ଆକ୍ରମଣ, ରକ୍ତପାତ ଆଉ ହାହାକାର: ଋଷ-ୟୁକ୍ରେନ ଯୁଦ୍ଧକୁ ବର୍ଷେ ପରେ ବି ଥମୁନି ଗୋଳାବାରୁଦର ଶବ୍ଦ

ନୂଆଦିଲ୍ଲୀ: ଆଜି ଫେବୃଆରୀ ୨୪ ତାରିଖ । ଆଜିଠୁ ଠିକ ଏକ ବର୍ଷ ପୂର୍ବେ ଆରମ୍ଭ ହୋଇଥିଲା ଦୁଇ ଦେଶ ମଧ୍ୟରେ ଏକ ମହାଯୁଦ୍ଧର ଅୟମାରମ୍ଭ । ଯେଉଁ ଯୁଦ୍ଧରେ ଆଜି ବି ପଡନି ଯବନିକା, ଆଜି ଥମିନି ରକ୍ତପାତ ଆଉ ଆକ୍ରମଣରେ ଲାଗୁନି ବିରାମ । ସବୁଠି ଶୁଭୁଛି ଗୋଳାବାରୁଦର ଶବ୍ଦ, ସବୁଆଡେ ଦେଖାଯାଉଛି କୁଢ କୁଢ ଶବ ଆଉ ସବୁରି ଆଖିରେ ପ୍ରିୟଜନଙ୍କୁ ହରାଇବାର କୋହ । ମଶାଣିରେ ପାଲଟିଯାଇଛି ୟୁକ୍ରେନ ସହର । ସବୁଠି ହାହାକାର ଆଉ ସାରା ଦେଶରେ ପ୍ରତିଦିନ ବଞ୍ଚିବା ପାଇଁ ଚାଲିଛି ମହାସଂଗ୍ରାମ ।

ଗତବର୍ଷ ଫେବୃଆରୀ ୨୪ ତାରିଖରେ ଅଚାନକ ୟୁକ୍ରେନ ଉପରେ ଆକ୍ରମଣ କରିଥିଲା ପୁତିନ ସେନା । ସେପଟେ ଦୁର୍ବଳ ରାଷ୍ଟ୍ର ହେଲେ ବି ପଛଘୁଞ୍ଚା ଦେଇ ନଥିଲା ୟୁକ୍ରେନ । ଶତ୍ରୁକୁ ମୁହଁତୋଡ ଜବାବ ଦେବା ପାଇଁ ଅଣ୍ଟା ଭିଡିଥିଲେ ଦେଶର ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ଦେଶର ବୀର ଯବାନମାନଙ୍କ ସହ ଦେଶବାସୀଙ୍କୁ ମଧ୍ୟ ଋଷ ସେନାର ସାମନା କରିବା ପାଇଁ ଆହ୍ୱାନ ଦେଇଥିଲେ ୟୁକ୍ରେନ ରାଷ୍ଟ୍ରପତି । ଜେଲେନସ୍କି କହିଥିଲେ ଯେ, ଯଦି ଋଷ ଆକ୍ରମଣ କରୁଛି, ତେବେ ଆମେ ମଧ୍ୟ ଏହାର ସାମନା କରିବା । ହାରିବା ପଛେ, ପଛଘୁଞ୍ଚା ଦେବା ପାହିଁ । ଏହା କହି ସେ ନିଜେ ବନ୍ଧୁକ ଧରି ଯୁଦ୍ଧ ପାଇଁ ମଧ୍ୟ ପ୍ରସ୍ତୁତ ହୋଇଥିଲେ । ଆଉ ରାଷ୍ଟ୍ରପତିଙ୍କ ଏହି ଗୋଟିଏ ଆହ୍ୱାନରେ ହୁଙ୍କାର ଦେଇ ଉଠିଥିଲା ସାରା ୟୁକ୍ରେନ ।

