ଦିନ ଆରମ୍ଭରୁ ଦୁଃଖ ଖବର: ଶୋଇଥିବା ଅବସ୍ଥାରେ ଚାଲିଗଲା ୨ ଶିଶୁଙ୍କ ସମେତ ୬ ଜଣଙ୍କ ଜୀବନ

କଠୁଆ: ସକାଳୁ ସକାଳୁ ଜମ୍ମୁ-କଶ୍ମୀର କଠୁଆସ୍ଥିତ ଶିବ ନଗରରେ ବଡ଼ ଅଘଟଣ ଘଟିଛି । ବିଲ୍ଡିଂରେ ନିଆଁ ଲାଗିବା କାରଣରୁ ୬ ଜଣଙ୍କ ମୃତ୍ୟୁ ଘଟିଛି । ୪ ଜଣ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ୨ ଜଣ ଶିଶୁ ମଧ୍ୟ ରହିଛନ୍ତି । ଆହତମାନଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି । ଭୋର ୨ଟା ବାଜି ୩୦ ମିନିଟରେ ଘରେ ବହଳିଆ ଧୂଆଁ ଦେଖିବାକୁ ମିଳିଥିଲା, ଯାହାପରେ ସ୍ଥାନୀୟ ଲୋକେ ଘଟଣାସ୍ଥଳ ନିକଟକୁ ଧାଇଁ ଆସିଥିଲେ । ବିଲ୍ଡିଂରେ ଥିବା ୧୦ ଜଣଙ୍କୁ ତୁରନ୍ତ ସ୍ଥାନୀୟ ଲୋକଙ୍କ ସହାୟତାରେ ନିକଟସ୍ଥ ଡାକ୍ତରଖାନାକୁ ନିଆଯାଇଥିଲା । କିନ୍ତୁ ସେଠାରେ ଡାକ୍ତର ୬ ଜଣଙ୍କୁ ମୃତ ଘୋଷଣା କରିଥିଲେ । ଧୂଆଁରେ ଅଣନିଶ୍ୱାସୀ ହୋଇ ସେମାନଙ୍କ ମୃତ୍ୟୁ ହୋଇଥିବା ପ୍ରାଥମିକ ତଦନ୍ତରୁ ଅନୁମାନ କରାଯାଉଛି । ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଇ ଦିଆଯାଇଛି । ୪ ଜଣ ଆହତଙ୍କ ଅବସ୍ଥା ଏବେ ଗମ୍ଭୀର ଥିବାବେଳେ ସେମାନଙ୍କ ଚିକିତ୍ସା ଜାରି ରହିଛି । ତେବେ ବିଲ୍ଡିଂରେ କିପରି ନିଆଁ ଲାଗିଲା ତାହା ସ୍ପଷ୍ଟ ହୋଇ ନ ଥିବାବେଳେ ସ୍ଥାନୀୟ ପୋଲିସର ତଦନ୍ତ ଜାରି ରହିଛି ।