ଇରାନରେ ୧୦ ହଜାରରୁ ଅଧିକ ପାକିସ୍ତାନୀ ନାଗରିକଙ୍କୁ କାହିଁକି ଗିରଫ କରାଗଲା?
ନୂଆଦିଲ୍ଲୀ: ଚଳିତ ବର୍ଷ ଇରାନରେ ୧୦ ହଜାରରୁ ଅଧିକ ପାକିସ୍ତାନୀଙ୍କୁ ଗିରଫ କରାଯାଇଛି ବୋଲି ଫେଡେରାଲ ଇନଭେଷ୍ଟିଗେସନ୍ ଏଜେନ୍ସି (ଏଫ୍ଆଇଏ) କହିଛି। ଏହି ଲୋକମାନେ ବେଆଇନ ଭାବେ ବିଦେଶରେ ପହଞ୍ଚିବାକୁ ଚାହୁଁଥିଲେ। ୨୦୨୪ ଜାନୁଆରି ପହିଲାରୁ ଡିସେମ୍ବର ୧୫ ମଧ୍ୟରେ ଇରାନରେ ୧୦,୪୫୪ ପାକିସ୍ତାନୀ ନାଗରିକଙ୍କୁ ଗିରଫ କରାଯାଇଛି।
ଏହି ଲୋକମାନେ ବେଲୁଚିସ୍ତାନର ଅଜ୍ଞାତ ମାର୍ଗ ଦେଇ ଇରାନରେ ପ୍ରବେଶ କରିଥିଲେ। ପାକିସ୍ତାନୀ ଅଧିକାରୀମାନେ କହିଛନ୍ତି ଯେ ଇରାନ କର୍ତ୍ତୃପକ୍ଷ ବିଭିନ୍ନ ସମୟରେ ଏହି ବ୍ୟକ୍ତିମାନଙ୍କୁ ଗିରଫ କରିଥିଲେ ଏବଂ ଚାଗାଇ ଜିଲ୍ଲାର ସୀମାନ୍ତ ସହର ତାଫତାନରେ ପାକିସ୍ତାନକୁ ହସ୍ତାନ୍ତର କରିଥିଲେ।
ପାକିସ୍ତାନୀଙ୍କ ବ୍ୟତୀତ ଆଫଗାନମାନେ ମଧ୍ୟ ବେଲୁଚିସ୍ତାନ ଦେଇ ଉନ୍ନତ ଭବିଷ୍ୟତ ସନ୍ଧାନରେ ୟୁରୋପୀୟ ଦେଶକୁ ଯିବାକୁ ଚେଷ୍ଟା କରୁଛନ୍ତି। ତେବେ ଇରାନରେ ଏଭଳି ଅନେକ ଲୋକଙ୍କୁ ଗିରଫ କରାଯାଇଛି । ଏଫ୍ ଆଇଏ ଅଧିକାରୀଙ୍କ କହିବା ନୁସାରେ, ୨୦୨୩ ତୁଳନାରେ ୨୦୨୪ରେ ଇରାନରେ ଗିରଫହାର ଅଧିକ ଥିଲା।
୨୦୨୩ ରେ ଇରାନରେ ଗିରଫ ହୋଇଥିବା ପାକିସ୍ତାନୀ ନାଗରିକଙ୍କ ସଂଖ୍ୟା ଥିଲା ୮ ହଜାର ୨୭୨ । ଏଫ୍ ଆଇଏ ତଥ୍ୟ ଅନୁଯାୟୀ, ୨୦୨୦ରୁ ୨୦୨୪ ପର୍ଯ୍ୟନ୍ତ ପାଞ୍ଚ ବର୍ଷ ମଧ୍ୟରେ ପାକିସ୍ତାନରୁ ବେଆଇନ ଭାବେ ଇରାନରେ ପ୍ରବେଶ କରିଥିବା ୬୨ ହଜାରରୁ ଅଧିକ ପାକିସ୍ତାନୀ ନାଗରିକଙ୍କୁ ଗିରଫ କରାଯାଇଛି।
ଇରାନରେ ଗିରଫ ହୋଇଥିବା ଅଧିକାଂଶ ପାକିସ୍ତାନୀ ନାଗରିକ ପଞ୍ଜାବ ପ୍ରଦେଶର। ବେଲୁଚିସ୍ତାନର ୫ଟି ଜିଲ୍ଲା ଇରାନ ସହ ସୀମା ବଣ୍ଟନ କରିଥାଏ, ଯେଉଁଥିରେ ଚଗାଇ, ୱାଶିକ୍, ପଞ୍ଜଗୁର, କେଚ୍ ଏବଂ ଗ୍ୱାଦର ଅନ୍ତର୍ଭୁକ୍ତ । ପାକିସ୍ତାନର ବିଭିନ୍ନ ଅଞ୍ଚଳ ବ୍ୟତୀତ ଆଫଗାନିସ୍ତାନ ମଧ୍ୟ ଏହି ଜିଲ୍ଲାଗୁଡ଼ିକରେ ପହଞ୍ଚିଥାଏ ।
ଯେଉଁଠାରୁ ମାନବ ଚାଲାଣକାରୀମାନେ ସେମାନଙ୍କୁ ଇରାନ ଏବଂ ସେଠାରୁ ତୁର୍କୀ ଦେଇ ଗ୍ରୀସ୍ କୁ ନେଇଯାଆନ୍ତି । ସରକାରୀ ଅଧିକାରୀଙ୍କ କହିବା ନୁସାରେ, କେଚ୍ ଓ ଗ୍ୱାଦରରୁ ବହୁ ସଂଖ୍ୟକ ଲୋକ ଇରାନରେ ପ୍ରବେଶ କରୁଥିଲେ।
ସେଠାରେ ଉଗ୍ରବାଦୀ ଆକ୍ରମଣ ଯୋଗୁଁ ଅଧିକାଂଶ ଲୋକ ଏବେ ଚାଗାଇ ଓ ୱାଶାକ୍ ଦେଇ ଇରାନରେ ପ୍ରବେଶ କରୁଛନ୍ତି। ଏହି ପ୍ରୟାସରେ ବହୁ ସଂଖ୍ୟକ ଲୋକ ଗିରଫ ହେଉଥିବା ବେଳେ ବାଟରେ ଅସୁବିଧା ଯୋଗୁଁ ଅନେକ ଲୋକ ପ୍ରାଣ ମଧ୍ୟ ହରାଉଛନ୍ତି ।
