାନା ରାଇସୁଙ୍ଗୁଡାର କୁସମ୍ବି ଗାଁରେ । ଏହି ଗାଁର ଯୁକ୍ତଦୁଇ ଶ୍ରେଣୀରେ ପଢ଼ୁଥିବା ସମ୍ବିତ ସୂର୍ଯ୍ୟ ପ୍ରକାଶ ପଳେଇ ସକାଳେ ନିଜ ସାଇକେଲରେ ଟ୍ୟୁସନ ଯିବା ବାଟରେ ଜିଗ୍ନିପୁର ନିକଟରେ ଏକ ନିଚ୍ଛାଟିଆ ଜାଗାରେ ଏକ ନାଲି ରଙ୍ଗର ଡାଲା ଅଟୋ ଛିଡା ହୋଇଥିବା ଦେଖିଥିଲେ । ସେଥିରେ ଦୁଇଜଣ ଯୁବକ ଥିଲେ।

ତେବେ ସେଥିମଧ୍ୟରୁ ଜଣେ ଅଟୋକୁ ପେଲି ଷ୍ଟାର୍ଟ କରିବା ପାଇଁ କହିବାରୁ ସମ୍ବିତ ରାସ୍ତା କଡ଼କୁ ସାଇକେଲ ରଖି ପେଲିଥିଲା । ତେବେ ସେହି ସମୟରେ ତା ମୁହଁରେ ସେହି ଯୁବକ ଜଣକ ରୁମାଲ ଦେଇଦେବାରୁ ସମ୍ବିତ ଅଚେତ ହୋଇ ପଡ଼ିଥିଲେ । ଚେତା ଆସିବା ବେଳକୁ ୫ଘଣ୍ଟାରୁ ଅଧିକ ବିତି ଯାଇଥିଲା । ଜଗତପୁର ନିକଟ ଖାଇରା ପୋଲ ନିକଟରେ ସମ୍ବିତର ଚେତା ଆସିବାରୁ ସେ ନିଜକୁ ଅଟୋ ଡାଲାରେ ପାଇଥିଲା । ସେଠାରୁ  କୌଣସି ମତେ ସମ୍ବିତ ଅଟୋ ଡାଲା ରୁ ଡେଇଁ ବଂଚି ଯାଇଥିଲା । ତେବେ କିଏ କଣ ପାଇଁ କାହିଁକି ସମ୍ବିତକୁ ନେଇଥିଲେ ତାହା ଜଣାପଡିନାହିଁ । ସାଲେପୁର ପୋଲିସ ଘଟଣାର ତଦନ୍ତ ଆରମ୍ଭ କରିଛି ।