ସାଉଦି ଆରବରେ ମର୍ମନ୍ତୁଦ ସଡ଼କ ଦୁର୍ଘଟଣା, ୯ ଭାରତୀୟ ମୃତ

ନୂଆଦିଲ୍ଲୀ: ପଶ୍ଚିମ ସାଉଦି ଆରବର ଜିଜାନ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା। ଏହି ସଡ଼କ ଦୁର୍ଘଟଣାରେ ୯ ଜଣ ଭାରତୀୟ ନାଗରିକଙ୍କ ମୃତ୍ୟୁ ଘଟିଛି ବୋଲି ଜେଦ୍ଦାସ୍ଥିତ ଭାରତୀୟ ଦୂତାବାସ ବୁଧବାର ସୂଚନା ଦେଇଛି।

ଦୂତାବାସ ପୀଡ଼ିତାଙ୍କ ପରିବାରକୁ ସମ୍ପୂର୍ଣ୍ଣ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛି ଏବଂ ସ୍ଥାନୀୟ କର୍ତ୍ତୃପକ୍ଷଙ୍କ ସହ ସମନ୍ୱୟ ରକ୍ଷା କରୁଛି। ସହାୟତା ପାଇଁ ଏକ ସ୍ୱତନ୍ତ୍ର ହେଲ୍ପଲାଇନ ମଧ୍ୟ ପ୍ରତିଷ୍ଠା କରାଯାଇଛି।

ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଶୋକ ପ୍ରକାଶ କରି ମିଶନ ଲେଖିଛି, ସାଉଦି ଆରବର ପଶ୍ଚିମାଞ୍ଚଳର ଜିଜାନ ନିକଟରେ ଏକ ସଡକ ଦୁର୍ଘଟଣାରେ ୯ ଜଣ ଭାରତୀୟ ନାଗରିକଙ୍କ ଦୁଃଖଦ ମୃତ୍ୟୁ ରେ ଆମେ ଗଭୀର ଶୋକ ପ୍ରକାଶ କରୁଛୁ।

କ୍ଷତିଗ୍ରସ୍ତ ପରିବାରପ୍ରତି ଆମର ଗଭୀର ସମବେଦନା। ଜେଦ୍ଦାସ୍ଥିତ ଭାରତୀୟ କନ୍ ସୁଲେଟ୍ ଜେନେରାଲ୍ ସମ୍ପୂର୍ଣ୍ଣ ସହଯୋଗ କରୁଛି ଏବଂ କର୍ତ୍ତୃପକ୍ଷ ଓ ପରିବାର ଲୋକଙ୍କ ସହ ଯୋଗାଯୋଗରେ ରହିଛି।

ଆହତଙ୍କ ଆଶୁ ଆରୋଗ୍ୟ କାମନା କରୁଛୁ। ଅଧିକ ପଚରାଉଚରା ପାଇଁ ଏକ ସ୍ୱତନ୍ତ୍ର ହେଲ୍ପଲାଇନ୍ ଖୋଲାଯାଇଛି। ଏସ୍ ଜୟଶଙ୍କର କହିଲେ- ମୃତକଙ୍କ ପରିବାରକୁ ସାହାଯ୍ୟ କରିବାକୁ ଆମେ ପ୍ରସ୍ତୁତ।