ମୋତେ ମୋଟା କହିବ, ତୁମର ଏତେ ସାହସ, ଏବେ ଗୁଳିମାଡ଼ ସମ୍ଭାଳ

ଉତ୍ତରପ୍ରଦେଶ:  ଆପଣମାନେ ମୋଟୁ ପତଲୁ କାର୍ଟୁନ ଦେଖିଥିବେ। ଏପରିକି ଆପଣଙ୍କ ଆଖ ପାଖରେ ଅନେକ ମୋଟା ଲୋକଙ୍କୁ ଦେଖିଥିବେ। ଯେଉଁମାନେ କି ପ୍ରକୃତରେ ମୋଟା ହେଲେ ତାଙ୍କୁ ମୋଟା କହିଲେ ସେମାନେ ରାଗିଯାଆନ୍ତି। ଏବେ ଠିକ୍ ସେହିପରି ଏକ ଘଟଣା ସାମ୍ନାକୁ ଆସିଛି। ମୋଟା କହି ମଜା ଉଡାଇବାରୁ ଗୁଳିମାଡ଼ ହୋଇଛି।

ସମସ୍ତଙ୍କ ସାମ୍ନାରେ ଜଣେ ମୋଟା ଲୋକଙ୍କୁ ମୋଟା କହିବାରୁ ସେ ରାଗିଯାଇଥିଲେ। ଏବଂ ପରେ ଦୁଇ ଜଣ ବ୍ୟକ୍ତିଙ୍କର ପିଛା କରିଥିଲେ। ଯେଉଁମାନେ ତାଙ୍କୁ ମୋଟା କହି ତାଙ୍କର ମଜା ଉଡାଇଥିଲେ। ପରେ ସେମାନଙ୍କୁ ସିଧା ଯାଇ ଗୁଳି କରିଦେଇଥିଲେ। ଆଉ କହିଥିଲେ ମତେ ମୋଟା କହିଲ ଏବେ ଗୁଳି ଖାଅ।

ମୋଟା ପାଇଁ ଗୁଳିମାଡ଼: ହଁ ଏପରି ଏକ ରୋଚକ କାଣ୍ଡ ଘଟିଛି ଉତ୍ତରପ୍ରଦେଶର ଗୋରଖପୁର ଜିଲ୍ଲାରେ। ପ୍ରକୃତରେ, ବେଲଘାଟ ଥାନା ଅଞ୍ଚଳର ବାସିନ୍ଦା ଅର୍ଜୁନ ଚୌହାନ ପାଞ୍ଚ ଦିନ ପୂର୍ବେ ତାଙ୍କ କାକାଙ୍କ ସହିତ ତରକୁଲହା ଦେବୀ ମନ୍ଦିର ପାଖରେ ଏକ ସାମୁହିକ ଭୋଜିରେ ଯୋଗଦେବାକୁ ଯାଇଥିଲେ।

ଏହି ସମୟରେ, ଭୋଜି ସମୟରେ, ଅନ୍ୟ ଦୁଇ ଅତିଥି, ଅନିଲ ଚୌହାନ ଏବଂ ଶୁଭମ ଚୌହାନ, ଅର୍ଜୁନ ଚୌହାନଙ୍କ ମୋଟାପଣକୁ ନେଇ ମଜା କରିଥିଲେ। ଯେଉଁଥିପାଇଁ ଅର୍ଜୁନ ଚୌହାନ ବହୁତ ରାଗିଗଲେ।

ହେଲେ ସେଠାରେ କିଛି କହିନପାରି ପ୍ରତିଶୋଧ ନେବାକୁ ମୋଉକା ଅପେକ୍ଷାରେ ଥିଲେ। ତେଣୁ ଗୁରୁବାର ଦିନ ତାଙ୍କ ଜଣେ ସାଙ୍ଗଙ୍କ ସହ ସେହି ଦୁଇ ଜଣଙ୍କ ପିଛା କଲେ। ଯେଉଁମାନେ ତାଙ୍କୁ ମୋଟା କହି ଅପମାନିତ କରିଥିଲେ।

ରାସ୍ତାରେ ଗୁଳିମାଡ଼: କିଛି ଦୂର ପର୍ଯ୍ୟନ୍ତ ପିଛା କରିବା ପରେ, ଦୁହେଁ ଜଗଦୀଶପୁର-କଲେସର ବାଇପାସର ଟେନୁଆ ଟୋଲ୍ ପ୍ଲାଜା ନିକଟରେ ତାଙ୍କ କାରକୁ ଅଟକାଇଲେ। ଏହା ପରେ, ଅର୍ଜୁନ ଏବଂ ଆସିଫ୍ ଉଭୟ ଯୁବକଙ୍କ କଲାର ଧରି ସେମାନଙ୍କୁ କାରରୁ ବାହାରକୁ ନେଇଗଲେ।

ଏହା ପରେ ଉଭୟଙ୍କ ଉପରେ ଗୁଳିଚାଳନା କରାଯାଇଥିଲା। ପୋଲିସର ସୂଚନା ଅନୁଯାୟୀ, ରାସ୍ତା ଦେଇ ଯାଉଥିବା ଲୋକମାନେ ଆହତ ଉଭୟଙ୍କୁ ଡାକ୍ତରଖାନାକୁ ନେଇଯାଇଥିଲେ। ଏଠାରୁ ତାଙ୍କୁ ପରେ ଗୋରଖପୁର ମେଡିକାଲ କଲେଜ ଏବଂ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା।

ବର୍ତ୍ତମାନ ଉଭୟଙ୍କ ଅବସ୍ଥା ବିପଦମୁକ୍ତ। ସେହି ସମୟରେ, ଆହତ ଶୁଭମଙ୍କ ବାପାଙ୍କ ଅଭିଯୋଗ କ୍ରମେ ପୋଲିସ ଏକ ମାମଲା ରୁଜୁ କରିଛି। ଅଭିଯୁକ୍ତକୁ ମଧ୍ୟ ଗିରଫ କରାଯାଇଛି।