BIG BREAKING….ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଗିରଫ୍ କଲା ED
ରାଞ୍ଚି: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ରାଜ୍ୟପାଳଙ୍କୁ ଇସ୍ତଫା ପତ୍ର ପ୍ରଦାନ କରିଛନ୍ତି। ମିଳିଥିବା ସୂଚନା ଅନୁଯାୟୀ, ୭ ଘଣ୍ଟାର ପଚରାଉଚରା ପରେ ଇଡି ଟିମ୍ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଅଟକ ରଖିଛି। ଇଡିର ପଚରାଉଚରା ପରେ ମୁଖ୍ୟମନ୍ତ୍ରୀ ହେମନ୍ତ ସୋରେନ ରାଜଭବନରେ ପହଞ୍ଚିଥିଲେ ଏବଂ ଏହା ପରେ ସେ ଇସ୍ତଫା ଦେଇଥିଲେ।
ସେପଟେ ଝାଡଖଣ୍ଡର ଶାସକ ଦଳର ବିଧାୟକମାନେ ରାଜଭବନରେ ପହଞ୍ଚିଛନ୍ତି । ଶାସକ ଦଳର ସମସ୍ତ ବିଧାୟକ ଚମ୍ପାଇ ସୋରେନଙ୍କୁ ନିଜର ନେତା ଭାବେ ନିର୍ବାଚିତ କରିଛନ୍ତି। ଏଭଳି ସ୍ଥିତିରେ ଚମ୍ପାଇ ସୋରେନ ଝାଡ଼ଖଣ୍ଡର ନୂଆ ମୁଖ୍ୟମନ୍ତ୍ରୀ ହୋଇପାରନ୍ତି। ଇଡି ଟିମ୍ ହେମନ୍ତ ସୋରେନଙ୍କୁ ସିଏମ ହାଉସରେ ପ୍ରାୟ ୭ ଘଣ୍ଟା ଧରି ପଚରାଉଚରା କରିଛି । ହେମନ୍ତ ସୋରେନଗିରଫ ହେବା ପରେ ମୁଖ୍ୟମନ୍ତ୍ରୀଙ୍କ ବାସଭବନ, ରାଜଭବନ, ବିଜେପି କାର୍ଯ୍ୟାଳୟ ସମେତ ରାଞ୍ଚିର ବିଭିନ୍ନ ଅଞ୍ଚଳରେ ସୁରକ୍ଷା ବଢ଼ାଇ ଦିଆଯାଇଛି।
ମିଳିଥିବା ସୂଚନା ଅନୁଯାୟୀ, ପଚରାଉଚରାରେ ଇଡି ଅଧିକାରୀ ହେମନ୍ତ ସୋରେନଙ୍କ ଉତ୍ତରରେ ସନ୍ତୁଷ୍ଟ ନୁହଁନ୍ତି। ହେମନ୍ତ ସୋରେନ୍ ଏପର୍ଯ୍ୟନ୍ତ ପଚରାଉଚରାରେ କେବଳ ନକାରାତ୍ମକ ଉତ୍ତର ଦେଇଛନ୍ତି। ଇଡି ଅଧିକାରୀମାନେ ହେମନ୍ତ ସୋରେନଙ୍କୁ ୪୦ରୁ ଅଧିକ ପ୍ରଶ୍ନ ପଚାରିଛନ୍ତି। ହେମନ୍ତ ସୋରେନ୍ ଅନେକ ପ୍ରଶ୍ନ ଶୁଣିବା ପରେ ଇଡି ଅଧିକାରୀଙ୍କ ଉପରେ ବର୍ଷିଥିଲେ। ସେପଟେ ରାଞ୍ଚିର ଅନେକ ଅଞ୍ଚଳରେ ୧୪୪ ଧାରା ଜାରି ରହିଛି । ସିଏମ୍ ହାଉସ୍ ବାହାରେ ମଧ୍ୟ ସୁରକ୍ଷା ବଢ଼ାଇ ଦିଆଯାଇଥିବା ବେଳେ ମିକିଂ ମଧ୍ୟ କରାଯାଉଛି।
ହେମନ୍ତ ସୋରେନଗିରଫ ହେବା ପରେ ତାଙ୍କ ପତ୍ନୀ ଅର୍ଥାତ କଳ୍ପନା ସୋରେନଙ୍କୁ ମୁଖ୍ୟମନ୍ତ୍ରୀ କରିବା ନେଇ ଚର୍ଚ୍ଚା ଜୋର ଧରିଛି । କଳ୍ପନା ସୋରେନଙ୍କ ବ୍ୟତୀତ ଚମ୍ପାଇ ସୋରେନଙ୍କୁ ମଧ୍ୟ ମୁଖ୍ୟମନ୍ତ୍ରୀ କରିବା ନେଇ ଚର୍ଚ୍ଚା ହେଉଛି । ତେବେ ଜେଏମଏମ ପ୍ଲାନ ବି ଉପରେ ମଧ୍ୟ କାମ କରୁଛି । ଏବେ ଜାଣନ୍ତୁ ଏହି ପ୍ଲାନ ବିଷୟରେ । ବାସ୍ତବରେ ଏହି ଯୋଜନାରେ ହେମନ୍ତ ସୋରେନଙ୍କୁ ଡେପୁଟି ସିଏମ କରିବାକୁ ମଧ୍ୟ ପ୍ରସ୍ତାବ ରହିଛି । ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପ୍ଲାନ୍ ବିରେ ଝାଡ଼ଖଣ୍ଡରେ ଦୁଇ ଜଣ ଉପମୁଖ୍ୟମନ୍ତ୍ରୀ ରହିବେ।
