ଡରୁଛି ସରକାର, ଜାଣିଥିଲେ ଭୁଲ୍ କାମ କରୁଛନ୍ତି: କୃଷି ଆଇନ ପ୍ରତ୍ୟାହାର ପରେ କେନ୍ଦ୍ର ଉପରେ ବର୍ଷିଲେ ରାହୁଲ

ନୂଆଦିଲ୍ଲୀ : କୃଷି ଆଇନ ପ୍ରତ୍ୟାହାର ଉପରେ ଲୋକସଭା ଓ ରାଜ୍ୟସଭାରେ ମୋହର ବାଜିବା ପରେ କଂଗ୍ରେସ ନେତା ରାହୁଲ ଗାନ୍ଧୀ ନୂତନ ଦାବି ଉଠାଇଛନ୍ତି । ସେ କହିଛନ୍ତି ଏହି ବିଲ୍ ପ୍ରତ୍ୟାହାର କରି ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମାନିଛନ୍ତି ଯେ, ତାଙ୍କ ଦ୍ଵାରା ଭୁଲ୍ ହୋଇଛି । ଯଦି ସରକାର ମାନୁଛନ୍ତି ତାଙ୍କ ଦ୍ଵାରା ଭୁଲ୍ ହୋଇଛି ତେବେ ଆନ୍ଦୋଳନ ସମୟରେ ପ୍ରାଣ ହରେଇଥିବା କୃଷକଙ୍କ ପରିଜନଙ୍କୁ କ୍ଷତିପୂରଣ ମିଳିବା ଉଚିତ୍ । ରାହୁଲ କହିଛନ୍ତି, ଆମେ କହିଥିଲୁ ଯେ, ସରକାରଙ୍କୁ ଏହି ତିନି କଳା ଆଇନ ପ୍ରତ୍ୟାହାର କରିବାକୁ ପଡିବ । ଦେଶର ୩ ରୁ ୪ ପୁଞ୍ଜିପତିଙ୍କ ଆଗରେ କୃଷକଙ୍କ ଶକ୍ତି ଦୁର୍ବଳ ହୋଇ ପାରିବ ନାହିଁ।

ରାହୁଲ କହିଛନ୍ତି, ଏହା କୃଷକ ଏବଂ ଶ୍ରମିକଙ୍କ ସଫଳତା। ମାତ୍ର ଯେଉଁଭଳି ଏହି ଆଇନ ରଦ୍ଦ କରାଗଲା ତାହା ଦୁର୍ଭାଗ୍ୟଜନକ । ସଂସଦରେ ଏହି ବିଷୟରେ ଆଲୋଚନା ହେବାକୁ ଦିଆଗଲା ନାହିଁ । ଏହା ଦର୍ଶାଉଛି ଯେ, ସରକାର ଆଲୋଚନାକୁ ଭୟ କରୁଛନ୍ତି । ସରକାର ନିଜେ ଜାଣୁଛନ୍ତି ଯେ, ତାଙ୍କ ଦ୍ଵାରା ଭୁଲ୍ ହୋଇଛି । ଆମେ ଗୃହରେ ଆଲୋଚନା ସେହି ଲୋକଙ୍କ ବିଷୟରେ କରିବୁ ଯାହାଙ୍କ ଆନ୍ଦୋଳନରେ ପ୍ରାଣହାନୀ ଘଟିଛି । ଆମକୁ ଏହି ବିଷୟରେ ଆଲୋଚନା କରିବାର ଥିଲା ଯେ, କୃଷକଙ୍କ ବିରୋଧରେ ଆଇନ ଆଣିବା ପଛରେ କାହାର ହାତ ଥିଲା । ଏହା ବ୍ୟତୀତ ଏମଏସପି, ଲକ୍ଷ୍ମୀପୁର ଖେରୀ ଏବଂ କୃଷକଙ୍କ ଅନ୍ୟ ସମସ୍ୟା ଉପରେ ଆଲୋଚନା କରିବାର ଥିଲା। ମାତ୍ର ସରକାର ଆମକୁ ଗୃହରେ ଆଲୋଚନା କରିବାକୁ ଦେଇ ନାହାନ୍ତି । ସରକାର ଖୋଦ୍ ଦ୍ଵନ୍ଦ୍ଵରେ ଅଛନ୍ତି। ସରକାର ଭାବୁଥିଲେ ଯେ, କୃଷକ, ଗରିବ ଏବଂ ଶ୍ରମିକଙ୍କୁ ଦବା ଯାଇ ପାରିବ। ମାତ୍ର ଏମିତି ହୋଇ ପାରିବ ନାହିଁ ବୋଲି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ କହିଛନ୍ତି।