ଭୋଜପୁରୀ ଗାୟିକା ନିଶା ଉପାଧ୍ୟାୟଙ୍କ ଉପରକୁ ଗୁଳିମାଡ଼: ଶରୀରରେ ବାଜିଛି ଗୋଟିଏ ଗୁଳି
ନୂଆଦିଲ୍ଲୀ: ମନୋରଞ୍ଜନ ଧର୍ମୀ ଦୁନିଆରୁ ଆସିଛି ଏକ ବଡ଼ ଖବର । ଲାଇଭ୍ ଶୋ’ ଅବସରରେ ଜଣେ ସେଲିବ୍ରେଟିଙ୍କ ଉପରକୁ ଗୁଳିମାଡ଼ କରାଯାଇଛି । ଏକ କନସର୍ଟ ଚାଲିଥିବା ସମୟରେ ଭୋଜପୁରୀ ଇଣ୍ଡଷ୍ଟ୍ରିର ଜଣାଶୁଣା ଗାୟିକା ନିଶା ଉପାଧ୍ୟାୟଙ୍କ ଉପରେ ହର୍ଷ ଫାୟାରିଂ କରାଯାଇଛି । ଫଳରେ ଘଟଣାସ୍ଥଳରେ ନିଶା ଆହତ ହେବା ସହ ତାଙ୍କର ଅପରେସନ କରାଯାଇଥିବା ଜଣାପଡ଼ିଛି ।
ସୂଚନା ମୁତାବକ, ବିହାରର ପାଟନାରେ ଏହି ଘଟଣା ଘଟିଛି । ନିଶା ଏକ କାର୍ଯ୍ୟକ୍ରମରେ ଯୋଗଦେବା ପାଇଁ ଛପରା ଆସିଥିଲେ । ଏହି ଅବସରରେ ସ୍ଥାନୀୟ ଲୋକମାନେ ତାଙ୍କ ଉପରକୁ ହର୍ଷ ଫାୟାରିଂ କରିଦେଇଥିଲେ । ଏହି ସମୟରେ ନିଶାଙ୍କ ପାଦରେ ଗୁଳି ବାଜିଥିଲା ଓ ଗାୟିକାଙ୍କ ଅବସ୍ଥା ଗମ୍ଭୀର ଆଡ଼କୁ ଗତି କରିଥିଲା । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ହଡ଼କମ୍ପ ମଚି ଯାଇଥିଲା । ଜନତା ବଜାର ଥାନା ଅଞ୍ଚଳରେ ଏହି ଘଟଣା ଘଟିଥିଲା ।
ଜନତା ବଜାର ଥାନା ଅନ୍ତର୍ଗତ ସେନ୍ଦୁଆର ଗ୍ରାମରେ ଏକ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏହି ଅବସରେ ନିଶା ଯୋଗ ଦେବାର ଥିଲା । ନିଶା ଆସିବା ପରେ କାର୍ଯ୍ୟକ୍ରମ ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା । ମାତ୍ର ଏହି ସମୟରେ କିଛି ବ୍ୟକ୍ତି ହର୍ଷ ଫାୟାରିଂ ଆରମ୍ଭ କରିଦେଇଥିଲେ । ଫଳରେ ଗୁଳି ନିଶାଙ୍କ ପାଦରେ ବାଜିଥିଲା ଓ ସେ ଆହତ ହୋଇଥିଲେ । ଏହାପରେ ଗମ୍ଭୀର ଅବସ୍ଥାରେ ତାଙ୍କୁ ପାଟନା ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଅପରେସନ କରାଯାଇ ନିଶାଙ୍କ ପାଦରୁ ଗୁଳି ବାହାର କରାଯାଇଥିଲା । ଅନ୍ୟପକ୍ଷରେ ଫାୟାରିଂ କରିଥିବା ଅଭିଯୁକ୍ତ ଫେରାର ହୋଇଯାଇଥିବା ଜଣାପଡ଼ିଛି ।
