ଫେସବୁକରେ ୫୩ କୋଟି ୟୁଜର୍ସଙ୍କ ତଥ୍ୟ ଚୋରି, ରହିଛି ୬୦ ଲକ୍ଷ ଭାରତୀୟଙ୍କ ଆକାଉଣ୍ଟ ତଥ୍ୟ
ନୂଆଦିଲ୍ଲୀ ,୫ା୪ (ଓଡିଶା ଭାସ୍କର) ଫେସବୁକରେ ତଥ୍ୟର ଗୋପନୀୟତା ରକ୍ଷା ନେଇ ସବୁବେଳେ ପ୍ରଶ୍ନ ଉଠିଥିବାବେଳେ ଏବେ ପୁଣି ଫେସବୁକରୁ ତଥ୍ୟ ଚୋରି ର ଅଭିଯୋଗ ଆସିଛି । ସୂଚନା ଅନୁଯାୟୀ ଫେସବୁକରୁ ପ୍ରାୟ ୫୩ କୋଟି ୟୁଜର୍ସଙ୍କ ତଥ୍ୟ ଚୋରି ହୋଇଛି। ୧୦୬ ଦେଶର ୟୁଜର୍ସଙ୍କ ତଥ୍ୟ ଚୋରି ହୋଇଥିବାବେଳେ ସେଥିମଧ୍ୟରୁ ୬୦ ଲକ୍ଷ ଭାରତୀୟଙ୍କ ଆକାଉଣ୍ଟରୁ ତଥ୍ୟ ଚୋରି ହୋଇଥିବା ସୂଚନା ମିଳିଛି ।
ସୁରକ୍ଷା ଗବେଷକ ଆଲନ ଗଲଙ୍କ ସୂଚନା ଅନୁଯାୟୀ ଏହା ଏକ ବଡ ଧରଣର ତଥ୍ୟ ଚୋରି । ଇନସାଇଡରର ସୂଚନା ଅନୁଯାୟୀ ଏହି ତଥ୍ୟରେ କେବଳ ଆମେରିକାର ପ୍ରାୟ ୩ କୋଟି ଫେସବୁକ ବ୍ୟବହାରୀଙ୍କ ତଥ୍ୟ ଲିକ୍ ହୋଇଛି, ସେହିଭଳି ବ୍ରିଟେନର ୧ କୋଟି ଫେସବୁକ ବ୍ୟବହାରକାରୀଙ୍କ ତଥ୍ୟ ଲିକ୍ ହୋଇଛି । ଏହି ତଥ୍ୟ ଇଣ୍ଟରନେଟରେ ମାଗଣାରେ ଉପଲବ୍ଧ ହେଉଛି । କେହିବି ହ୍ୟାକର ସହଜରେ ଏହି ତଥ୍ୟର ଅପବ୍ୟବହାର କରିପାରେ ।
ଲିକ୍ ହୋଇଥିବା ତଥ୍ୟ ମଧ୍ୟରେ ବ୍ୟବହାରକାରୀଙ୍କ ଫୋନ ନମ୍ବର , ଫେସବୁକ ଆଇଡି, ବ୍ୟବହାରକାରୀଙ୍କ ପୁରା ନାମ, ଜନ୍ମ ତାରିଖ, ଇ-ମେଲ ଆଇଡି ଭଳି ଗୁରୁତ୍ୱପୂର୍ଣ୍ଣ ତଥ୍ୟ ରହିଥିବା ସୂଚନା ମିଳିଛି ।
ଫେସବୁକର କହିବା ଅନୁଯାୟୀ ଏହି ତଥ୍ୟ ୨୦୧୯ ରେ ଏକ ସୁରକ୍ଷା ତ୍ରୁଟି ଯୋଗୁଁ ଲିକ୍ ହୋଇଥିଲା ଯାହାକୁ ସେହି ବର୍ଷ ଅଗଷ୍ଟ ମାସରେ ହିଁ ଠିକ୍ କରାଯାଇଥିଲା ।
