ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଲେ ଏଲନ ମସ୍କ, କହିଲେ ମୁଁ ଆପଣଙ୍କର ଜଣେ ବଡ଼ ପ୍ରଶଂସକ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୩ ଦିନିଆ ଗସ୍ତରେ ମଙ୍ଗଳବାର ଦିନ ଆମେରିକାରେ ପହଞ୍ଚିଛନ୍ତି। ଏହି ସମୟରେ ପ୍ରଧାନମନ୍ତ୍ରୀ ମୋଦୀ ଅନେକ ସେଲିବ୍ରିଟିଙ୍କୁ ଭେଟିଛନ୍ତି । ନ୍ୟୁୟର୍କରେ ସେ ଟେସଲା ଏବଂ ସ୍ପେସ୍ ଏକ୍ସ ସିଇଓ ଏଲୋନ୍ ମସ୍କଙ୍କ ସହ କଥାବାର୍ତ୍ତା ହୋଇଛନ୍ତି। ଏଲୋନ୍ ମସ୍କ କହିଛନ୍ତି ଯେ, ପ୍ରଧାନମନ୍ତ୍ରୀ ସର୍ବଦା ନିବେଶ ପାଇଁ ପ୍ରେରଣା ଦିଅନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବା ପରେ ମସ୍କ କହିଛନ୍ତି ଯେ, ମୁଁ ଭାରତର ଭବିଷ୍ୟତକୁ ନେଇ ବହୁତ ଉତ୍ସାହିତ ଅଛି। ବିଶ୍ୱର ଅନ୍ୟ ଦେଶ ତୁଳନାରେ ଭାରତର ସର୍ବାଧିକ ସମ୍ଭାବନା ଅଛି। ପ୍ରଧାନମନ୍ତ୍ରୀ ମୋଦୀ ପ୍ରକୃତରେ ଭାରତ ବିଷୟରେ ଚିନ୍ତା କରନ୍ତି ସେଥିପାଇଁ ସେ ଆମକୁ କ୍ରମାଗତ ଭାବରେ ଗୁରୁତ୍ୱପୂର୍ଣ୍ଣ ବିନିଯୋଗ କରିବାକୁ ପ୍ରେରଣା ଦିଅନ୍ତି। ମୁଁ ତାଙ୍କୁ ବହୁତ ପସନ୍ଦ କରେ । ପ୍ରଧାନମନ୍ତ୍ରୀ ମୋଦୀଙ୍କୁ ଭେଟି ମୁଁ ବହୁତ ଖୁସି ଏବଂ ମୁଁ ତାଙ୍କର ଜଣେ ପ୍ରଶଂସକ।
ମସ୍କ ଆହୁରି କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀ ପ୍ରକୃତରେ ଭାରତ ପାଇଁ ସଠିକ୍ କାର୍ଯ୍ୟ କରିବାକୁ ଚାହୁଁଛନ୍ତି ଏବଂ ଖୋଲା ମନୋଭାବ ପୋଷଣ କରୁଛନ୍ତି। ସେ ସର୍ବଦା ନୂତନ କମ୍ପାନୀଗୁଡିକୁ ସମର୍ଥନ କରନ୍ତି । ସେ ସବୁବେଳେ ନିଶ୍ଚିତ କରିବାକୁ ଚାହାଁନ୍ତି ଯେ, କମ୍ପାନୀଗୁଡିକ ଭାରତକୁ କିପରି ଉପକୃତ କରୁଛନ୍ତି। ଆସନ୍ତା ବର୍ଷ ମୁଁ ପୁଣିଥରେ ଭାରତ ଗସ୍ତ କରିବାକୁ ଯୋଜନା କରୁଛି। ମୁଁ ଆଶା କରୁଛି ଆମେ ଶୀଘ୍ର ଭାରତରେ ଷ୍ଟାରଲିଙ୍କ ଲଞ୍ଚ କରିବୁ। ମୁଁ ଭାବୁଛି ଷ୍ଟାରଲିଙ୍କ ଇଣ୍ଟରନେଟ୍ ଭାରତର ଗ୍ରାମାଞ୍ଚଳ ତଥା ଦୁର୍ଗମ ଅଞ୍ଚଳର ଲୋକଙ୍କୁ ସାହାଯ୍ୟ କରିବ। ମସ୍କ କହିଛନ୍ତି ଯେ, ଚଳିତ ବର୍ଷ ଶେଷ ସୁଦ୍ଧା ସେ ଭାରତରେ ଟେସଲା ପାଇଁ ଏକ ସ୍ଥାନ ନିଶ୍ଚିତ କରିବେ। ପ୍ରଧାନମନ୍ତ୍ରୀ ବହୁ ବର୍ଷ ପୂର୍ବେ ଟେସଲା ପ୍ଲାଣ୍ଟକୁ ଆସିଥିଲେ, ଯେଉଁଠାରେ ଆମେ ତାଙ୍କୁ ଭେଟିଥିଲୁ।
ଏଲୋନ୍ ମସ୍କଙ୍କ ବ୍ୟତୀତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନ୍ୟୁୟର୍କରେ ପ୍ରବନ୍ଧକ ତଥା ପରିସଂଖ୍ୟାନ ପ୍ରଫେସର ନାସିମ ନିକୋଲାସ ତାଲେବଙ୍କୁ ମଧ୍ୟ ଭେଟିଛନ୍ତି। ପ୍ରଫେସର ତାଲେବ ପ୍ରଧାନମନ୍ତ୍ରୀ ମୋଦୀଙ୍କୁ ଉପହାର ସ୍ୱରୂପ ସ୍କିନ୍ ଇନ୍ ଗେମ୍ ନାମକ ପୁସ୍ତକ ପ୍ରଦାନ କରିଥିଲେ। ଏହା ପରେ ପ୍ରଧାନମନ୍ତ୍ରୀ ଲେଖକ ତଥା ଏକାଡେମିକ୍ ପ୍ରଫେସର ରବର୍ଟ ଥରୁମାନଙ୍କ ସହ ମଧ୍ୟ କଥାବାର୍ତ୍ତା କରିଥିଲେ। ଆଶା କରାଯାଉଛି ଯେ, ପ୍ରଧାନମନ୍ତ୍ରୀ ମୋଦୀ ରାଇ ଡାଲିଓ, ନିଲ ଡି ଗ୍ରେସେ ଟାଇସନ ଏବଂ ଅନ୍ୟାନ୍ୟ ଚିନ୍ତକଙ୍କୁ ମଧ୍ୟ ଭେଟି ପାରନ୍ତି।
