ଲରେନ୍ସଙ୍କ ମ୍ୟୁଜିକ ଭିଡିଓରେ ସଲମାନ, ସୋସିଆଲ ମିଡିଆରେ ହେଉଛ ଭାଇରାଲ

ନୂଆଦିଲ୍ଲୀ: ସାବରମତୀ ଜେଲରେ ସଜା କାଟୁଥିବା ଲରେନ୍ସ ବିଷ୍ଣୋଇଙ୍କୁ ନେଇ ନୂଆ ମ୍ୟୁଜିକ ଭିଡିଓ ଆସିଛି । ଯାହାକୁ ନେଇ ସୋସିଆଲ ମିଡିଆରେ ବେଶ୍ ଚହଳ ପଡ଼ିଛି । ଏହି ଆଲବମରେ ସଲମାନ ଖାନ୍, ବାବା ସିଦ୍ଦିକିଙ୍କ ଫଟୋ ମଧ୍ୟ ଦେଖିବାକୁ ମିଳିଛି । ଏଥିରେ ଲରେନ୍ସଙ୍କ ଅଡିଓକୁ ମଧ୍ୟ ବ୍ୟବହାର କରାଯାଇଛି । ଲରେନ୍ସଙ୍କ ମ୍ୟୁଜିକ ଆଲବମକୁ ନେଇ ଯାଞ୍ଚ ଏଜେନ୍ସି ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ । ୨୦୧୦ରେ ପଞ୍ଜାବ ୟୁନିଭର୍ସିଟିରେ ପଢ଼ିବାବେଳେ ଲରେନ୍ସ କଲେଜ ନିର୍ବାଚନରେ ପ୍ରତିଦ୍ୱନ୍ଦିତା କରୁଥିବା ଛାତ୍ରଙ୍କ ଉପରକୁ ଗୁଳିମାଡ଼ କରିଥିଲେ । ଯାହା ପାଇଁ ତାଙ୍କୁ ୩ ମାସର ଜେଲ ଦଣ୍ଡ ଭୋଗିବାକୁ ପଡ଼ିଥିଲା । ଏହାପରେ ସେ ଛାତ୍ର ନିର୍ବାଚନରେ ଛିଡ଼ା ହୋଇ ଜିତିଥିଲେ । ଏପରି ଭାବେ ଅପରାଧିକ କାର୍ଯ୍ୟ କରୁ କରୁ ଲରେନ୍ସ ଏଥିରେ କାୟା ବିସ୍ତାର କରିବାକୁ ଲାଗିଲେ । ବର୍ତ୍ତମାନ ବହୁ ଅପରାଧିକ କାରବାରରେ ଦୋଷୀ ସାବ୍ୟସ୍ତ ହୋଇ ଲରେନ୍ସ ଜେଲରେ ସଜା କାଟୁଛନ୍ତି । କିନ୍ତୁ ଲରେନ୍ସ ବିଷ୍ଣୋଇ ଗ୍ୟାଙ୍ଗ ଏବେବି ଆକ୍ଟିଭ ରହିଛନ୍ତି । ଯେଉଁମାନେ ସଲମାନଙ୍କ ଭଳି କଳାକାରଙ୍କୁ ହତ୍ୟା ଧମକ ଦେବା ସହ ବାବା ସିଦ୍ଦିକିଙ୍କ ହତ୍ୟାରେ ମଧ୍ୟ ସାମିଲ ରହିଛନ୍ତି ।