ଖୁବଶୀଘ୍ର କାର୍ଯ୍ୟକ୍ଷମ ହେବ ଶିଶୁ ଭବନର ନୂଆ ବିଲ୍ଡିଂ: ହାଇକୋର୍ଟଙ୍କୁ ଅବଗତ କରାଇଲେ ସ୍ବାସ୍ଥ୍ୟ ସଚିବ
କଟକ: (ଓଡ଼ିଆ ଭାସ୍କର) ଖୁବଶୀଘ୍ର କାର୍ଯ୍ୟକ୍ଷମ ହେବ ଶିଶୁ ଭବନର ନୂଆ ବିଲ୍ଡିଂ । ହାଇକୋର୍ଟଙ୍କୁ ଅବଗତ କରାଇଲେ ସ୍ବାସ୍ଥ୍ୟ ସଚିବ । କଟକ ସହର ସମସ୍ୟା ସଂପର୍କିତ ମାମଲାକୁ ନେଇ ଅବଗତ କରାଇଲେ ସ୍ବାସ୍ଥ୍ୟ ସଚିବ । ଫାୟାର ସେଫ୍ଟି ସାର୍ଟିଫିକେଟ ମିଳିବା ମାତ୍ରେ କାର୍ଯ୍ୟକ୍ଷମ ହେବ ଶିଶୁ ଭବନର ନୂଆ ବିଲ୍ଡିଂ । SCB ମେଡିକାଲରେ ଖାଲି ଥିବା ସମସ୍ତ ପଦବୀ ପୂରଣ ହେବ । ସେନେଇ ଖୁବଶୀଘ୍ର ପଦକ୍ଷେପ ନିଆଯିବା ନେଇ ଗଣମାଧ୍ୟମ ଆଗରେ ଜଣାଇଲେ । ଶିଶୁଭବନ ନାମରେ ପରିଚିତ ସର୍ଦ୍ଦାର ବଲ୍ଲଭଭାଇ ପଟେଲ ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ପେଡିଆଟ୍ରିକ୍ସ (ଏସ୍ଭିପିପିଜିଆଇପି)ର ସମ୍ପ୍ରସାରଣ ବାଧାପ୍ରାପ୍ତ ହୋଇଛି କାରଣ ନବନିର୍ମିତ କୋଠାଟି ଏପର୍ଯ୍ୟନ୍ତ ଜନସାଧାରଣଙ୍କ ଉଦ୍ଦେଶ୍ୟରେ ସମର୍ପିତ ହୋଇପାରିନାହିଁ।
ସୂତ୍ରରୁ ପ୍ରକାଶ ଯେ ୧୨୭ କୋଟିରୁ ଅଧିକ ଟଙ୍କା ବ୍ୟୟରେ ୭ ମହଲା ବିଶିଷ୍ଟ ଏହି କୋଠା ନିର୍ମାଣ କାର୍ଯ୍ୟ ୨୦୨୩ରେ ଶେଷ ହେବା ପରେ ପୂର୍ତ୍ତ ବିଭାଗ ଡାକ୍ତରଖାନା କର୍ତ୍ତୃପକ୍ଷଙ୍କୁ ଏହି ସୁବିଧା ହସ୍ତାନ୍ତର କରିଥିଲା। ତେବେ କର୍ମଚାରୀ ଅଭାବରୁ ଏପର୍ଯ୍ୟନ୍ତ ସେବା ଯୋଗାଇ ଦିଆଯାଇପାରିନାହିଁ। ମିଳିଥିବା ସୂଚନା ଅନୁଯାୟୀ, ୧୨୭.୩୫ କୋଟି ଟଙ୍କା ବ୍ୟୟରେ ୨୦୨୦ ଫେବ୍ରୁଆରିରେ ଆରମ୍ଭ ହୋଇଥିବା ଶିଶୁଭବନ ସମ୍ପ୍ରସାରଣ ପ୍ରକଳ୍ପରେ ଅଧିକ ସଂଖ୍ୟକ ମେଡିକାଲ ୱାର୍ଡ, ଡାକ୍ତରୀ ଛାତ୍ରଛାତ୍ରୀଙ୍କ ପାଇଁ ହଷ୍ଟେଲ ଓ ଅନ୍ୟାନ୍ୟ ବିଭାଗ ପ୍ରତିଷ୍ଠା କରିବାକୁ ଲକ୍ଷ୍ୟ ରଖାଯାଇଛି। ବର୍ତ୍ତମାନ ହସ୍ପିଟାଲରେ ଦୁଇଟି ଓପିଡି କାର୍ଯ୍ୟକ୍ଷମ ଥିବା ବେଳେ ଗୋଟିଏ ସର୍ଜରୀ ବିଭାଗକୁ ସମର୍ପିତ ହୋଇଥିବା ବେଳେ ଅନ୍ୟଟି ସାଧାରଣ ଓପିଡି ରହିଛି।
