ଫିଲ୍ମ ‘ତେରି ବାତ୍ ମେଁ ଏସା ଉଲଝା ଜିଆ’କୁ ନେଇ ଚର୍ଚ୍ଚାରେ ଶାହିଦ କପୁର

ମୁମ୍ବାଇ: ବଲିଉଡ୍ ରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ଶାହିଦ କପୁର ତାଙ୍କର ଆଗାମୀ ଫିଲ୍ମ ‘ତେରି ବାତ୍ ମେଁ ଏସା ଉଲଝା ଜିଆ’କୁ ନେଇ ଚର୍ଚ୍ଚାରେ ଅଛନ୍ତି। ଏହି ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ବେଶଉତ୍ସାହ ଦେଖିବାକୁ ମିଳୁଛି । ଶାହିଦ ମଧ୍ୟ ନିଜ ଫିଲ୍ମର ପ୍ରମୋସନ ପାଇଁ ଚେଷ୍ଟା ଚଳାଇଛନ୍ତି । ନିକଟରେ ‘ତେରି ବାତ୍ ମେଁ ଏସା ଉଲଝା ଜିୟା’ର ପ୍ରମୋସନ ସମୟରେ ଶାହିଦ ତାଙ୍କ ଆଗାମୀ ୱେବ୍ ସିରିଜ୍ ‘ଫର୍ଜି-୨’କୁ ନେଇ ଗଣମାଧ୍ୟମ ସହ ଖୋଲାଖୋଲି କଥା ବାର୍ତ୍ତା କରୁଥିବା ଦେଖିବାକୁ ମିଳିଥିଲା।

‘ଫର୍ଜି’ର କାହାଣୀ ସହ ଶାହିଦଙ୍କ ଭୂମିକାକୁ ଦର୍ଶକ ଖୁବ ପସନ୍ଦ କରିଥିଲେ । ଏବେ ଦର୍ଶକ ‘ଫର୍ଜି’ର ଦ୍ୱିତୀୟ ସିଜିନକୁ ଉତ୍ସୁକତାର ସହ ଅପେକ୍ଷା କରିଛନ୍ତି। ‘ଫର୍ଜି-୨’ ବିଷୟରେ ଗଣମାଧ୍ୟମ ଶାହିଦଙ୍କୁ ପଚାରିବାରୁ ଶାହିଦ ହସି ହସି କହିଥିଲେ, କିଛି ଜିନିଷ ମୋ ହାତରେ ନାହିଁ। ମୁଁ ଦର୍ଶକଙ୍କୁ ବହୁତ ଧନ୍ୟବାଦ ଜଣାଉଛି ଯେ ସେମାନେ ଫର୍ଜିର ପ୍ରଥମ ସିଜନକୁ ଏତେ ଭଲ ପାଇବା ଦେଇଛନ୍ତି, କିନ୍ତୁ ଫର୍ଜି ୨ କେବେ ମୁକ୍ତିଲାଭ କରିବ ସେ ବିଷୟରେ ମୁଁ କିଛି କହିପାରିବି ନାହିଁ । ହଁ, ମୁଁ ନିଶ୍ଚିତ ଭାବରେ କହିବାକୁ ଚାହେଁ ଯେ ଖୁବଶୀଘ୍ର ଫର୍ଜି-୨ ଆପଣଙ୍କ ସାମ୍ନାରେ ଆସିବ । ‘

ଶାହିଦ କପୁରଙ୍କ ବ୍ୟତୀତ ବିଜୟ ସେତୁପତି ଏବଂ ରାଶି ଖାନ୍ନାଙ୍କୁ ମଧ୍ୟ ‘ଫର୍ଜି’ରେ ଗୁରୁତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିଥିଲା। ଆଉ କିଛି ଦିନ ପରେ ରିଲିଜ ହେବାକୁ ଯାଉଛି ଅଭିନେତାଙ୍କ ଫିଲ୍ମ ‘ତେରି ବାତ୍ ମେଁ ଏସା ଉଲଝା ଜିଆ’। ଏହି ଫିଲ୍ମରେ ସେ କ୍ରିତି ସାନନଙ୍କ ସହ ରୋମାନ୍ସ କରୁଥିବାର ନଜର ଆସିବେ । ଏହି ଫିଲ୍ମ ଫେବୃଆରୀ ୯ରେ ରିଲିଜ ହେବାକୁ ଯାଉଛି ।