IPL-୨୦୨୨: ବଦଳିଲା DRS ଓ ସୁପର ଓଭର ନିୟମ, ଜାଣନ୍ତୁ କ’ଣ

ନୂଆଦିଲ୍ଲୀ: ଚଳିତ ଆଇପିଏଲ-୨୦୨୨ ଆରମ୍ଭ ହେବାକୁ ଆଉ କମ୍ ଦିନ ଅଛି । ଆସନ୍ତା ୨୬ ତାରିଖରେ ଚେନ୍ନାଇ ସୁପର କିଙ୍ଗସ ଓ କୋଲକାତା ନାଇଟ ରାଇଡର୍ସ ମଧ୍ୟରେ ଅନୁଷ୍ଠିତ ହେବାକୁ ଯାଉଛି । ତେବେ ଏହା ପୂର୍ବରୁ ଆଇପିଏଲ ମ୍ୟାଚର ପ୍ଲେଇଂ କଣ୍ଡିସନ୍ସରେ ବଡ଼ ଧରଣର ପରିବର୍ତ୍ତନ ହେବାକୁ ଯାଉଛି । ଚଳିତ ଆଇପିଏଲରେ ଡିସେସନ ରିଭ୍ୟୁ ସିଷ୍ଟମ (ଡିଆରଏସ) ସଂଖ୍ୟା ବୃଦ୍ଧି କରାଯାଇଛି । ପୂର୍ବରୁ ଗୋଟିଏ ଡିଆରଏସ ଥିବାବେଳେ ଏବେ ଏହାକୁ ଦୁଇ ଅଙ୍କକୁ ବଢ଼ାଇ ଦିଆଯାଇଛି । ମେରିଲବୋନ କ୍ରିକେଟ କ୍ଲବ (ଏମସିସି) ଦ୍ୱାରା ଜାରି କରାଯାଇଥିବା ନୂଆ ନିୟମକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସମର୍ଥନ କରିଛି । ଏଥିସହ ବିସିସିଆଇ ଚଳିତ ଆଇପିଏଲ ପାଇଁ କିଛି ନୂଆ ନିଷ୍ପତ୍ତି ନେଇଥିବା ଜଣାପଡ଼ିଛି ।

ରିପୋର୍ଟ ମୁତାବକ, କୋଭିଡ-୧୯ କାରଣରୁ ଯଦି କୌଣସି ଟିମ୍ ପ୍ଲେଇଂ-୧୧ ବାଛିବାରେ ଅସମର୍ଥ ହୁଏ, ତେବେ ବିସିସିଆଇ ଉକ୍ତ ମ୍ୟାଚର ପୁନର୍ବାର ଆୟୋଜନ କରିବ । କୋଭିଡ କାରଣରୁ ପୂର୍ବ ନିର୍ଦ୍ଧାରିତ ମ୍ୟାଚ ହୋଇ ନପାରିଲେ, ଉକ୍ତ ମାମଲା ବୈଷୟିକ କମିଟି ନିକଟକୁ ପଠାଯିବ । ଏହି କମିଟିର ନିଷ୍ପତ୍ତି ଚୂଡ଼ାନ୍ତ ଓ ବାଧ୍ୟତାମୂଳକ ହେବ । ଜଣେ ଖେଳାଳି କ୍ୟାଚ ଆଉଟ ହେବା ପରେ ନୂଆ ବ୍ୟାଟ୍ସମ୍ୟାନ ଷ୍ଟ୍ରାଇକରେ ରହିବ । ବ୍ୟାଟ୍ସମ୍ୟାନ କ୍ରିଜ ପାର କରିସାରିଥିଲେ କିମ୍ବା ଓଭରର ଅନ୍ତିମ ବଲ ହୋଇଥିଲେ ଏ କ୍ଷେତ୍ରରେ କୌଣସି ଫରକ ପଡ଼ିବନି । ପ୍ଲେ ଅଫ୍ / ଫାଇନାଲ ମ୍ୟାଚରେ ସୁପର ଓଭର ମାଧ୍ୟମରେ ଯଦି ଟାଇକୁ ରୋକିବା ସମ୍ଭବ ହେବନି, ତେବେ ତିନୋଟି ଲିଗ ମ୍ୟାଚରେ ଉଚ୍ଚ ସ୍ଥାନ ହାସଲ କରିଥିବା ଟିମକୁ ବିଜେତା ଘୋଷଣା କରାଯିବ ।