ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେଙ୍କ କାଫିଲା ଯିବା ସମୟରେ ଦୁର୍ଘଟଣା: ଗାଡ଼ି ଓଲଟି ୪ ଜଣ ଆହତ
ନୂଆଦିଲ୍ଲୀ: ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେପିର ବରିଷ୍ଠ ନେତ୍ରୀ ବସୁନ୍ଧରା ରାଜେଙ୍କ କାଫିଲା ଯିବା ସମୟରେ ଏକ ଅଘଟଣ ଘଟିଛି । କାଫିଲାର ପୋଲିସ ଗାଡ଼ି ଓଲଟି ପଡ଼ିବା ଫଳରେ ୪ ଜଣ ପୋଲିସ କର୍ମୀ ଆହତ ହୋଇଥିବା ଜଣାପଡ଼ିଛି । ପାଲୀ ଜିଲ୍ଲାର ରୋହଟ ଓ ପଣିହାରୀ ଛକ ନିକଟରେ ଏହି ଦୁର୍ଘଟଣା ଘଟିଥିଲା । ରାଜ୍ୟ କ୍ୟାବିନେଟ ମନ୍ତ୍ରୀ ଓଟାରାମ ଦେବାସୀଙ୍କ ମାତୃ ବିୟୋଗ ଖବର ପାଇବା ପରେ ସମବେଦନା ଜଣାଇବାକୁ ବସୁନ୍ଧରା ଯିବା ସମୟରେ ଏହି ଦୁର୍ଘଟଣା ଘଟିଥିଲା ।
ସୂଚନା ମୁତାବକ, ଏକ ବାଇକ୍ ଆରୋହୀଙ୍କୁ ବଞ୍ଚାଇବାକୁ ଯାଇ ପୋଲିସର ବୋଲେରୋ ଗାଡ଼ି ନିୟନ୍ତ୍ରଣ ହରାଇ ଓଲଟି ପଡ଼ିଥିଲା । ପାଲୀ ଜିଲ୍ଲାର ବାଲୀରେ ବସୁନ୍ଧରା ରାଜେ କ୍ୟାବିନେଟ ମନ୍ତ୍ରୀ ଓଟାରାମ ଦେବାସୀଙ୍କ ମାତୃ ବିୟୋଗ ପରେ ସମବେଦନା ଜଣାଇବାକୁ ଯାଉଥିଲେ । ମହାଦେବ ହୋଟେଲ ନିକଟରେ ବସୁନ୍ଧରାଙ୍କୁ ଏସ୍କଟ କରୁଥିବା ପୋଲିସ ଗାଡ଼ି ଓଲଟି ପଡ଼ିଥିଲା । ସଙ୍ଗେସଙ୍ଗେ ବସୁନ୍ଧରା ଗାଡ଼ିରୁ ଓହ୍ଲାଇ ଆହତ ପୋଲିସ କର୍ମୀଙ୍କୁ ଆମ୍ବୁଲାନ୍ସରେ ହସ୍ପିଟାଲ ପଠାଇବାର ବ୍ୟବସ୍ଥା କରିଥିଲେ । ବର୍ତ୍ତମାନ ସମସ୍ତ ଆହତଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ।
