ଡନ୍ ଛୋଟା ରାଜନର ସ୍ୱାସ୍ଥ୍ୟାବସ୍ଥା ହୋଇଗଲା ଗୁରୁତର, ଦିଲ୍ଲୀ ଏମ୍ସରେ ଭର୍ତ୍ତି

ନୂଆଦିଲ୍ଲୀ: କୁଖ୍ୟାତ ଅଣ୍ଡରୱାର୍ଲ୍ଡ ଡନ୍ ଛୋଟା ରାଜନଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଦିଲ୍ଲୀ ଏମ୍ସ ହସ୍ପିଟାଲରେ ଭର୍ତ୍ତି କରାଯାଇଛି । ରାଜନ ବର୍ତ୍ତମାନ ଦିଲ୍ଲୀର ତିହାର ଜେଲରେ ତାଙ୍କ ସଜା କାଟୁଛନ୍ତି । ସୂତ୍ର ଅନୁସାରେ, ରାଜନ ସାଇନସ୍ ସମସ୍ୟାରେ ପୀଡିତ । ତାଙ୍କର ଅସ୍ତ୍ରୋପଚାର କରାଯାଇପାରେ । ଅନେକ ଅପରାଧ ପାଇଁ କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ହୋଇଥିବା ରାଜନ କିଛି ଦିନ ହେଲା ତିହାର ଜେଲରେ ଅଛନ୍ତି ।

ସେ କିଛି ଦିନ ଧରି ଅସୁସ୍ଥ ଥିଲେ । ତେଣୁ ତାଙ୍କୁ ଦିଲ୍ଲୀର ଏମ୍ସ ହସ୍ପିଟାଲକୁ ଅଣାଯାଇଥିଲା । ଡାକ୍ତରୀ ପରୀକ୍ଷା ପରେ ତାଙ୍କୁ ଅସ୍ତ୍ରୋପଚାର କରିବାକୁ ପଡ଼ିପାରେ ବୋଲି ଡାକ୍ତରମାନେ କହିଛନ୍ତି ।

ହୋଇପାରେ ସର୍ଜରୀ: ଏହା ପ୍ରଥମ ଥର ନୁହେଁ ଯେ ରାଜନଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ଜେଲ ପ୍ରଶାସନ ତାଙ୍କ ସ୍ୱାସ୍ଥ୍ୟାବସ୍ଥା ଉପରେ ନଜର ରଖିଛି । ଅନ୍ୟପକ୍ଷରେ, ଏମ୍ସର ଡାକ୍ତରମାନେ କେବେ ତାଙ୍କ ଅସ୍ତ୍ରୋପଚାର କରିବେ ଏବଂ ତାଙ୍କ ଅସୁସ୍ଥତା କେତେ ଗମ୍ଭୀର, ସେ ବିଷୟରେ କୌଣସି ସରକାରୀ ସୂଚନା ନାହିଁ । ଛୋଟା ରାଜନର ପ୍ରକୃତ ନାମ ରାଜେନ୍ଦ୍ର ସଦାଶିବ ନିକାଲଜେ ଏବଂ ସେ ଥରେ ମୁମ୍ବାଇ ଅଣ୍ଡରୱାର୍ଲ୍ଡର ଆତଙ୍କୀ ଥିଲେ ।

୨୦୧୫ ମସିହାରେ, ତାଙ୍କୁ ଇଣ୍ଡୋନେସିଆର ବାଲିରେ ଗିରଫ କରାଯାଇଥିଲା । ତା’ପରେ ତାଙ୍କୁ ଭାରତ ଅଣାଗଲା । ଅଧିକାରୀମାନେ କହିଛନ୍ତି ଯେ ରାଜନଙ୍କୁ ଏମ୍ସରେ ଭର୍ତ୍ତି କରାଯିବା ପରେ ହସ୍ପିଟାଲରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି । ରାଜନ ଥରେ ଅଣ୍ଡରୱାର୍ଲ୍ଡ ଡନ୍ ଦାଉଦ୍ ଇବ୍ରାହିମର ନିକଟତର ଥିଲା । କୁହାଯାଏ ଯେ ମୁମ୍ବାଇରେ ବିସ୍ଫୋରଣ ଏବଂ ଦଙ୍ଗା ପରେ ରାଜନ ଏବଂ ଦାଉଦ ଅଲଗା ହୋଇଯାଇଥିଲେ ।