ସରକାରଙ୍କ ନୂଆ ଯୋଜନା… ବାର୍ଦ୍ଧକ୍ୟ ଅବସ୍ଥାରେ ମିଳିବ ୫ ଲକ୍ଷ ପର୍ଯ୍ୟନ୍ତ ମାଗଣା ଚିକିତ୍ସା
ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାରେ ଏକ ବଡ଼ ପରିବର୍ତ୍ତନ ହୋଇଛି । ଏଣିକି ପରିଣତ ବୟସରେ ମଧ୍ୟ ମାଗଣା ଚିକିତ୍ସା ଯୋଗାଇ ଦେବେ ସରକାର । ପରିବାରରେ ୭୦ ବା ତା’ଠାରୁ ଅଧିକ ବୟସର ସଦସ୍ୟମାନଙ୍କୁ ଆୟୁଷ୍ମାନ ଯୋଜନାରେ ସାମିଲ କରାଯାଇ ପାରିବ । ଏହାଦ୍ୱାରା ସେମାନଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସେବା ଯୋଗାଇ ଦେବେ କେନ୍ଦ୍ର ସରକାର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ରୀୟ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହି ନିଷ୍ପତ୍ତି ପରେ ୧୨.୩ କୋଟି ପରିବାରଙ୍କୁ ସୁବିଧା ମିଳିପାରିବ । ଏହି ଯୋଜନାରେ ସାଢେ ୬ କୋଟି ବୟସ୍କ ସଦସ୍ୟଙ୍କୁ ଚିକିତ୍ସା ଯୋଗାଇ ଦିଆଯାଇ ପାରିବ । ଆୟୁଷ୍ମାନ ଭାରତ ଯୋଜନାରେ ବାର୍ଷିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ବୀମା ଯୋଗାଇ ଦେବେ ସରକାର ।
Ayushman Bharat: PM-JAY ଯୋଜନାରେ ପରିବାରରେ ପରିଣତ ବୟସ ସଦସ୍ୟମାନଙ୍କୁ ସାମିଲ କରାଯାଇଛି । ଏଥିପାଇଁ କ୍ୟାବିନେଟ ବୈଠକରେ ୩,୪୩୭ କୋଟି ଟଙ୍କା ଅନୁମୋଦନ କରିଛନ୍ତି କେନ୍ଦ୍ର ସରକାର । ସର୍ବଭାରତୀୟ ସ୍ତରରେ ପରିବାରର ବୟସ୍କ (୭୦ ବର୍ଷ ବା ତଦୁର୍ଦ୍ଧ) ସଦସ୍ୟମାନଙ୍କୁ ମାଗଣା ଚିକିତ୍ସା ଯୋଗାଇ ଦେବା ପାଇଁ ଲକ୍ଷ୍ୟ ରଖାଯାଇଛି । ଏହି ଯୋଜନାରେ ପ୍ରାୟ ୪.୫ କୋଟି ପରିବାରର ୬ କୋଟି ବୟସ୍କ ସଦସ୍ୟଙ୍କୁ ଫାଇଦା ମିଳିପାରିବ । କ୍ୟାବିନେଟ ବୈଠକ ପରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଏ ନେଇ ସୂଚନା ଦେଇଛନ୍ତି । ଏହି ଯୋଜନା ଅନୁସାରେ, ପ୍ରତ୍ୟେକ ପରିବାରକୁ ବାର୍ଷିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ଅତିରିକ୍ତ ଟପ୍ ଅପ୍ ପାଇପାରିବେ । ତେବେ ଆୟୁଷ୍ମାନ କାର୍ଡରେ ପୂର୍ବରୁ ଥିବା ୫ ଲକ୍ଷ ଟଙ୍କା କଭର୍ ହୋଇ ନଥିଲେ ଏହି ଟଙ୍କା ସେୟାର କଭରେଜ୍ ଆକାରରେ ମିଳିପାରିବ ।
