ଫିଲିଫାଇନ୍ସକୁ ବ୍ରହ୍ମୋସ ମିଶାଇଲ ରପ୍ତାନୀ କରିବ ଭାରତ: ହୋଇଛି ୩୭.୫୦ କୋଟି ଡଲାରର ଡିଲ୍

ନୂଆଦିଲ୍ଲୀ: ଭାରତରେ ନିର୍ମିତ ବ୍ରହ୍ମୋସ ମିଶାଇଲ କିଣିବ ଫିଲିଫାଇନ୍ସ। ଏନେଇ ଫିଲିଫାଇନ୍ସ ଭାରତ ସହ ୩୭.୫0 କୋଟି ଡଲାରର ବ୍ରହ୍ମୋସ ସୁପରସୋନିକ କ୍ରୁଜ ମିଶାଇଲର ଚୁକ୍ତି କରିଛି । ଶୁକ୍ରବାର ବ୍ରହ୍ମୋସ ନିର୍ମାଣ କରୁଥିବା କମ୍ପାନୀ ବ୍ରହ୍ମୋସ ଏରୋସ୍ପେସ୍ ପ୍ରାଇଭେଟ ଲିମିଟେଡ (ବିଏପିଏଲ)ର ସିଇଓ ଅତୁଲ ଡି ରାଣେ କହିଛନ୍ତି ଯେ ଏହି ଚୁକ୍ତି ଭାରତ ପାଇଁ ବିଭିନ୍ନ ରପ୍ତାନୀ ପରିଯୋଜନା ପାଇଁ ରାସ୍ତା ପ୍ରସ୍ତୁତ କରିବ ।

ଏକ ସାକ୍ଷାତକାରରେ ରାଣେ କହିଛନ୍ତି ଯେ ବ୍ରାହ୍ମୋସ୍ କୁ ନେଇ ହୋଇଥିବା ଚୁକ୍ତି ହେଉଛି ଭାରତ ପାଇଁ ପ୍ରଥମ ଏବଂ କୌଣସି ଦେଶକୁ ଅସ୍ତ୍ରଶସ୍ତ୍ର ଯୋଗାଇବାରେ ମଧ୍ୟ ଏହା ଭାରତ ପାଇଁ ପ୍ରଥମ। ସେ କହିଛନ୍ତି ଏହା ଭାରତ ସହ ସ୍ୱାକ୍ଷର ହୋଇଥିବା ପ୍ରଥମ ରପ୍ତାନୀ ଚୁକ୍ତି । ଏହିପରି ଅନେକ କାରବାର ପାଇଁ ଏହା ଏକ ପଥ ପରିଷ୍କାର କରିବ । ସେ ଆହୁରି କହିଛନ୍ତି ଏହା ଭାରତ ପାଇଁ ଏକ ଭଲ ଚୁକ୍ତି । ବ୍ରହ୍ମୋସ କିଭଳି ମହତ୍ୱପୂର୍ଣ୍ଣ ତାହା ଏହି ଚୁକ୍ତି ଦର୍ଶାଉଛି । କିନ୍ତୁ ଆମ ପାଖରେ ଆହୁରି ଅନେକ କିଛି ରହିଛି । ସେ କହିଛନ୍ତି ଅନେକ ଦେଶ ବ୍ରହ୍ମୋସ ମିଶାଇଲ ପାଇଁ ଆଗ୍ରହ ପ୍ରକାଶ କରିଛନ୍ତି ଏବଂ ଆମେ ମଧ୍ୟ ଏହା ଉପରେ କାମ କରୁଛୁ ।

ମର୍ନିଂ ପୋଷ୍ଟରେ ପ୍ରକାଶିତ ରିପୋର୍ଟ ଅନୁଯାୟୀ ବିଶ୍ୱର ଦ୍ରୁତତମ ସୁପରସୋନିକ୍ କ୍ଷେପଣାସ୍ତ୍ର କିଣିବା ପାଇଁ ଫିଲିପାଇନ୍ସର ନିଷ୍ପତ୍ତି ଏହାର ସାମରିକ ଶକ୍ତିକୁ ବହୁଗୁଣିତ କରିବ। ଏହି କ୍ଷେପଣାସ୍ତ୍ର ମାଧ୍ୟମରେ ଫିଲିପାଇନ୍ସ ଏହାର ଉପକୂଳବର୍ତ୍ତୀ ଅଞ୍ଚଳକୁ ରକ୍ଷା କରିବାରେ ସକ୍ଷମ ହେବ। ଉଲ୍ଲେଖନୀୟ ବିଷୟ ହେଉଛି, ଦକ୍ଷିଣ ଚୀନ୍ ସାଗରରେ ଚୀନ୍ର ଅଧିକାରକୁ ନେଇ ଫିଲିପାଇନ୍ସ ସହ ବିବାଦ ଦୀର୍ଘ ଦିନ ଧରି ଚାଲିଆସୁଛି। ଏହି କ୍ରୁଜ୍ କ୍ଷେପଣାସ୍ତ୍ର ଶବ୍ଦର ବେଗଠାରୁ ପ୍ରାୟ ତିନି ଗୁଣ ଅଧିକ ବେଗରେ ଉଡିଥାଏ  । ଏହି ମିଶାଇଲ ପ୍ରାୟ ୨୯୦ କିଲୋମିଟର ଦୂରତା ଅତିକ୍ରମ କରିପାରିବ  । ବିଗତ କିଛି ଦିନ ମଧ୍ୟରେ ଫିଲିପାଇନ୍ସ ନିଜର ସଶସ୍ତ୍ର ବାହିନୀର ଆଧୁନିକୀକରଣ ପାଇଁ ଅନେକ ପ୍ରତିରକ୍ଷା ଚୁକ୍ତି ସ୍ୱାକ୍ଷର କରିଛି।