ବିଜେପିକୁ ତାଲିବାନ ସହ ତୁଳନା କରିଥିବା ଅଭିଯୋଗରେ ଆକାଶ ଆନନ୍ଦଙ୍କ ବିରୋଧରେ ରୁଜୁ ହେଲା ଏତଲା
ନୂଆଦିଲ୍ଲୀ: ବହୁଜନ ସମାଜ ପାର୍ଟିର ରାଷ୍ଟ୍ରୀୟ ସଂଯୋଜକ ଆକାଶ ଆନନ୍ଦଙ୍କ ବିରୋଧରେ ଉତ୍ତରପ୍ରଦେଶର ସୀତାପୁରରେ ଏତଲା ରୁଜୁ ହୋଇଛି। ଆକାଶ ଆନନ୍ଦଙ୍କ ବିରୋଧରେ ଏଫଆଇଆର ରୁଜୁ ହୋଇଛି ବୋଲି ସୀତାପୁର ପୋଲିସ ବିବିସିକୁ ନିଶ୍ଚିତ କରିଛି। ସୀତାପୁର ଆରକ୍ଷୀ ଅଧୀକ୍ଷକ ଚକ୍ରେଶ ମିଶ୍ରଙ୍କ କହିବାନୁଯାୟୀ, ସାଧାରଣ ଲୋକଙ୍କ ମଧ୍ୟରେ ହିଂସା ସୃଷ୍ଟି କରିବାକୁ ଚେଷ୍ଟା କରୁଥିବା ବେଳେ ରାଲିରେ ବାଚସ୍ପତି ଅସଂସଦୀୟ ଭାଷା ବ୍ୟବହାର କରି ଭାଷଣ ଦେଇଛନ୍ତି। ଆଚରଣ ବିଧି ମାମଲା ରୁଜୁ ହୋଇଛି।
ଆକାଶ ଆନନ୍ଦ ଓ ଅନ୍ୟମାନଙ୍କ ବିରୋଧରେ ଆଇପିସିର ଧାରା ୧୭୧ସି, ୧୫୩ବି, ୫୦୫(୨), ୧୮୮ ଏବଂ ଜନପ୍ରତିନିଧି ଆଇନର ଧାରା ୧୨୫ ଅନୁଯାୟୀ ମାମଲା ରୁଜୁ କରାଯାଇଛି। ସୀତାପୁରରେ ଏକ ରାଜନୈତିକ ଭାଷଣରେ ଆନନ୍ଦ ବର୍ତ୍ତମାନର ବିଜେପି ସରକାରକୁ ଆଫଗାନିସ୍ତାନରେ ତାଲିବାନ ଶାସନ ସହ ତୁଳନା କରିବା ସହ ବିଜେପି ସରକାରକୁ ଆତଙ୍କବାଦୀଙ୍କ ସରକାର ବୋଲି କହିଛନ୍ତି। ଏପ୍ରିଲ ୨୮ ତାରିଖ ରବିବାର ସୀତାପୁରରେ ଭାଷଣ ଦେଇ ଆକାଶ ଆନନ୍ଦ ବିଜେପିକୁ କଡ଼ା ସମାଲୋଚନା କରିଥିଲେ।
ବିଜେପି ସରକାରଙ୍କ ନୀତି ଉପରେ ପ୍ରଶ୍ନ ଉଠାଇ ଆକାଶ ଆନନ୍ଦ କହିଛନ୍ତି, “ସମଗ୍ର ଦେଶରେ ନିଜ ଭଉଣୀ ଓ ଝିଅଙ୍କ ଉପରେ ହେଉଥିବା ଅତ୍ୟାଚାର ମାମଲାରେ ୟୁପି ଏକ ନମ୍ବର ହୋଇପାରିଛି। ଯେଉଁ ସରକାର ନିଜ ଭଉଣୀ ଓ ଝିଅଙ୍କୁ ସୁରକ୍ଷା ଦେଇପାରୁନାହିଁ, ତାଙ୍କ ପାଇଁ ଲଜ୍ଜା। ୟୁପିରେ ୪୦ ପ୍ରତିଶତ ଶିଶୁ ଅପପୁଷ୍ଟିର ଶିକାର ହୋଇଛନ୍ତି। ଦେଶରେ ଶିଶୁମାନଙ୍କ ମଧ୍ୟରେ ୟୁପିରେ ସର୍ବାଧିକ ପୁଷ୍ଟିହୀନତା ରହିଛି। ଯେଉଁ ସରକାର ନିଜ ପିଲାମାନଙ୍କୁ ଭୋକ ଉପାସରେ ରଖନ୍ତି, ତାଙ୍କୁ କ୍ଷମତାରେ ରହିବାର ଅଧିକାର ଅଛି କି?”
