ଓଭରହିଟ୍ କାରଣରୁ ବ୍ଲାଷ୍ଟ ହୋଇପାରେ ସ୍ମାର୍ଟଫୋନ, ଖରା ଦିନେ ଏଭଳି ରଖନ୍ତୁ କୁଲ୍

ନୂଆଦିଲ୍ଲୀ: ଗ୍ରୀଷ୍ମ ଋତୁ ଆରମ୍ଭ ହୋଇଗଲାଣି । ଦେଶର କିଛି ଅଞ୍ଚଳରେ ଗ୍ରୀଷ୍ମ ଋତୁରେ ତାପମାତ୍ରା 40 ଡିଗ୍ରୀ ଟପିଲାଣି । ଏଭଳି ସ୍ଥିତିରେ କଲିଂ ସମୟରେ ମୋବାଇଲ ଫାଟିଯିବାର ସମ୍ଭାବନା ଅଧିକ ରହିଥାଏ ।

କ୍ୟାମେରା ବ୍ୟବହାର ଏବଂ ଗେମିଂ ସମୟରେ ପରିସ୍ଥିତି ଆହୁରି ଖରାପ ହୋଇଯାଏ । ଯଦି ଫୋନ୍ ଅଧିକ ଗରମ ହୁଏ, ତେବେ ଏହା ବିସ୍ଫୋରଣ ହେବାର ଆଶଙ୍କା ଥାଏ । ଏପରି ପରିସ୍ଥିତିରେ, କିଛି ଟିପ୍ସ ଜାଣିରଖିବା ଉଚିତ ବୋଲି କୁହାଯାଇଛି ।

କେଉଁଁ କାରଣରୁ ବ୍ଲାଷ୍ଟ ହୁଏ ଫୋନ- ଫୋନ୍ ବିସ୍ଫୋରଣର ଅନେକ କାରଣ ଅଛି । ଆଜିକାଲି, ଅଧିକାଂଶ ସ୍ମାର୍ଟଫୋନରେ ଲିଥିୟମ-ଆୟନ ବ୍ୟାଟେରୀ ଥାଏ । ସକାରାତ୍ମକ ଏବଂ ନକାରାତ୍ମକ ଇଲେକ୍ଟ୍ରୋଡର ଏକ ସନ୍ତୁଳନ ରହିଛି ।

ଯେତେବେଳେ କିଛି ଭୁଲ ହୁଏ, ବ୍ୟାଟେରୀର ଭିତର ଉପାଦାନଗୁଡ଼ିକ ଭାଙ୍ଗିଯାଏ ଏବଂ ଏକ ପ୍ରତିକ୍ରିୟା ଘଟେ, ଯାହା ଫୋନକୁ ବିସ୍ଫୋରଣ କରିପାରେ । ଯେତେବେଳେ ଫୋନର ବ୍ୟାଟେରୀ ଗରମ ହୋଇଯାଏ, ସେତେବେଳେ ଥର୍ମାଲ୍ ରନ୍‌ୱେ ନାମକ ଏକ ଚେନ୍‌ ରିଆକ୍ସନ୍ ହୁଏ, ଯାହା ଯୋଗୁଁ ବ୍ୟାଟେରୀର ତାପମାତ୍ରା ଆହୁରି ବଢ଼ିଯାଏ ଏବଂ ଏହା ବିସ୍ଫୋରଣ ମଧ୍ୟ ହୋଇପାରେ ।

ଖରାଦିନେ କିଭଳି ଥଣ୍ଡା ରଖିବେ ଫୋନ- ଗ୍ରୀଷ୍ମ ଋତୁରେ, ଅଧିକ ତାପମାତ୍ରା ଯୋଗୁଁ ଫୋନ୍ ଶୀଘ୍ର ଗରମ ହୋଇଯାଏ। ତେଣୁ, ଅତ୍ୟଧିକ ଗରମ ସମୟରେ ଫୋନ୍ ବ୍ୟବହାର କରିବାରୁ ଦୂରେଇ ରହିବା ଜରୁରୀ । ଉଚ୍ଚ ତାପମାତ୍ରା ସମୟରେ କେବଳ ଆବଶ୍ୟକତା ଅନୁସାରେ ଫୋନ୍ ବ୍ୟବହାର କରିବା ଠିକ୍ । ବିଶେଷକରି ଫୋନକୁ ସୂର୍ଯ୍ୟକିରଣରୁ ଦୂରେଇ ରଖନ୍ତୁ । ରାତିସାରା ଫୋନକୁ ଚାର୍ଜିଂରେ ରଖନ୍ତୁ ନାହିଁ । ସେହିପରି ଚାର୍ଜିଂ ସମୟରେ ଫୋନକୁ ଘୋଡାନ୍ତୁ ନାହିଁ ।