PMAY-U 2.0 ଯୋଜନାରେ ଲୋକଙ୍କ ପାଇଁ ଖୁସି ଖବର, ଏଣିକି ୮ ଲକ୍ଷ ଟଙ୍କାର ହୋମ୍ ଲୋନ୍ ଉପରେ ମିଳିବ ୪% ସୁଧ ସବସିଡି
ନୂଆଦିଲ୍ଲୀ : ଲୋକଙ୍କ ସୁବିଧା ପାଇଁ କେନ୍ଦ୍ର ସରକାର ଅନେକ ଯୋଜନା ଆରମ୍ଭ କରିଛନ୍ତି । ଏଥିମଧ୍ୟରୁ ଗୋଟିଏ ହେଉଛି ପ୍ରଧାନ ମନ୍ତ୍ରୀ ଆବାସ ଯୋଜନା। ନିକଟରେ ସରକାର ପ୍ରଧାନ ମନ୍ତ୍ରୀ ଆବାସ ଯୋଜନା-ସହରୀ (PMAY-U) ୨.୦ କୁ ଅନୁମୋଦନ କରିଛନ୍ତି। ଏହି ଯୋଜନାର ପରିସର ଅର୍ଥନୈତିକ ଦୁର୍ବଳ ବିଭାଗ (EWS) / ନିମ୍ନ ଆୟ ଗୋଷ୍ଠୀ (LIG) / ମଧ୍ୟମ ଆୟ ଗୋଷ୍ଠୀ (MIG) ପରିବାରକୁ ଅନ୍ତର୍ଭୁକ୍ତ କରେ।
୧ କୋଟି ପରିବାର ହେବେ ଉପକୃତ
PMAY-U 2.0 ପାଞ୍ଚ ବର୍ଷ ମଧ୍ୟରେ ସହରାଞ୍ଚଳରେ ଏକ ଘର ନିର୍ମାଣ, କିଣିବା କିମ୍ବା ଭଡା ଦେବା ପାଇଁ ରାଜ୍ୟ / ୟୁନିଅନ୍ ଟେରିଟୋରୀ / ପ୍ରାଥମିକ ଋଣ ପ୍ରତିଷ୍ଠାନ (PLI) ମାଧ୍ୟମରେ ୧ କୋଟି ସହରୀ ଗରିବ ଏବଂ ମଧ୍ୟବିତ୍ତ ପରିବାରକୁ କେନ୍ଦ୍ର ସହାୟତା ପ୍ରଦାନ କରିବ। ଏହି ଯୋଜନା ଅଧୀନରେ ୨.୩୦ ଲକ୍ଷ କୋଟି ଟଙ୍କା ସରକାରୀ ସହାୟତା ଯୋଗାଇ ଦିଆଯିବ।
PMAY-U 2.0 ଯୋଜନାର ଚାରୋଟି ପ୍ରକାର ଉପାଦାନ ଅଛି। ଏଥିରେ ହିତାଧିକାରୀ ଆଧାରିତ ଘର ନିର୍ମାଣ (BLC), ସହଭାଗୀତା ଅନୁଯାୟୀ ଘର ନିର୍ମାଣ (AHP), ସୁଲଭ ମୂଲ୍ୟରେ ଭଡା ଘର (ARH) ଏବଂ ସୁଧ ସବସିଡି ସ୍କିମ୍ (ISS) ଅନ୍ତର୍ଭୁକ୍ତ। ଏହି ଯୋଜନା ଅଧୀନରେ ଲାଭ ପାଇବା ପାଇଁ ହିତାଧିକାରୀମାନେ ସେମାନଙ୍କର ଯୋଗ୍ୟତା ଏବଂ ଚାରୋଟି ଉପାଦାନ ମଧ୍ୟରେ ପସନ୍ଦ ଅନୁଯାୟୀ ଗୋଟିଏ ଉପାଦାନ ବାଛିପାରିବେ। କହିରଖୁଛୁ ଏହି ଉପାଦାନଗୁଡ଼ିକ ମଧ୍ୟରୁ ଗୋଟିଏ ହେଉଛି ସୁଧ ସବସିଡି ଯୋଜନା।
ଏହି ଉପାଦାନ EWS / LIG ଏବଂ MIG ପରିବାରକୁ ହୋମ ଲୋନ୍ ଉପରେ ସବସିଡି ପ୍ରଦାନ କରିଥାଏ। ୩୫ ଲକ୍ଷ ଟଙ୍କା ମୂଲ୍ୟର ଘର ପାଇଁ ୨୫ ଲକ୍ଷ ପର୍ଯ୍ୟନ୍ତ ଗୃହ ଋଣ ନେଉଥିବା ହିତାଧିକାରୀମାନେ ୧୨ ବର୍ଷ ପର୍ଯ୍ୟନ୍ତ କାର୍ଯ୍ୟକାଳ ପାଇଁ ପ୍ରଥମ ୮ ଲକ୍ଷ ଋଣ ଉପରେ ୪ ପ୍ରତିଶତ ସୁଧ ସବସିଡି ପାଇବାକୁ ଯୋଗ୍ୟ ହେବେ। କହିରଖୁଛୁ ଯେ ୫ ବାର୍ଷିକ କିସ୍ତିରେ ପୁସ୍ ବଟନ୍ ମାଧ୍ୟମରେ ଯୋଗ୍ୟ ହିତାଧିକାରୀଙ୍କୁ ୧.୮୦ ଲକ୍ଷ ଟଙ୍କା ସବସିଡି ପ୍ରଦାନ କରାଯିବ।