ଏହାପରେ ବନ୍ଧୁକରୁ ଆରମ୍ଭ କରି ମିସାଇଲ ପର୍ଯ୍ୟନ୍ତ ଗୋଳାବାରୁଦରେ ସାରା ସହରର ନକ୍ସା ବଦଳିଯାଇଥିଲା । ୟୁକ୍ରେନର ଗୋଟିଏ ପରେ ଗୋଟିଏ ସହରକୁ କବଜା କରିବାରେ ଲାଗିଥିଲା ପୁତିନ ସେନା । କିନ୍ତୁ ହାର୍ ମାନିବା ପାଇଁ ପ୍ରସ୍ତୁତ ନଥିଲେ ୟୁକ୍ରେନ ରାଷ୍ଟ୍ରପତି ଜେଲେନସ୍କି । ଦେଶରକ୍ଷା ପାଇଁ ସହୀଦ ହୋଇଗଲେ ହଜାର ହଜାର ସୈନିକ, ଅସଂଖ୍ୟ ଲୋକ ଋଷ ଆକ୍ରମଣର ଶିକାର ହୋଇ ପ୍ରାଣ ହରାଇ ଦେଲେ, କୋଟି କୋଟି ଲୋକ ବାସସ୍ଥାନ ହରାଇଦେଲେ । କିନ୍ତୁ ଶତ୍ରୁ ହାତରେ ଦେଶକୁ ନଦେବାର ପଣ କରିଥିଲା ୟୁକ୍ରେନ ରାଷ୍ଟ୍ର । ବର୍ଷକର ଏହି ମହାଯୁଦ୍ଧ ଭିତରେ ୟୁକ୍ରେନର ୧,୪୫,୮୫୦ ସୈନିକ ମୃତ୍ୟୁବରଣ କରିଥିବା ଦାବି କରିଛି ୟୁକ୍ରେନ ।

ଶକ୍ତିଶାଳୀ ଋଷର ଅତ୍ୟାଧୁନିକ ହତିଆର ଏବଂ ବିରାଟ ସୈନ୍ୟବାହିନୀ ଅନେକ ଥର ୟୁକ୍ରେନ ଉପରେ ଭାରୀ ପଡିଛନ୍ତି, ଦେଶର ହଜାର ହଜାର ନାଗରିକଙ୍କ ହତ୍ୟା କରିଛନ୍ତି ସତ । କିନ୍ତୁ ଭାଙ୍ଗି ପାରିନାହାନ୍ତି ଦେଶର ମୁଖିଆଙ୍କ ସାହସ ଯାହା ଅନ୍ୟ ନାଗରିକମାନଙ୍କୁ ମଧ୍ୟ ଯୁଦ୍ଧରେ ସାମିଲ ହେବାକୁ ଆହ୍ୱାନ ଦେଇଛି । କେବଳ ଏହି କାରଣ ପାଇଁ ଋଷର ରାଷ୍ଟ୍ରପତି ପୁତିନଙ୍କ ଗର୍ବ ଏବଂ ଅହଂକାର ମଧ୍ୟ ଭାଙ୍ଗିରୁଜି ଚୁରମାର ହୋଇଗଲା । ୟୁକ୍ରେନ ଉପରେ ଆକ୍ରମଣ କରି ସହଜରେ ବିଜୟ ହାସଲ କରି ନେବ ବୋଲି ଭାବୁଥିବା ଋଷ ଆଜି ଏକ ବର୍ଷ ପରେ ବି ବିଜୟ ପାଇ ପାରିଲା ନାହିଁ । ଦିନେ ୟୁକ୍ରେନ ଉପରେ ରାଜ୍ କରିବା ଲକ୍ଷ୍ୟରେ ଯୁଦ୍ଧ ଆରମ୍ଭ କରିଥିବା ପୁତିନ ସେନା ଆଜି ନିଜ ସମ୍ମାନ ବଞ୍ଚାଇବା ପାଇଁ ୟୁକ୍ରେନ ସହ ଲଢେଇ କରୁଛି । ତେବେ ଆଜି କେବଳ ଏହି ଦୁଇ ଦେଶ ନୁହେଁ ସାରା ବିଶ୍ୱ ଏହି ଯୁଦ୍ଧର ଅନ୍ତକୁ ଅପେକ୍ଷା କରିଛି ।