ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ଉତ୍ସବରେ ଯୋଗଦେବେ ଭାରତର ‘ଚାଣକ୍ୟ’, ନୂଆ ଆମେରିକା ସରକାରଙ୍କ ସହିତ ବୃଦ୍ଧି କରିବେ ବନ୍ଧୁତା

ୱାଶିଂଟନ: ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆମେରିକାର ୪୭ତମ ରାଷ୍ଟ୍ରପତି ଭାବରେ ଶପଥ ନେବାକୁ ଯାଉଛନ୍ତି । ଏହି ଶପଥ ଗ୍ରହଣ ସମାରୋହକୁ ଭାରତକୁ ମଧ୍ୟ ନିମନ୍ତ୍ରଣ କରାଯାଇଛି । ଭାରତ ସରକାରଙ୍କ ପକ୍ଷରୁ ବୈଦେଶିକ ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ଆମେରିକା ଯିବେ । ଏ ସମ୍ପର୍କରେ ଭାରତ ପକ୍ଷରୁ ଏକ ବିବୃତ୍ତି ଜାରି କରାଯାଇଛି । ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, ‘ଟ୍ରମ୍ପ୍-ଭାନ୍ସ ଉଦଘାଟନ କମିଟିର ନିମନ୍ତ୍ରଣ କ୍ରମେ ଭାରତର ବୈଦେଶିକ ମନ୍ତ୍ରୀ ଡକ୍ଟର ଏସ୍ ଜୟଶଙ୍କର ଆମେରିକାର ୪୭ତମ ରାଷ୍ଟ୍ରପତି ଭାବରେ ନିର୍ବାଚିତ ଡୋନାଲ୍ଡ ଜେ. ଟ୍ରମ୍ପଙ୍କୁ ସ୍ୱାଗତ କରିବେ । ଟ୍ରମ୍ପଙ୍କ ଶପଥ ଗ୍ରହଣ ଉତ୍ସବରେ ଭାରତକୁ ପ୍ରତିନିଧିତ୍ୱ କରିବେ ।

ବିବୃତ୍ତିରେ ଆହୁରି କୁହାଯାଇଛି ଯେ, ଏହି ଗସ୍ତ ସମୟରେ ବୈଦେଶିକ ମନ୍ତ୍ରୀ ଜୟଶଙ୍କର ନୂଆ ଆମେରିକୀୟ ପ୍ରଶାସନର ପ୍ରତିନିଧିମାନଙ୍କୁ ଭେଟିବେ । ଏହା ସହିତ, ଏହି ବିଶେଷ ଅବସରରେ ଆମେରିକା ଗସ୍ତରେ ଆସୁଥିବା ଅନ୍ୟ ଦେଶର ମାନ୍ୟଗଣ୍ୟ ବ୍ୟକ୍ତିଙ୍କ ସହ ମିଟିଂ ହେବ । ଏହି ଗସ୍ତ କେବଳ ଭାରତ-ଆମେରିକା ସମ୍ପର୍କକୁ ଆହୁରି ମଜବୁତ କରିବାର ସୁଯୋଗ ପ୍ରଦାନ କରିବ ନାହିଁ ବରଂ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ଏବଂ ବିଶ୍ୱସ୍ତରୀୟ ଆଲୋଚନା ପାଇଁ ଏକ ମଞ୍ଚ ହେବ । ବୈଦେଶିକ ମନ୍ତ୍ରୀ ଜୟଶଙ୍କରଙ୍କ କୂଟନୀତି ବିଷୟରେ ପ୍ରତିଦିନ ଆଲୋଚନା ଚାଲିଛି । ଏହି କାରଣରୁ ତାଙ୍କୁ ଆଧୁନିକ ଯୁଗରେ ଭାରତର ‘ଚାଣକ୍ୟ’ ବୋଲି କୁହାଯାଏ ।

ଶପଥ ଗ୍ରହଣ ଉତ୍ସବ କ୍ୟାପିଟଲ ଭବନ ସମ୍ମୁଖରେ ହେବ ଅନୁଷ୍ଠିତ:
ଡୋନାଲ୍ଡ ଟ୍ରମ୍ପ ଦ୍ୱିତୀୟ ଥର ପାଇଁ ଆମେରିକାର ରାଷ୍ଟ୍ରପତି ଭାବରେ ଶପଥ ନେବେ । ଏହି ଶପଥ ଗ୍ରହଣ ସମାରୋହ ଆମେରିକାର କ୍ୟାପିଟଲ ଭବନ ସମ୍ମୁଖରେ ଅନୁଷ୍ଠିତ ହେବ । ଆମେରିକା ସୁପ୍ରିମକୋର୍ଟର ମୁଖ୍ୟ ବିଚାରପତି ଶପଥ ପାଠ କରାଇବେ । ଶପଥ ଗ୍ରହଣ ପରେ, ଟ୍ରମ୍ପ ଆମେରିକୀୟ ଜନତାଙ୍କ ଉଦ୍ଦେଶ୍ୟରେ ତାଙ୍କର ପ୍ରଥମ ଭାଷଣ ଦେବେ । ବିଦାୟୀ ରାଷ୍ଟ୍ରପତି ଜୋ ବାଇଡେନ ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେବେ ଏବଂ କ୍ଷମତା ହସ୍ତାନ୍ତରର ସାକ୍ଷୀ ହେବେ । ୨୦୨୦ ରାଷ୍ଟ୍ରପତି ନିର୍ବାଚନରେ ଟ୍ରମ୍ପଙ୍କୁ ପରାଜୟର ସାମ୍ନା କରିବାକୁ ପଡିଥିଲା । ତା’ପରେ ଡୋନାଲ୍ଡ ଟ୍ରମ୍ପ ବାଇଡେନଙ୍କ ଶପଥ ଗ୍ରହଣ ଉତ୍ସବରେ ସାମିଲ ହୋଇନଥିଲେ ।

ବାଇଡେନଙ୍କ ଶେଷ ସମ୍ବୋଧନ:
ଟ୍ରମ୍ପଙ୍କ ଦ୍ୱାରା ଅନେକ ଅନ୍ୟ ବିଶ୍ୱ ନେତାଙ୍କୁ ମଧ୍ୟ ନିମନ୍ତ୍ରଣ କରାଯାଇଛି । ଆର୍ଜେଣ୍ଟିନା ରାଷ୍ଟ୍ରପତି ଜାଭିୟର ମିଲି ଏବଂ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏହି କାର୍ଯ୍ୟକ୍ରମରେ ଯୋଗଦେବେ ବୋଲି ଜଣାପଡ଼ିଛି । ଏହି ସମୟରେ, ବିଦାୟୀ ଆମେରିକା ରାଷ୍ଟ୍ରପତି ଜୋ ବାଇଡେନ ବୁଧବାର ରାତି ୮ଟାରେ ତାଙ୍କର ଶେଷ ଅଭିଭାଷଣ ଦେବେ ।