ମଙ୍କିପକ୍ସ ବିପଦ ପାଇଁ ଭାରତ ପ୍ରସ୍ତୁତ; ହସ୍ପିଟାଲ ଓ ବିମାନବନ୍ଦରକୁ କରାଗଲା ସତର୍କ

ନୂଆଦିଲ୍ଲୀ: ସ୍ୱାସ୍ଥ୍ୟ ମନ୍ତ୍ରଣାଳୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମଙ୍କିପକ୍ସକୁ ବିଶ୍ୱ ଜନସ୍ୱାସ୍ଥ୍ୟ ଜରୁରୀକାଳୀନ ଘୋଷଣା କରାଯିବା ପରେ ସରକାର ଜରୁରୀକାଳୀନ ୱାର୍ଡ ପ୍ରସ୍ତୁତି ଏବଂ ବିମାନବନ୍ଦରକୁ ସତର୍କ କରିବା ସମେତ ସତର୍କତାମୂଳକ ପଦକ୍ଷେପ ନେଇଛନ୍ତି । ମିଳିଥିବା ସୂଚନା ଅନୁଯାୟୀ, ଦାଗ ଥିବା ରୋଗୀଙ୍କୁ ଚିହ୍ନଟ କରି ଆଇସୋଲେସନ୍ ୱାର୍ଡ ପ୍ରସ୍ତୁତ କରିବାକୁ ସରକାର ହସ୍ପିଟାଲଗୁଡ଼ିକୁ ନିର୍ଦ୍ଦେଶ ଦେଇଛନ୍ତି । ଦିଲ୍ଲୀର ତିନୋଟି ନୋଡାଲ ହସ୍ପିଟାଲ ସଫଦରଜଙ୍ଗ, ଲେଡି ହାର୍ଡିଂ ମେଡିକାଲ କଲେଜ ଏବଂ ରାମ ମନୋହର ଲୋହିଆ ହସ୍ପିଟାଲକୁ ଏଥିପାଇଁ ଚିହ୍ନଟ କରାଯାଇଛି ।

ସନ୍ଦିଗ୍ଧ ରୋଗୀଙ୍କ ଆରଟି-ପିସିଆର ଓ ନାକର ସ୍ୱାବ୍ ଟେଷ୍ଟ୍ କରାଯିବ । ଆବଶ୍ୟକ ସତର୍କତା ଅବଲମ୍ବନ କରିବାକୁ ବିମାନବନ୍ଦରଗୁଡ଼ିକୁ ମଧ୍ୟ ସତର୍କ କରାଯାଇଛି । ନିକଟରେ ବିଶ୍ୱ ସ୍ୱାସ୍ଥ୍ୟ ସଂଗଠନ ୨ ବର୍ଷ ମଧ୍ୟରେ ଦ୍ୱିତୀୟ ଥର ପାଇଁ ମଙ୍କିପକ୍ସକୁ ବିଶ୍ୱ ଜନସ୍ୱାସ୍ଥ୍ୟ ଜରୁରୀକାଳୀନ ପରିସ୍ଥିତି ଘୋଷଣା କରିଛି । ଭୂତାଣୁର ଏକ ନୂଆ ଷ୍ଟ୍ରେନ୍ ଏହାର ଶକ୍ତି ବୃଦ୍ଧି କରିଛି, ଯାହା ଯୌନ ସମ୍ପର୍କ ସମେତ ନିୟମିତ ଘନିଷ୍ଠ ସଂସ୍ପର୍ଶ ମାଧ୍ୟମରେ ଅଧିକ ସହଜରେ ବ୍ୟାପିଥାଏ । ଭାରତରେ ଏପର୍ଯ୍ୟନ୍ତ ମଙ୍କିପକ୍ସର କୌଣସି ମାମଲା ସାମ୍ନାକୁ ଆସିନାହିଁ । ତେବେ ଅଗଷ୍ଟ ୧୬ ତାରିଖରେ ୟୁଏଇରୁ ଆସିଥିବା ୩ ଜଣ ରୋଗୀଙ୍କୁ ଠାବ କରିଥିଲା ପାକିସ୍ତାନ । ଏହା ପୂର୍ବରୁ ସ୍ୱିଡେନ ଆଫ୍ରିକା ବାହାରେ ମଙ୍କିପକ୍ସର ପ୍ରଥମ ମାମଲାକୁ ନିଶ୍ଚିତ କରିଥିଲା ।