ମଲ୍ଟି-ୟୁଟିଲିଟି କମ୍ପ୍ଲେକ୍ସର ତଳ ମହଲା ୩,୬୮୨ ବର୍ଗଫୁଟ ଅଞ୍ଚଳରେ ନିର୍ମିତ ହୋଇଥିବା ବେଳେ ଏଥିରେ ୪ଟି ସୁପର ସ୍ପେଶାଲିଟି ଓପିଡି ସହ ୧୦ଟି ନୂଆ ଓପିଡି ସୁବିଧା ଉପଲବ୍ଧ ହେବ। ଏହାବ୍ୟତୀତ ତଳ ମହଲାରେ ସାଧାରଣ ରୋଗୀଙ୍କ ପାଇଁ ୪୭ଟି କାଜୁଆଲିଟି ବେଡ୍ ଓ ଗୋଟିଏ ମାଇନର ଅପରେସନ୍ ଥିଏଟର (ଓଟି) ଉପଲବ୍ଧ ହେବ। ୩୦୨୨ ବର୍ଗଫୁଟ ଅଞ୍ଚଳ ବିଶିଷ୍ଟ ପ୍ରଥମ ମହଲାରେ ୧୧୦ଟି ଶଯ୍ୟା ରହିବ। ଦ୍ବିତୀୟ ମହଲାରେ ୩୪୭୦ ବର୍ଗଫୁଟ ଅଞ୍ଚଳରେ ନିର୍ମିତ ସମସ୍ତ ଗୁରୁତ୍ବପୂର୍ଣ୍ଣ ୟୁନିଟ୍ ରହିବ। ଏହାଦ୍ୱାରା ହାଇ ଡିପେଣ୍ଡେନ୍ସି ୟୁନିଟ୍ (ଏଚ୍ଡିୟୁ) ପାଇଁ ୩୦ଟି ଶଯ୍ୟା, ପେଡିଆଟ୍ରିକ୍ ଇଣ୍ଟେନ୍ସିଭ୍ କେୟାର ୟୁନିଟ୍ (ପିଆଇସିୟୁ) ପାଇଁ ୧୫ଟି ଶଯ୍ୟା, ନବଜାତ ଶିଶୁ ନିବିଡ଼ ଯତ୍ନ ୟୁନିଟ୍ (ଏନ୍ଆଇସିୟୁ) ପାଇଁ ୪୦ଟି ଓ କଙ୍ଗାରୁ ମାତୃ ଯତ୍ନ ୟୁନିଟ୍ (କେଏମ୍ସିୟୁ) ପାଇଁ ୧୧ଟି ଶଯ୍ୟା ଉପଲବ୍ଧ ହେବ।
ସେହିପରି ଫିଡିଂ ରୁମ୍ ପାଇଁ ୬ଟି ଶଯ୍ୟା ସଂରକ୍ଷିତ ରଖାଯାଇଥିବା ବେଳେ ମେଡିସିନ୍ ୱାର୍ଡ ପାଇଁ ୬୦ଟି ଶଯ୍ୟା ସଂରକ୍ଷିତ ରଖାଯାଇଛି। ନୂତନ କୋଠାର ପଞ୍ଚମ ଓ ଷଷ୍ଠ ମହଲାକୁ ପ୍ରଶାସନିକ ଉଦ୍ଦେଶ୍ୟରେ ବ୍ୟବହାର କରାଯିବ। ଷଷ୍ଠ ମହଲାରେ ଏକ ସମ୍ମିଳନୀ କକ୍ଷ, ସେମିନାର ହଲ୍ ଓ ଟ୍ରେନିଂ ହଲ୍ ମଧ୍ୟ ରହିବ। ସେହିପରି ତୃତୀୟ ମହଲାରେ ନବଜାତ କନ୍ୟା ପାଇଁ ୩୦୦ ଶଯ୍ୟା ଥିବା ବେଳେ ମା’ଙ୍କ ପାଇଁ ବିଶ୍ରାମଗୃହ ପାଇଁ ୯୨ ଶଯ୍ୟା ସଂରକ୍ଷିତ ରହିଛି। ସେହିପରି କେଏମ୍ସିୟୁ ପାଇଁ ୨୨ଟି ଶଯ୍ୟା ଆବଣ୍ଟନ କରାଯିବ। ଚତୁର୍ଥ ମହଲାରେ ୪୦ଟି ପେଡିଆଟ୍ରିକ ସର୍ଜରୀ ୱାର୍ଡ ଓ ୩ଟି ଓଟି ରହିବ। ନୂତନ ହଷ୍ଟେଲ ନିର୍ମାଣ ପାଇଁ ୧୨୪ଟି କୋଠରୀ ପାଇଁ ୪୯୭୪ ବର୍ଗଫୁଟ ଅଞ୍ଚଳ ବ୍ୟବହୃତ ହେବ, ଯେଉଁଥିରୁ ୫୦ଟି ମହିଳା, ସେତିକି ପୁରୁଷ ଡାକ୍ତରୀ ଛାତ୍ର ଓ ୨୪ଟି ବିବାହିତ ଡାକ୍ତରଙ୍କ ପାଇଁ ହେବ।
