ସାମାନ୍ୟ ବଚସାରୁ ଭାଇ ହେଲା ଭଗାରୀ,ଭଉଣୀ ଘର ଉପରେ ପକାଇଲା ବୋମା

ନୟାଗଡ- ସାମାନ୍ୟ ବଚସାରୁ ଭାଇ ହେଲା ଭଗାରୀ । ଭଉଣୀ ଘର ଉପରେ ପକାଇଲା ବୋମା । ଏପରି ଅଭାବନୀୟ ଘଟଣା ଘଟିଛି ନୟାଗଡ ଜିଲ୍ଲାରେ । ବୋମା ମାଡରେ ଭଉଣୀ ଗୁରୁତର ଆହତ ହୋଇଥିବା ବେଳେ ତାଙ୍କ ପରିବାରର ଅନ୍ୟ ୩ ଜଣ ମଧ୍ୟ ଆହତ ହୋଇଛନ୍ତି । ସମସ୍ତଙ୍କ ଚିକିତ୍ସା ନୟାଗଡ ମୁଖ୍ୟ ଚିକିତ୍ସାଳୟରେ ଚାଲିଛି ।

ସୂଚନା ମୁତାବକ, ନୟାଗଡ ଇଟାମାଟି ଥାନା ଅଧୀନ ସଜନପଦ ଗାଁର ମାନସ ମାନସିଂହ ଓ ତାଙ୍କ ସାନ ଭଉଣୀ ମଧ୍ୟରେ ପାରିବାରିକ ବିବାଦକୁ ନେଇ ବଚସା ହୋଇଥିଲା । ଏହା ଉଗ୍ରରୂପ ନେଇଥିଲା । ଭଉଣୀ ବଡ ଭାଇଙ୍କୁ ଯାଛାତା କହିଥିଲେ । ଏଥିରେ ଉତ୍କ୍ଷିପ୍ତ ହୋଇଯାଇଥିଲେ ମାନସ । ଏହାର ପ୍ରତିଶୋଧ ନେବାକୁ ମାନସ ମନସ୍ଥ କରିଥିଲେ ।

ରାଗ ଓ ଅପମାନରେ ଜର୍ଜରିତ ମାନସ ଭଉଣୀ ଉପରେ ପ୍ରତିଶୋଧ ନେବାକୁ ବ୍ୟଗ୍ର ହୋଇଉଠିଥିଲେ । ଭଉଣୀକୁ ଶିକ୍ଷା ନ ଦେଲେ ସେ ରହିପାରିବ ନାହିଁ, ଏମିତି ଅନୁଭବ କରି ଭଉଣୀଙ୍କ ଘର ଉପରେ ବୋମାମାଡ କରିଥିଲେ । ବୋମା ମାଡରେ ଭଉଣୀ ଗୁରୁତର ଭାବେ ଜଳିଯାଇଥିବା ବେଳେ ତାଙ୍କୁ ନୟାଗଡ ମୁଖ୍ୟଚିକିତ୍ସାଳୟରେ ଭର୍ତ୍ତି କରାଯାଇଛି । ପରିବାରର ଅନ୍ୟ ୩ ଜଣ ମଧ୍ୟ ଏହି ଆକ୍ରମଣରେ ଆହତ ହୋଇଛନ୍ତି । ଘଟଣାକୁ ନେଇ ପୋଲିସରେ ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ତେବେ ଘଟଣା ଘଟାଇବା ପରେ ମାନସର ପତ୍ତା ମିଳୁନାହିଁ । ସେ ଫେରାର ହୋଇଯାଇଛି । ପୋଲିସ ମାନସକୁ ଖୋଜୁଛି ।