ଏସ.ସି.ବିରେ ପାଣି ସମସ୍ୟା ପାଇଁ ରୋଗୀ ହନ୍ତସନ୍ତ
କଟକ: ଏସସିବିରେ ଦେଖାଦେଇଛି ପାଣି ସମସ୍ୟା । ବିଦ୍ୟୁତ ସମସ୍ୟା ପରେ ଏବେ ପାଣି ସମସ୍ୟା । କାଲି ରାତିରୁ ମେଡ଼ିକାଲର ସବୁ ୱାର୍ଡ଼ରେ ପାଣି ବନ୍ଦ ହୋଇ ଯାଇଛି । ଶୌଚାଳୟରେ ପାଣି ଆସୁ ନଥିବା ସହ ପିଇବା ପାଣି ପାଇଁ ରୋଗୀମାନେ ହନ୍ତସନ୍ତ ହେଉଛନ୍ତି । ଆଜି ସକାଳେ ପାଣି ଆସିଥିଲେ ମଧ୍ୟ ତାହା ସମୁଦ୍ରକୁ ଶଙ୍ଖେ ଭଳି ।
ଶନିବାରଠାରୁ ବଡ଼ ମେଡ଼ିକାଲରେ ବିଜୁଳି ବିଭ୍ରାଟ ଦେଖାଦେଇଥିଲା । ଏବେ ପାଣି ସମସ୍ୟାକୁ ନେଇ ରୋଗୀ ଏବଂ ସେମାନଙ୍କ ସମ୍ପର୍କୀୟମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ସେମାନେ ମେଡ଼ିକାଲ ବାହାରେ ଥିବା ଶୌଚାଳୟ ବ୍ୟବହାର କରୁଥିବା ସହିତ ପାଣି କିଣି ପିଉଥିବା କହିଛନ୍ତି । ଅନ୍ୟପକ୍ଷରେ ୱାଟ୍କୋ କହିଛି ଯେ ମେଡ଼ିକାଲ ପରିସରରେ ଥିବା ପାଇପ୍ ଫାଟି ଯାଇଥିବାରୁ ରୋଗୀମାନଙ୍କୁ ଏପରି ଅସୁବିଧାର ସମ୍ମୁଖୀନ ହେବାକୁ ପଡ଼ିଛି । ପାଇପ ମରାମତି ପରେ ଜଳଯୋଗାଣ ସ୍ୱାଭାବିକ ହୋଇଛି ।
ତେବେ ଏନେଇ ମୁଖ୍ୟମନ୍ତ୍ରୀଙ୍କ ପାରିବା ପଣିଆ ଉପରେ ପ୍ରଶ୍ନ କରିଛି ବିଜେପି । ରାଜ୍ୟ ବିଜେପି ମୁଖପାତ୍ର ମନୋଜ ମହାପାତ୍ର କହିଛନ୍ତି- “ନିଦାନ ବିଭାଗରେ ଲାଇଟ ନାହିଁ । କେବେ ବିଜୁଳି ସମସ୍ୟା ତ କେବେ ପାଣି ସମସ୍ୟା । କୁଆଡ଼େ ଯାଇଛି ରାଜ୍ୟର ଶାସନ ବ୍ୟବସ୍ଥା? ଉପାନ୍ତ ଅଂଚଳରେ ମହମବତୀରେ ଉପଚାର କଥା ସାରା ରାଜ୍ୟ ଜାଣିଛି । କିନ୍ତୁ ଏସସିବିର ଅବସ୍ଥା ଏମିତି ହେଲେ ରାଜ୍ୟରେ ସ୍ୱାସ୍ଥ୍ୟାବସ୍ଥାର କ’ଣ ହେବ? ଏହିପରି ଯଦି ଚଲେ ତେବେ ନୈତିକତା ଦୃଷ୍ଟିରୁ ବିଭାଗୀୟ ମନ୍ତ୍ରୀମାନଙ୍କର ଇସ୍ତଫା ଦେଇ ଦେବା କଥା ।”
