ଏସସି-ଓବିସି ପିଲାଙ୍କ ପାଇଁ ସରକାରଙ୍କ ବଡ଼ ଘୋଷଣା, ମାଗଣାରେ ହେବ ମେଡିକାଲ-ଇଞ୍ଜିନିୟରିଂ ପାଠପଢ଼ା !
ନୂଆଦିଲ୍ଲୀ: ଯଦି ଆପଣ ଏସସି ଏବଂ ଓବିସି ବର୍ଗରେ ଆସୁଛନ୍ତି, ତେବେ ଆପଣଙ୍କ ପାଇଁ ଏକ ବଡ଼ ଖବର । ହରିୟାଣା ସରକାର ଏବେ ରାଜ୍ୟର ଅନୁସୂଚିତ ଜାତି ଏବଂ ଓବିସି ବର୍ଗର ପିଲାମାନଙ୍କ ଡାକ୍ତରୀ ଏବଂ ଇଞ୍ଜିନିୟରିଂ ଶିକ୍ଷାର ସମ୍ପୂର୍ଣ୍ଣ ଖର୍ଚ୍ଚ ବହନ କରିବେ ।
ଏହି ବର୍ଗର ପିଲାମାନଙ୍କୁ ଦେଶର କୌଣସି ଶିକ୍ଷାନୁଷ୍ଠାନରୁ ଡାକ୍ତରୀ କିମ୍ବା ଇଞ୍ଜିନିୟରିଂ ପଢ଼ିବା ପାଇଁ କୌଣସି ଟଙ୍କା ଖର୍ଚ୍ଚ କରିବାକୁ ପଡ଼ିବ ନାହିଁ, ବରଂ ସରକାର ନିଜେ ଏହି ଖର୍ଚ୍ଚ ବହନ କରିବେ । ଏହା ନିଜେ ହରିୟାଣା ମୁଖ୍ୟମନ୍ତ୍ରୀ ନାୟବ ସିଂହ ସାଇନି ଘୋଷଣା କରିଛନ୍ତି ।
ସାଇନି କ’ଣ କହିଲେ ?
ହରିୟାଣାର ମୁଖ୍ୟମନ୍ତ୍ରୀ ନାଇବ ସିଂହ ସାଇନି କହିଛନ୍ତି ଯେ, ଯଦି ହରିୟାଣାର ଅନୁସୂଚିତ ଜାତି ଏବଂ ଓବିସି ବର୍ଗର ପିଲାମାନେ ଦେଶର ଯେକୌଣସି ସ୍ଥାନରୁ ଡାକ୍ତରୀ ଏବଂ ଇଞ୍ଜିନିୟରିଂ ପଢ଼ନ୍ତି, ତେବେ ସରକାର ଏହାର ୧୦୦% ଖର୍ଚ୍ଚ ବହନ କରିବେ ।
ସେ କହିଛନ୍ତି ଯେ ଏଥିପାଇଁ ଖୁବ୍ ଶୀଘ୍ର ଏକ ଅଲଗା ଅନଲାଇନ୍ ପୋର୍ଟାଲ୍ ମଧ୍ୟ ଆରମ୍ଭ କରାଯିବ । ଗୁରୁଗ୍ରାମରେ ମହାତ୍ମା ଜ୍ୟୋତିବା ଫୁଲେଙ୍କ ଜନ୍ମବାର୍ଷିକୀରେ ନାଇବ ସିଂହ ସାଇନି ଏହି ଘୋଷଣା କରିଛନ୍ତି ।
ଉଚ୍ଚଶିକ୍ଷା ପାଇଁ ୧୫ ଲକ୍ଷ ଟଙ୍କାର ଋଣ :
ମୁଖ୍ୟମନ୍ତ୍ରୀ ନାଇବ ସିଂହ ସାଇନି ମଧ୍ୟ ଓବିସି କ୍ରିମି ଲେୟାର ପାଇଁ ପରିବାରର ବାର୍ଷିକ ଆୟ ସୀମା ୬ ଲକ୍ଷରୁ ୮ ଲକ୍ଷକୁ ବୃଦ୍ଧି କରିବାକୁ ଘୋଷଣା କରିଛନ୍ତି । ସାଇନି ଏହା ମଧ୍ୟ କହିଛନ୍ତି ଯେ ରାଜ୍ୟରେ, ୩ ଲକ୍ଷ ଟଙ୍କା ପର୍ଯ୍ୟନ୍ତ ବାର୍ଷିକ ଆୟ ଥିବା ପଛୁଆ ବର୍ଗ ପରିବାରର ପିଲାମାନଙ୍କୁ ଦେଶର ଯେକୌଣସି କଲେଜରେ ପଢ଼ିବା ପାଇଁ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଦିଆଯାଏ । ଏହା ସହିତ ବିଦେଶୀ କଲେଜରେ ପଢ଼ିବା ପାଇଁ ୨୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ମାତ୍ର ୪% ବାର୍ଷିକ ସୁଧରେ ଦିଆଯାଏ ।