ସୋମବାର ଦିନ କାହିଁକି ହୁଏ ଅଧିକ ହାର୍ଟଆଟାକ୍, ଏହା ପଛର କାରଣ କ’ଣ?

ଓଡ଼ିଶା ଭାସ୍କର: ସପ୍ତାହର ପ୍ରଥମ ଦିନ ‘ସୋମବାର’ ପ୍ରାୟତଃ ଚାପ ଓ ଭିଡ଼ରେ ଭରି ରହିଥାଏ। କିନ୍ତୁ କ’ଣ ଆପଣ ଜାଣନ୍ତି କି ଅନେକ ଗବେଷଣାରୁ ଜଣାପଡିଛି ଯେ ସୋମବାର ଦିନ ହାର୍ଟ ଆଟାକ ହେବାର ଆଶଙ୍କା ଅଧିକ ଥାଏ।

ଏହା ଶୁଣି ଲେ ଆପଣ ଆଶ୍ଚର୍ଯ୍ୟ ହୋଇଯିବେ, କିନ୍ତୁ ଏହା ପଛର କାରଣ ଜାଣିଲେ ଆପଣ ଆହୁରି ଆଶ୍ଚର୍ଯ୍ୟ ହୋଇଯିବେ । ବ୍ରିଟିଶ କାର୍ଡିଓଭାସ୍ୟୁଲାର ସୋସାଇଟି (ବିସିଏସ୍) ସମ୍ମିଳନୀ ୨୦୨୩ରେ ଉପସ୍ଥାପିତ ଏକ ଅଧ୍ୟୟନ ହୃଦ୍ଘାତ ସମ୍ପର୍କରେ ନୂତନ ତଥ୍ୟ ପ୍ରଦାନ କରିଛି।

ଏହି ଅଧ୍ୟୟନ ଅନୁଯାୟୀ, ସପ୍ତାହର ଅନ୍ୟ କୌଣସି ଦିନ ତୁଳନାରେ ସୋମବାର ଦିନ ହୃଦ୍ଘାତ ର ମାମଲା ଅଧିକ ଥାଏ । ବେଲଫାଷ୍ଟ ହେଲ୍ଥ ଆଣ୍ଡ ସୋସିଆଲ କେୟାର ଟ୍ରଷ୍ଟ ଏବଂ ଆୟର୍ଲାଣ୍ଡର ରୟାଲ କଲେଜ ଅଫ୍ ସର୍ଜନର ଡାକ୍ତରମାନେ ଏହି ଗବେଷଣା କରିଛନ୍ତି।

ଗବେଷକମାନେ ୨୦୧୩ରୁ ୨୦୧୮ ମଧ୍ୟରେ ୧୦,୦୦୦ରୁ ଅଧିକ ରୋଗୀଙ୍କ ରେକର୍ଡ ଯାଞ୍ଚ କରିଥିଲେ, ଯେଉଁମାନେ ସବୁଠାରୁ ଗୁରୁତର ପ୍ରକାରର ହୃଦଘାତ, ଏସଟି-ସେଗ୍ମେଣ୍ଟ ଏଲିଭେସନ୍ ମାୟୋକାର୍ଡିଆଲ ଇନଫାର୍କସନ (ଏସଟିଇଏମଆଇ) ପାଇଁ ଡାକ୍ତରଖାନାରେ ଭର୍ତ୍ତି ହୋଇଥିଲେ।

ଅଧ୍ୟୟନରୁ ଜଣାପଡିଛି ଯେ ସପ୍ତାହ ଆରମ୍ଭରେ (ବିଶେଷ କରି ସୋମବାର) ଏଭଳି ଗୁରୁତର ହୃଦ୍ଘାତ ର ଘଟଣା ୧୩% ବୃଦ୍ଧି ପାଇଥାଏ । ଗବେଷଣା ସହ ଜଡିତ ଡାକ୍ତର ଜ୍ୟାକ୍ ଲାଫାନ ଡେଲି ମେଲକୁ କହିଛନ୍ତି ଯେ ପାଶ୍ଚାତ୍ୟ ଦେଶମାନଙ୍କରେ ଏଭଳି ଧାରା ପୂର୍ବରୁ ଦେଖିବାକୁ ମିଳିଛି ।

ବୈଜ୍ଞାନିକଙ୍କ ମତରେ ଶୀତ ଦିନେ ଓ ସକାଳେ ହୃଦଘାତ ହେବାର ସମ୍ଭାବନା ଅଧିକ ରହିଥାଏ। ଏହାବ୍ୟତୀତ ଷ୍ଟ୍ରୋକ୍ କ୍ଷେତ୍ରରେ ମଧ୍ୟ ସମାନ ଢାଞ୍ଚା ଦେଖିବାକୁ ମିଳିଛି।

ଡାକ୍ତରମାନେ ବିଶ୍ୱାସ କରନ୍ତି ଯେ ଏହାର ମୁଖ୍ୟ କାରଣ ଆମର ସର୍କାଡିଆନ୍ ରିଦମ୍ (ବାୟୋଲୋଜିକାଲ କ୍ଲକ୍)ରେ ପରିବର୍ତ୍ତନ ହୋଇପାରେ, ଯାହା ହରମୋନ୍ ସ୍ତରକୁ ପ୍ରଭାବିତ କରିଥାଏ।

ଏହାବ୍ୟତୀତ ସୋମବାର କାମକୁ ଫେରିବାର ଚିନ୍ତା ଏବଂ ଚାପ ଶରୀରରେ କର୍ଟିସୋଲ ହରମୋନ ସ୍ତରକୁ ବଢାଇପାରେ, ଯାହା ହୃଦଘାତର ଆଶଙ୍କା ବଢାଇପାରେ ।

ହୃଦଘାତରୁ କିପରି ରକ୍ଷା ପାଇବେ?

• ଠିକ୍ ସମୟରେ ହୃଦଘାତର ଲକ୍ଷଣ ଚିହ୍ନଟ ହେଲେ ଜୀବନ ରକ୍ଷା କରାଯାଇପାରିବ।
• ଛାତିରେ ଯନ୍ତ୍ରଣା, ଯାହା ଚାପ, କଠିନତା କିମ୍ବା ଜଳିବା ଭଳି ଅନୁଭବ କରିପାରେ ।
• ଶ୍ୱାସକ୍ରିୟାରେ ଅସୁବିଧା, ଯାହା ଛାତିରେ ଯନ୍ତ୍ରଣା ସହିତ କିମ୍ବା ବିନା ହୋଇପାରେ ।
•  ହାତ, ବେକ, ଚକଡ଼ା, ପିଠି କିମ୍ବା ପେଟରେ ଯନ୍ତ୍ରଣା, ଯାହାକୁ ପ୍ରାୟତଃ ମାଂସପେଶୀ ଚାପ ବା ବଦହଜମ ବୋଲି ଭୁଲ କରାଯାଏ ।
•  ଥଣ୍ଡା ଝାଳ, ମୁଣ୍ଡ ବୁଲାଇବା, ବାନ୍ତି ହେବା ଏବଂ ଅତ୍ୟଧିକ ଥକାପଣ ।