ମାତ୍ର ୧୩ ବର୍ଷ ବୟସରେ ସଚିନ ତେନ୍ଦୁଲକରଙ୍କୁ ପଛରେ ପକାଇଲେ ବୈଭବ ସୂର୍ଯ୍ୟବଂଶୀ

ନୂଆଦିଲ୍ଲୀ: ବିଜୟ ହଜାରେ ଟ୍ରଫି-୨୦୨୪ରେ ୩୮ଟି ଦଳ ଅଂଶଗ୍ରହଣ କରୁଛନ୍ତି। କ୍ରୁନାଲ ପାଣ୍ଡ୍ୟା, ହାର୍ଦ୍ଦିକ ପାଣ୍ଡ୍ୟା ଓ ସୂର୍ଯ୍ୟକୁମାର ଯାଦବଙ୍କ ଭଳି ଅନ୍ତର୍ଜାତୀୟ ତାରକା ମଧ୍ୟ ଏହି ଟୁର୍ଣ୍ଣାମେଣ୍ଟରେ ଖେଳୁଛନ୍ତି।

ଏପର୍ଯ୍ୟନ୍ତ ଦୁହେଁ କିଛି ବିଶେଷ କରିନାହାନ୍ତି, କିନ୍ତୁ ସେମାନଙ୍କ ବ୍ୟତୀତ ଆଇପିଏଲ୍ ନିଲାମରୁ ବେଶ୍ ଚର୍ଚ୍ଚାରେ ଥିବା ୧୩ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କ ଉପରେ ମଧ୍ୟ ସମସ୍ତଙ୍କ ନଜର ରହିଛି।

ବିହାରର ଏହି କୁନି ବ୍ୟାଟ୍ସମ୍ୟାନ୍ ଶେଷରେ ନିଜର ବ୍ୟାଟ୍ ଦେଖାଇ ଟୁର୍ଣ୍ଣାମେଣ୍ଟରେ ବେଶ୍ ଚହଳ ପକାଇଥିଲେ। ଖାସ୍ କଥା ହେଲା ସେମାନଙ୍କ ଟାର୍ଗେଟ ଥିଲା ‘ପାଣ୍ଡ୍ୟା ବ୍ରଦର୍ସ’ର ଟିମ୍।

ବରୋଦା ଓ ବିହାର ମଧ୍ୟରେ ଖେଳାଯାଇଥିବା ବିଜୟ ହଜାରେ ଟ୍ରଫି ମ୍ୟାଚରେ ସୂର୍ଯ୍ୟବଂଶୀ ୧୨ ଚୌକା ସାହାଯ୍ୟରେ ଅର୍ଦ୍ଧଶତକ ହାସଲ କରିଥିଲେ। ୧୭ ବର୍ଷ ବୟସରେ ଲିଷ୍ଟ ଏ କ୍ରିକେଟରେ ପ୍ରଥମ ଅର୍ଦ୍ଧଶତକ ହାସଲ କରିଥିବା ସଚିନ ତେନ୍ଦୁଲକରଙ୍କୁ ମଧ୍ୟ ପଛରେ ପକାଇଦେଇଛନ୍ତି।

ସୂର୍ଯ୍ୟବଂଶୀଙ୍କ ଅର୍ଦ୍ଧଶତକ: ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ବରୋଦା ଓ ବିହାର ଦଳ ମଧ୍ୟରେ ମ୍ୟାଚ୍ ଖେଳାଯାଇଥିଲା। ହାର୍ଦ୍ଦିକ ଏହି ମ୍ୟାଚରେ ସାମିଲ ହୋଇନଥିଲେ ମଧ୍ୟ ତାଙ୍କ ବଡ଼ ଭାଇ କ୍ରୁନାଲ ପାଣ୍ଡ୍ୟା ଏହି ଯୁବ ବ୍ୟାଟ୍ସମ୍ୟାନଙ୍କୁ ଅଟକାଇ ପାରିନଥିଲେ।

ପ୍ରଥମେ ବ୍ୟାଟିଂ କରି ବରୋଦା ଦଳ ୪୯ ଓଭରରେ ୨୭୭ ରନ୍ କରିଥିଲା। ଜବାବରେ ବିହାର ପକ୍ଷରୁ ଓପନିଂ କରିବାକୁ ଆସିଥିବା ବୈଭବ ସୂର୍ଯ୍ୟବଂଶୀ ତାଙ୍କୁ ତୀବ୍ର ଧକ୍କା ଦେଇ ୧୬୯ରୁ ଅଧିକ ଷ୍ଟ୍ରାଇକ୍ ରେଟ୍ ରେ ସ୍କୋର କରିଥିଲେ।

ସୂଚନାଯୋଗ୍ୟ, ବୈଭବ ଚଳିତ ଋତୁରୁ ବିଜୟ ହଜାରେ ଟ୍ରଫିରେ ପ୍ରବେଶ କରିବା ସହ ତାଙ୍କ ନାମରେ ଏକ ରେକର୍ଡ ମଧ୍ୟ କରିଥିଲେ। ଲିଷ୍ଟ-ଏ କ୍ରିକେଟରେ ପଦାର୍ପଣ କରିବାରେ ସେ ସର୍ବକନିଷ୍ଠ ଭାରତୀୟ ଖେଳାଳି।