୭୨ ବର୍ଷରେ ଡାକ୍ତର ହେବାର ଇଚ୍ଛା, ଜେଜେମାଆ ଦେଲେ NEET ପରୀକ୍ଷା

ନୂଆଦିଲ୍ଲୀ: ଗତକାଲି ଅର୍ଥାତ ୪ ମେ’ରେ ଥିଲା ନିଟ୍ ପରୀକ୍ଷା। ଏଥିରେ ଅନେକ ପ୍ରାର୍ଥୀ ପରୀକ୍ଷା ଦେଇସାରିଛନ୍ତି। ତେବେ ଯୁବା ନିଟ୍ ପ୍ରାର୍ଥୀଙ୍କ ଭିଡ଼ରେ, ଜଣେ ଆନ୍ଧ୍ରପ୍ରଦେଶର ୭୨ ବର୍ଷୀୟ ପୋଥୁଲା ଭେଙ୍କଟାଲକ୍ଷ୍ମୀ ଜଣେ ଅଭିଭାବକ ରୂପେ ନୁହେଁ, ବରଂ ନିଜେ ପରୀକ୍ଷା ଦେବାକୁ ଆସିଥିଲେ। ଏହି ବୟସରେ ସେ ନିଜ ଡାକ୍ତର ହେବାର ସ୍ୱପ୍ନକୁ ସାକାର କରିବାକୁ ଚାହୁଁଛନ୍ତି।

ରବିବାର ଦିନ ସରକାରୀ ମହିଳା ପଲିଟେକ୍ନିକ କଲେଜରେ ଭାରତର ସବୁଠୁ କଠିନ ମେଡିକାଲ ପ୍ରବେଶିକା ପରୀକ୍ଷା ପାଇଁ ହଜାର ହଜାର ଲୋକେ ପହଞ୍ଚିଥିଲେ।

ଏଥିରେ ଭେଙ୍କଟାଲକ୍ଷ୍ମୀ ପ୍ରାର୍ଥୀଙ୍କ ଆତ୍ମବିଶ୍ୱାସକୁ ଆହୁରି ବଢାଇଦେଇଛନ୍ତି। ଏକ ସାଧାରଣ ପୋଷାକ ପିନ୍ଧି କେବଳ ନିଜ ଆଡମିଟକାର୍ଡ ଧରି ସେ ପରୀକ୍ଷା କେନ୍ଦ୍ରକୁ ପ୍ରବେଶ କରିଛନ୍ତି।

ସମସ୍ତେ ଭାବୁଥିଲେ ଯେ, ସେ କେଉଁ ପରୀକ୍ଷାର୍ଥୀଙ୍କ ଅଭିଭାବକ ହୋଇଥିବେ, କିନ୍ତୁ ସେ ଯେତେବେଳେ ପରୀକ୍ଷାର୍ଥୀଙ୍କ ମଝିରେ ବସି ପରୀକ୍ଷା ଦେଇଥିଲେ, ସେଥିରୁ ଜଣାପଡିଥିଲା ଯେ, ଭେଙ୍କଟାଲକ୍ଷ୍ମୀ ଜଣେ ପରୀକ୍ଷାର୍ଥୀ।

ସେ ପରୀକ୍ଷାର୍ଥୀଙ୍କ ମଧ୍ୟରେ ଏହି ବାର୍ତ୍ତା ପ୍ରସାରିତ କରିଛନ୍ତି ଯେ, ନିଜ ସ୍ୱପ୍ନ ସାକାର କରିବା ଲାଗି ବୟସର କୌଣସି ସୀମା ନାହିଁ। ଜାତୀୟ ଚିକିତ୍ସା ଆୟୋଗ ଦ୍ୱାରା ୨୦୨୨ରେ ନିଟ୍‌ର ବୟସ ସୀମା ହଟାଯିବା ପରେ, ଏହା ସମ୍ଭବପର ହୋଇପାରିଛି।