ସାମିଲ ଅଛନ୍ତି କି ଶାକିବ ଅଲ୍ ହାସନ୍? ହତ୍ୟା ମାମଲାରେ ଫସିଲେ ବାଂଲାଦେଶର ଷ୍ଟାର ଅଲରାଉଣ୍ଡର

ଢାକା: ବାଂଲାଦେଶର ପୂର୍ବତନ ଅଧିନାୟକ ତଥା ଷ୍ଟାର ଅଲରାଉଣ୍ଡର ଶାକିବ ଅଲ ହାସନ ପୁଣିଥରେ ବିବାଦ ଘେରକୁ ଆସିଛନ୍ତି । ଶାକିବଙ୍କ ବିରୋଧରେ ବାଂଲାଦେଶରେ ହତ୍ୟା ମାମଲା ରୁଜୁ ହୋଇଛି । ରିପୋର୍ଟ ଅନୁଯାୟୀ, ଏକ ପୋଷାକ ଦୋକାନରେ କାମ କରୁଥିବା ରୁବେଲ ନାମକ ଜଣେ ବ୍ୟକ୍ତିଙ୍କୁ ହତ୍ୟା କରିଥିବା ନେଇ ଶାକିବଙ୍କ ବିରୋଧରେ ଅଭିଯୋଗ ହୋଇଛି । ଏହି ମାମଲାରେ କେବଳ ଶାକିବ ନୁହଁନ୍ତି, ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ସମେତ ୫୦୦ ଜଣଙ୍କ ବିରୋଧରେ ମାମଲା ରୁଜୁ କରାଯାଇଛି । ମୃତ ରୁବେଲଙ୍କ ପିତା ରଫିକ ଇସଲାମ ସ୍ଥାନୀୟ ଆଡବୋର ପୋଲିସ ଷ୍ଟେସନରେ ଶାକିବ ଅଲ ହାସନଙ୍କ ବିରୋଧରେ ହତ୍ୟା ମାମଲା ଦାୟର କରିଛନ୍ତି ।

ଏହି ମାମଲାରେ ଅଭିନେତା ଫିର୍ଦ୍ଦୋଷ ଅହମ୍ମଦଙ୍କ ବିରୋଧରେ ମଧ୍ୟ ମାମଲା ରୁଜୁ ହୋଇଛି । ଉଭୟେ ଶେଖ ହସିନାଙ୍କ ପାର୍ଟି ଆୱାମୀ ଲିଗ୍ ସାଂସଦ ମଧ୍ୟ ଅଟନ୍ତି । ଏହି ମାମଲାରେ ଫିର୍ଦ୍ଦୋଷ ୫୫ ତମ ଅଭିଯୁକ୍ତ ହୋଇଥିବାବେଳେ ଶାକିବ ହେଉଛନ୍ତି ୨୮ ତମ ଅଭିଯୁକ୍ତ । ଅନ୍ୟ ଅଭିଯୁକ୍ତଙ୍କ ମଧ୍ୟରେ ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା, ଓବାଇଡୁଲ କ୍ୱାଡର ଏବଂ ୧୫୪ ଜଣ ଅଛନ୍ତି । ପ୍ରାୟ ୪୦୦- ୫୦୦ ଅଜ୍ଞାତ ବ୍ୟକ୍ତି ମଧ୍ୟ ଅଭିଯୋଗ କରିଛନ୍ତି । ମାମଲା ଅନୁଯାୟୀ, ଅଗଷ୍ଟ ୨୫ ରେ ରୁବେଲ ଆଡବୋରର ରିଙ୍ଗ ରୋଡରେ ଏକ ବିକ୍ଷୋଭ ପ୍ରଦର୍ଶନ କରିଥିଲେ । ଏହି ରାଲିରେ କେହି ଜଣେ ଯୋଜନାବଦ୍ଧ ଅପରାଧିକ ଷଡଯନ୍ତ୍ରର ଅଂଶ ଭାବରେ ଜନତାଙ୍କ ଉପରକୁ ଗୁଳି ଚଳାଇଥିବାର ଅଭିଯୋଗ ହୋଇଥିଲା, ଯାହାଫଳରେ ରୁବେଲଙ୍କ ଛାତି ଓ ପେଟରେ ଗୁଳି ବାଜିଥିଲା । ଏହା ପରେ ତାଙ୍କୁ ଡାକ୍ତରଖାନା ନିଆଯାଇଥିଲା । ଯେଉଁଠାରେ ସେ ଅଗଷ୍ଟ ୭ ରେ ଚିକିତ୍ସା ସମୟରେ ମୃତ୍ୟୁବରଣ କରିଛନ୍ତି ।

ଶାକିବ ଅଲ ହାସନ ଚଳିତ ବର୍ଷ ଜାନୁଆରୀରେ ଆୱାମୀ ଲିଗ୍ ଟିକେଟରେ ସାଂସଦ ଭାବରେ ନିର୍ବାଚିତ ହୋଇଥିଲେ । ବର୍ତ୍ତମାନ ସେ ପାକିସ୍ତାନରେ ଟେଷ୍ଟ ସିରିଜ୍ ଖେଳୁଛନ୍ତି । ଶାକିବ ତାଙ୍କ କାର୍ୟ୍ୟକଳାପ ଯୋଗୁଁ ବିବାଦ ସୃଷ୍ଟି କରିସାରିଛନ୍ତି । ସେ ଅନେକ ଥର ଅମ୍ପାୟାରଙ୍କ ସହ ଅସଦାଚରଣ କରିଥିଲେ ଏବଂ ପ୍ରଶଂସକଙ୍କ ସହ ତାଙ୍କର ଅସଦାଚରଣର ଭିଡିଓ ମଧ୍ୟ ଭାଇରାଲ ହୋଇଛି । ଶାକିବ ବର୍ତ୍ତମାନ ବାଂଲାଦେଶ ଦଳ ସହ ପାକିସ୍ତାନରେ ଅଛନ୍ତି ଏବଂ ରାୱଲପିଣ୍ଡି ଟେଷ୍ଟରେ ଦଳରେ ସାମିଲ ରହିଛନ୍ତି । ସେ ପ୍ରଥମ ଇନିଂସରେ ୨୭ ଓଭର ବୋଲିଂ କରି ଗୋଟିଏ ୱିକେଟ୍ ନେଇଥିଲେ ।