Hydropower Boost: ଅକ୍ଷୟ ଶକ୍ତି କ୍ଷେତ୍ରରେ, ୨୦୩୦ ସୁଦ୍ଧା ୫୦୦ GW ନବୀକରଣ ଯୋଗ୍ୟ ଶକ୍ତି ଭିତ୍ତିଭୂମି ବୃଦ୍ଧି ପାଇଁ ୧୨,୪୬୧ କୋଟି ଟଙ୍କା ଅନୁମୋଦନ କରିଛନ୍ତି କେନ୍ଦ୍ର ସରକାର । ଏହାସହିତ ୩୧,୩୫୦ ମେଗାୱାଟ କ୍ଷମତା ବିଶିଷ୍ଟ ହାଇଡ୍ରୋପାୱାର ଯୋଜନା ପାଇଁ ମଧ୍ୟ କ୍ୟାବିନେଟ ତରଫରୁ ଗ୍ରୀନ ସିଗନାଲ ମିଳିଛି। ଏହି ଯୋଜନାରେ ସଡ଼କ, ବ୍ରିଜ୍, ଟ୍ରାନ୍ସମିସନ ଲାଇନ ଏବଂ ଯୋଗାଯୋଗ ସୁବିଧା ଭଳି ଅତ୍ୟାବଶ୍ୟକ ଭିତ୍ତିଭୂମି ବିକାଶ ଉପରେ ଗୁରୁତ୍ୱ ଦିଆଯାଇଛି। ଏହା ୧୩୩ GW ର ଜଳ ବିଦ୍ୟୁତ୍ ଶକ୍ତି ବିକାଶ ଉପରେ ଫୋକସ୍ କରିଥିବା ବେଳେ ପ୍ରକଳ୍ପଗୁଡିକ ପାଇଁ ଆର୍ଥିକ ସହାୟତା ଉପରେ ମଧ୍ୟ ଗୁରୁତ୍ୱ ଦିଆଯାଇଛି । ୨୦୦ ମେଗାୱାଟ ପର୍ୟ୍ୟନ୍ତ ପ୍ରକଳ୍ପ ପାଇଁ ମେଗାୱାଟ ପିଛା ୧ କୋଟି ଟଙ୍କା ଧାର୍ଯ୍ୟ ହୋଇଥିବା ବେଳେ ଏବଂ ୨୦୦ ମେଗାୱାଟରୁ ଅଧିକ ବା ବୃହତ ପ୍ରକଳ୍ପଗୁଡିକ ମେଗାୱାଟ ପିଛା ୦.୭୫ କୋଟି ଟଙ୍କା ଧାର୍ଯ୍ୟ ହୋଇଛି ।
PM E-Drive Scheme: ଏହି କ୍ୟାବିନେଟ ବୈଠକରେ ପିଏମ ଇ-ଡ୍ରାଇଭ ଯୋଜନାକୁ ମଧ୍ୟ ମଞ୍ଜୁରୀ ମିଳିଛି । ଏହି ଯୋଜନା ପାଇଁ ୧୦,୯୦୦ କୋଟି ବ୍ୟବରାଦ କରାଯାଇଛି । ଯାହାକି ଏହାର FAME ୧ ଏବଂ ୨ ଯୋଜନା ମାଧ୍ୟମରେ ବୈଦ୍ୟୁତିକ ଯାନ (EV) ଗ୍ରହଣକୁ ସମର୍ଥନ କରେ । FAME ଯୋଜନାଗୁଡିକ ଦୁଇ ଚକିଆ ଯାନ, ତିନି ଚକିଆ ଯାନ, ଆମ୍ବୁଲାନ୍ସ ଏବଂ ଟ୍ରକ୍ ସମେତ ୧୬ ଲକ୍ଷରୁ ଅଧିକ EVM ସୁବିଧା କରିସାରିଛି। ଏହି ପଦକ୍ଷେପରେ ୧୪,୦୨୮ ଇ-ବସ୍ ପାଇଁ ୧୦,୦୦୦ କିଲୋୱାଟ ପ୍ରତି ୧୦,୦୦୦ ଟଙ୍କା ସହାୟତା ରହିଛି ଏବଂ ପୂର୍ଣ୍ଣ ସମର୍ଥନ ସହିତ ୮୮,୫୦୦ ଚାର୍ଜିଂ ସାଇଟ୍ ପ୍ରତିଷ୍ଠା କରିବାକୁ ଲକ୍ଷ୍ୟ ରଖାଯାଇଛି ।
PMGSY-IV to Boost Rural Connectivity: କେନ୍ଦ୍ର କ୍ୟାବିନେଟ୍ ୨୦୨୪-୨୫ ରୁ ୨୦୨୮-୨୯ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା-୪ (PMGSY-IV) ର କାର୍ଯ୍ୟକାରିତାକୁ ଅନୁମୋଦନ କରିଛି, ଯେଉଁଥିରେ ମୋଟ ୭୦,୧୨୫ କୋଟି ଟଙ୍କା ଅନୁମୋଦନ ରହିଛି। ଏହି ଯୋଜନାରେ ୬୨,୫୦୦ କିଲୋମିଟର ରାସ୍ତା ନିର୍ମାଣ, ୨୫,୦୦୦ ସଂଯୋଗ ହୋଇନଥିବା ବାସସ୍ଥାନକୁ ସଂଯୋଗ କରିବା ଏବଂ ନୂତନ ସଂଯୋଗ ରାସ୍ତାରେ ବ୍ରିଜ୍ ନବୀକରଣ କରିବାକୁ ଲକ୍ଷ୍ୟ ରଖାଯାଇଛି।
Misson Mausam: ପାଣିପାଗକୁ ଭଲ ଭାବରେ ଟ୍ରାକ କରିବା ପାଇଁ କେନ୍ଦ୍ର କ୍ୟାବିନେଟ୍ ‘ମିଶନ୍ ମୌସମ’ କୁ ଅନୁମୋଦନ କରିବା ସହ ଦୁଇ ବର୍ଷ ପାଇଁ ୨,୦୦୦ କୋଟି ଟଙ୍କାର ମଞ୍ଜୁରୀ ଦେଇଛନ୍ତି । ପୃଥିବୀ ବିଜ୍ଞାନ ମନ୍ତ୍ରଣାଳୟର ୩ ଟି ଅନୁଷ୍ଠାନ ଭାରତ ପାଣିପାଗ ବିଭାଗ, ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟ୍ରପିକାଲ୍ ମେଟେରୋଲୋଜି ଏବଂ ମିଡୟମ-ରେଞ୍ଜ ୱେଦର ଫୋରକାଷ୍ଟିଙ୍ଗ ଦ୍ୱାରା ଏହି ମିଶନ କାର୍ଯ୍ୟକାରୀ ହେବ ।