ଚିକେନ୍ ଦୋକାନ ଉପରେ ବୋମାମାଡ଼, ପୂର୍ବ ଶତ୍ରୁତା ସନ୍ଦେହ
କୋଣାର୍କ: କାକଟପୁର ଥାନା କଟକଣା ଗାଁ ନିକଟରେ ବୋମାମାଡ଼ ଦେଖିବାକୁ ମିଳିଛି । ପୂର୍ବ ଶତ୍ରୁତାକୁ କେନ୍ଦ୍ର କରି ଚିକେନ୍ ଦୋକାନ ଉପରେ ବୋମାମାଡ଼ କରାଯାଇଛି । ଏହି ବୋମାମାଡ଼ରେ ଗୋଟିଏ ବାଇକ୍ ଜଳିଯାଇଛି । ବୋମାମାଡ଼ ଘଟାଇଥିବା ଦୁର୍ବୃତ୍ତଙ୍କୁ ଅଟକ ରଖାଯାଇଥିବା ବେଳେ ପୋଲିସ ଅଧିକ ତଦନ୍ତ ଜାରି ରଖିଛି । ଆହତ ଦୋକାନୀ ଏସ. କେ ସଦାମଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନାରୁ ପ୍ରକାଶ ସୋମବାର ବିଳମ୍ବିତ ରାତିରେ ଏସ. କେ ସଦାମ ନିଜ ଦୋକାନ ଆଗରେ ରଖିଥିବା ବାଇକ୍ ଉପରେ ବସିଥିଲେ । ଏହି ସମୟରେ ଜୁନେଦ ସେଠାରେ ପହଞ୍ଚି ଚିକେନ ଦୋକାନ ଉପରକୁ ୨ଟି ବୋମା ଫିଙ୍ଗିଥିଲେ । ଗୋଟିଏ ବୋମା କାନ୍ଥରେ ବାଜିଥିଲା ବେଳେ ଦ୍ୱିତୀୟଟି ସଦାମ୍ ବସିଥିବା ବାଇକ୍ ଉପରେ ପଡ଼ିଥିଲା । ଫଳରେ ସଦାମଙ୍କ ଗୋଡ଼ରେ ଗଭୀର ଆଘାତ ଲାଗିଥିଲା । ବୋମାମାଡ଼ରେ ସଦାମଙ୍କ ବାଇକ ବି ନଷ୍ଟ ହୋଇଯାଇଛି । ଏହି ଘଟଣାରେ ଅଭିଯୁକ୍ତ ସେକ୍ ଜୁନେଦ ଓରଫ ଗୋରାକୁ ପୁଲିସ ଗିରଫ କରିଥିବା ଜଣାପଡ଼ିଛି । ଏହି ଘଟଣାରେ ପୋଲିସର ଅଧିକ ତଦନ୍ତ ଜାରି ରହିଛି ।
