video : ଚଳନ୍ତା ଟ୍ରେନରୁ ବାହାରିଲା ଧୂଆଁ, ଭୟରେ ଟ୍ରେନରୁ ଓହ୍ଲାଇଲେ ଯାତ୍ରୀ

ବ୍ରହ୍ମପୁର : ରାଜ୍ୟରେ ବଢିବାରେ ଲାଗିଛି ଟ୍ରେନ ଦୁର୍ଘଟଣା । ବାହାନଗା ଟ୍ରେନ ଦୁର୍ଘଟଣା ଦୃଶ୍ୟ ଏବେବି ଲୋକଙ୍କ ମନରୁ ଲିଭି ନାହିଁ । ଏହା ପରେ ପରେ କୌଣସି ନା କୌଣସି ସ୍ଥାନରେ ଟ୍ରେନ ଦୁର୍ଘଟଣାର ଖବର ସାମ୍ନାକୁ ଆସୁଛି । ଏଭଳି ପୁଣି ଆଜି ଗଞ୍ଜାମରେ ଘଟିଛି ଏକ ରେଳ ଦୁର୍ଘଟଣା । ବ୍ରହ୍ମପୁର ରେଲୱେ ଷ୍ଟେସନ ନିକଟରେ ଏକ ଏକ୍ସପ୍ରେସରୁ ଧୂଆଁ ବାହାରିଥିବା ଦେଖିବାକୁ ମିଳିଛି ।

ସୂଚନା ଅନୁଯାୟୀ, ବ୍ରହ୍ମପୁର ରେଲୱେ ଷ୍ଟେସନ ନିକଟରେ ଦିବ୍ରୁଗଡ-କନ୍ୟାକୁମାରୀ ବିବେକ ଏକ୍ସପ୍ରେସରେ ଘଟିଥିଲା ଅଘଟଣ । ଚଳାନ୍ତା ଟ୍ରେନରୁ ବାହାରିଥିଲା ଧୂଆଁ । କୁହାଯାଇଛି ଯେ, ଟ୍ରେନର ଚକା ଜାମ ଥିବାରୁ ଧୂଆଁ ବାହାରି ଥିଲା । ଏନେଇ ଭୟଭୀତ ହୋଇ ଶହ ଶହ ଯାତ୍ରୀ ଟ୍ରେନରୁ ତଳକୁ ଓହ୍ଲାଇ ପଡିଥିଲେ । ଧୂଆଁ ସାଧାରଣ ବଗିରୁ ବାହାରି ଥିବାର ଜଣାପଡିଛି । ସେଠାରେ ପ୍ରାୟ ୩୦ ମିନିଟ୍ ପର୍ଯ୍ୟନ୍ତ ଟ୍ରେନ ଅଟକିବା ପରେ, ଏହି ସମସ୍ୟାର ସମାଧାନ ହୋଇଥିଲା ।

ଏହି ଦୁର୍ଘଟଣାରେ କୌଣସି ଯାତ୍ରୀଙ୍କୁ କିଛି କ୍ଷତି ହୋଇନାହିଁ । ପରବର୍ତ୍ତୀ ସମୟରେ ବ୍ରହ୍ମପୁର ଷ୍ଟେସନ ପାଖରେ ଟ୍ରେନକୁ ଅଟକାଇ ମରାମତି କରା ଯାଇଥିଲା । ଚକା ଜାମର ମରାମତି କରି ସାରିବା ପରେ ଟ୍ରେନଟି ପୁଣି ଯାତ୍ରା ଆରମ୍ଭ କରିଥିବା ଖବର ମିଳିଛି ।