ବିଶ୍ୱ ଚାମ୍ପିୟନ ଟିମ୍ ଇଣ୍ଡିଆ ପାଇଁ ୧୨୫ କୋଟିର ପୁରସ୍କାର ରାଶି ଘୋଷଣା କଲା BCCI
Advertisement
ନୂଆଦିଲ୍ଲୀ: ଦୀର୍ଘ ୧୭ ବର୍ଷ ପରେ ଭାରତକୁ ଫେରିଛି ବିଶ୍ୱକପ ଟ୍ରଫି । ରୋହିତ ଶର୍ମାଙ୍କ ନେତୃତ୍ୱରେ ଭାରତ ଏଥର ଜିତିଛି ଟି-୨୦ ବିଶ୍ୱକପ୍ । ଶେଷ ଥର ପାଇଁ ଭାରତ ଗତ ୨୦୦୭ ମସିହାରେ ମହେନ୍ଦ୍ର ସିଂହ ଧୋନୀଙ୍କ ନେତୃତ୍ୱରେ ଟି-୨୦ରେ ଚାମ୍ପିୟନ ହୋଇଥିଲା । ବିଶ୍ୱକପର ଫାଇନାଲରେ ଦକ୍ଷିଣ ଆଫ୍ରିକାକୁ ୭ ରନରେ ପରାସ୍ତ କରିବା ପରେ ବିଶ୍ୱବିଜୟୀ ଦଳକୁ ପ୍ରଧାନମନ୍ତ୍ରୀ, ରାଷ୍ଟ୍ରପତିଙ୍କ ଠାରୁ ଆରମ୍ଭ କରି ଅଭିନେତା, ବିଜିନେସମ୍ୟାନ, ଅଗଣିତ ପ୍ରଶଂସକଙ୍କ ନିକଟରୁ ଅଭିନନ୍ଦନର ସୁଅ ଛୁଟିଛି । ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ବିଭିନ୍ନ ଟୁର୍ଣ୍ଣାମେଣ୍ଟର ଫାଇନାଲରେ ବାରମ୍ବାର ଭାରତ ପରାସ୍ତ ହୋଇ ଆସୁଥିଲା । ତେଣୁ ଚଳିତ ଟି-୨୦ ବିଶ୍ୱକପ ୨୦୨୪ରେ ବିଜୟୀ ହେବାର ଖୁସି ଶବ୍ଦରେ ବର୍ଣ୍ଣନା କରି ହେବ ନାହିଁ । ବିଜୟ ପରେ ସମସ୍ତ ଭାରତୀୟ ଖେଳାଳିଙ୍କ ଆଖିରୁ ଝରି ପଡ଼ିଥିଲା ଆନନ୍ଦର ଅଶ୍ରୁଧାର ।
ତେବେ ଏହା ମଧ୍ୟରେ ବିଶ୍ୱବିଜୟୀ ଦଳ ପାଇଁ ଆସିଛି ଏକ ବଡ଼ ଖୁସି ଖବର । ବିଶ୍ୱବିଜୟୀ ଟିମ୍ ଇଣ୍ଡିଆ ପାଇଁ ପୁରସ୍କାର ରାଶି ଘୋଷଣା କରିଛନ୍ତି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ସମ୍ପାଦକ ଜୟ ଶାହ । ଆଇସିସି ପୁରୁଷ ଟି-୨୦ ବିଶ୍ୱକପ ୨୦୨୪ର ବିଜେତା ଦଳ ପାଇଁ ୧୨୫ କୋଟି ଟଙ୍କାର ଅର୍ଥରାଶି ଘୋଷଣା କରିଛନ୍ତି ଶ୍ରୀ ଶାହ । ଏହି ଅବସରରେ ଭାରତୀୟ କ୍ରିକେଟ ଟିମର ପ୍ରତ୍ୟେକ ଖେଳାଳି, ପ୍ରଶିକ୍ଷକ ଓ ସହାୟକ ପ୍ରଶିକ୍ଷକଙ୍କର ଅତୁଳନୀୟ ପ୍ରତିଭା, ନିଷ୍ଠା, ଉଚ୍ଚକୋଟୀର ପ୍ରଦର୍ଶନକୁ ସେ ପ୍ରଶଂସା କରିଛନ୍ତି ।
I am pleased to announce prize money of INR 125 Crores for Team India for winning the ICC Men’s T20 World Cup 2024. The team has showcased exceptional talent, determination, and sportsmanship throughout the tournament. Congratulations to all the players, coaches, and support… pic.twitter.com/KINRLSexsD
— Jay Shah (@JayShah) June 30, 2024