ଜମ୍ମୁ-କଶ୍ମୀରରେ ବସ୍କୁ ଆତଙ୍କବାଦୀଙ୍କ ଆକ୍ରମଣ ବେଳର ଅନୁଭୂତି ବଖାଣିଲେ ପ୍ରତ୍ୟକ୍ଷଦର୍ଶୀ: ‘ଘାଟିକୁ ଖସିବା ପରେ ବି ଗୁଳି…’
Advertisement
ଜମ୍ମୁ-କଶ୍ମୀର: ଜମ୍ମୁ-କଶ୍ମୀରର ରିଆସିରେ ଆତଙ୍କବାଦୀ ଆକ୍ରମଣ ପରେ ଏକ ବସ୍ ଖାଲକୁ ଖସି ପଡ଼ିଛି। ବସ୍ରେ ଥିବା ସମସ୍ତ ତୀର୍ଥଯାତ୍ରୀ ଜମ୍ମୁ-କଶ୍ମୀରର ରିଆସିର ଶିବ ଖୋଦି ମନ୍ଦିରରୁ କଟ୍ରା ଯାଉଥିଲେ। ମିଳିଥିବା ସୂଚନା ଅନୁଯାୟୀ, ଆତଙ୍କବାଦୀମାନେ ବସ୍ ଉପରକୁ ଆକ୍ରମଣ କରି ଗୁଳି ଚଳାଇଥିଲେ। ଫଳରେ ଡ୍ରାଇଭର ବସ୍ ଉପରୁ ନିୟନ୍ତ୍ରଣ ହରାଇ ଖାଲକୁ ଖସିପଡ଼ିଥିଲେ। ଏହି ଘଟଣାରେ ୧୦ ଜଣଙ୍କ ମୃତ୍ୟୁ ଘଟିଥିବା ବେଳେ ୩୦ରୁ ଅଧିକ ଲୋକ ଆହତ ହୋଇଛନ୍ତି।
ସେପଟେ ବସରେ ଥିବା ପ୍ରତ୍ୟକ୍ଷଦର୍ଶୀମାନେ ଆତଙ୍କବାଦୀଙ୍କ ଗୁଳିରେ ଫସିଯିବାର ଦୁଃଖଦ ଅନୁଭୂତି ବଖାଣିଥିଲେ। ଯାତ୍ରୀମାନଙ୍କ ମଧ୍ୟରେ ଥିବା ଦିଲ୍ଲୀର ଜଣେ ବ୍ୟକ୍ତି ପ୍ରକାଶ କରିଛନ୍ତି ଯେ “ବସଟି ଘାଟିକୁ ଖସିପଡ଼ିବା ପରେ ମଧ୍ୟ ଗୁଳିବିନିମୟ ଜାରି ରହିଥିଲା, ଯାହା ପରିସ୍ଥିତିର ଆତଙ୍କ ଏବଂ ବିଶୃଙ୍ଖଳାକୁ ବଢ଼ାଇ ଦେଇଥିଲା।” ଆକ୍ରମଣ ପରେ ରିୟାସିରେ ସର୍ଚ୍ଚ ଅପରେସନ କରିବା ପାଇଁ ସେନାର ଏକ ହେଲିକପ୍ଟର ଅଣାଯାଇଥିଲା। ଆହତଙ୍କ ମଧ୍ୟରୁ କେତେକଙ୍କୁ ଜମ୍ମୁର ଜିଏମସିକୁ ସ୍ଥାନାନ୍ତର କରାଯାଇଛି।
ଘଟଣାସ୍ଥଳରେ ପୋଲିସ ଓ ଅନ୍ୟାନ୍ୟ ବାହିନୀର ଜଣେ ବରିଷ୍ଠ ଅଧିକାରୀ ପହଞ୍ଚି ସମ୍ପୃକ୍ତ ଅଞ୍ଚଳକୁ ତୁରନ୍ତ ଘେରାବନ୍ଦୀ କରିଥିଲେ। ଏହି ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ଧରିବା ପାଇଁ ଭାରତୀୟ ସେନା, ସିଆରପିଏଫ ଏବଂ ଜମ୍ମୁ-କଶ୍ମୀର ପୋଲିସ ସମେତ ସୁରକ୍ଷା ବାହିନୀ ମଧ୍ୟ ସର୍ଚ୍ଚ ଅପରେସନ ଆରମ୍ଭ କରିଥିଲେ। ସେପଟେ ଜମ୍ମୁ-କଶ୍ମୀରର ରିଆସି ଜିଲ୍ଲାରେ ତୀର୍ଥଯାତ୍ରୀଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଉପୁଜିଥିବା ସ୍ଥିତିର ସମୀକ୍ଷା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।