ଛାତ୍ରଙ୍କୁ ମିଳିଲା ୩୦ କୋଟିର ସ୍କଲାରସିପ୍, ଆଡମିଶନ ପାଇଁ କଲେଜ ଲଗାଇଲେ ଧାଡ଼ି
ଜଣେ ୧୮ ବର୍ଷର ଛାତ୍ରଙ୍କୁ ମିଳିଛି ୩୦ କୋଟିର ସ୍କଲାରସିପ । ଛାତ୍ର ଜଣକ ୨୭ ଟି କଲେଜରେ ଆଡମିଶନ ପାଇଁ ଆବେଦନ କରିଥିଲେ ଏବଂ ସୌଭାଗ୍ୟ ବଶତଃ ସବୁଠି ମନୋନୀତ ହୋଇଥିଲେ । ସେ ଛାତ୍ରବୃତ୍ତି ଆକାରରେ ବିଭିନ୍ନ କଲେଜରୁ ମୋଟ ୩୦ କୋଟିରୁ ଅଧିକ ଟଙ୍କା ସ୍କଲାରସିପରେ ଜିତିଛନ୍ତି । ତଥାପି, ଏହି ଛାତ୍ର ଜଣକ କେଉଁ କଲେଜରେ ଆଡମିଶନ ନେବେ ତାହା ସ୍ଥିର କରିନାହାଁନ୍ତି । ସେ ବର୍ତ୍ତମାନ ଏକ ଡିପ୍ଲୋମା କୋର୍ସକୁ ସମାପ୍ତ କରିବାକୁ ଯାଉଛନ୍ତି ।
ସିବିଏସ୍ ମିଆମି ରିପୋର୍ଟ ଅନୁଯାୟୀ, ଆମେରିକାର ଫ୍ଲୋରିଡାଠାରେ ରହୁଥିବା ଏହି ଛାତ୍ରଙ୍କ ନାମ ଜୋନାଥନ୍ ୱାକର୍। ବିଜ୍ଞାନ ଏବଂ କ୍ରୀଡା ପ୍ରତି ଜୋନାଥନଙ୍କର ବହୁତ ଆଗ୍ରହ ରହିଛି । ସେ ମଧ୍ୟ ତାଙ୍କ କଲେଜ ଫୁଟବଲ ଦଳର ଜଣେ ସଦସ୍ୟ ଅଟନ୍ତି । ଜୋନାଥନ୍ ନିକଟରେ ତାଙ୍କ ୟୁଟ୍ୟୁବ୍ ଚ୍ୟାନେଲରେ ତିଆରି ଏକ ଉପକରଣ ପ୍ରଦର୍ଶନ କରିଥିଲେ ।
୨୭ ଟି କଲେଜରେ ଆଡମିଶନ ଏବଂ ୩୦ କୋଟି ଟଙ୍କାର ଛାତ୍ରବୃତ୍ତି ପାଇଁ ମନୋନୀତ ହେବା ପ୍ରସଙ୍ଗରେ ଜୋନାଥନ କହିଛନ୍ତି ଯେ ସେହି ସମୟରେ ମୁଁ ବହୁତ ଆଶ୍ଚର୍ଯ ହୋଇଥିଲି ଯେ ଜୋନାଥନଙ୍କୁ ମନୋନୀତ କରିଥିବା କଲେଜ ଏବଂ ବିଶ୍ୱବିଦ୍ୟାଳୟ ମାନେ ମୋ ପ୍ରତି ଏତେ ଆଗ୍ରହ ଦେଖାଉଥିଲେ।
ଏଥିରେ ହାର୍ଭାର୍ଡ, ମାସାଚୁସେଟ୍ସ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଏମଆଇଟି), ଜନ୍ ହପକିନ୍ସ, ୟେଲ ଏବଂ ପେନସିଲଭାନିଆ ବିଶ୍ୱବିଦ୍ୟାଳୟ ଭଳି ସମ୍ମାନଜନକ ଅନୁଷ୍ଠାନ ମଧ୍ୟ ଅନ୍ତର୍ଭୁକ୍ତ । ତେବେ ଜୋନାଥନ୍ ୱାକର୍ କେଉଁ ଅନୁଷ୍ଠାନରେ ଆଡମିଶନ ଗ୍ରହଣ କରିବେ ତାହା ଏପର୍ଯ୍ୟନ୍ତ ସ୍ଥିର କରିନାହାଁନ୍ତି।
ଜୋନାଥନଙ୍କ ବର୍ତ୍ତମାନର ସ୍କୁଲର ଶିକ୍ଷକମାନେ, ତାଙ୍କୁ ଜଣେ ପରିଶ୍ରମୀ ଏବଂ ତାଙ୍କର ଭବିଷ୍ୟତ ଉଜ୍ଜ୍ୱଳ ଛାତ୍ର ବୋଲି କହିଛନ୍ତି । ଜୋନାଥନ୍ ଇଲେକ୍ଟ୍ରିକାଲ୍ ଇଞ୍ଜିନିୟରିଂ ଏବଂ ବାୟୋମେଟିକାଲ୍ ଇଞ୍ଜିନିୟରିଂରେ ପଢିବାକୁ ଯୋଜନା କରୁଛନ୍ତି । ତାଙ୍କର ଉଦ୍ଦେଶ୍ୟ ହେଉଛି ଏପରି ଏକ ଉପକରଣ ତିଆରି କରିବା, ଯାହା ଭିନ୍ନକ୍ଷମ ଏବଂ ସାଧାରଣ ସୁବିଧାରୁ ବଞ୍ଚିତ ଲୋକଙ୍କୁ ସାହାଯ୍ୟ କରିପାରିବ । ବର୍ତ୍ତମାନ ଜୋନାଥନ୍ ଏକ ଡିଭାଇସ୍ ବିକଶିତ କରିଛନ୍ତି ଯାହା ଅନ୍ଧ ଏବଂ ଶ୍ରବଣ ଦୁର୍ବଳ ଲୋକଙ୍କୁ ସାହାଯ୍ୟ କରେ । ଏହା ବର୍ତ୍ତମାନ ପ୍ରାରମ୍ଭିକ ପ୍ରକ୍ରିୟାରେ ଅଛି ।
