ସରିଗଲା ସୋନମ ରଘୁବଂଶୀଙ୍କ ବାହାଘର! କିଏ ତାଙ୍କ ନୂଆ ସ୍ୱାମୀ?

ମେଘାଳୟ: ସରିଗଲା ସୋନମ ରଘୁବଂଶୀଙ୍କ ବାହାଘର! କିନ୍ତୁ କିଏ ତାଙ୍କ ନୂଆ ସ୍ୱାମୀ? ଦିନ ଯେତେ ଗଡି ଗଡି ଯାଉଛି ରାଜା ରଘୁବଂଶୀ ଏବଂ ସୋନମଙ୍କ ମାମଲାକୁ ନେଇ ସେତେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ସେହିଭଳି ଏହି ହତ୍ୟା ମାମଲାକୁ ନେଇ ଏକ ନୂଆ ଖବର ସାମ୍ନାକୁ ଆସିଛି।

ରାଜାଙ୍କ ବଡ଼ ଭାଇ ବିପିନ ରଘୁବଂଶୀ ଗଣମାଧ୍ୟମ ସମ୍ମୁଖରେ ଦାବି କରିଛନ୍ତି ଯେ ସୋନମ ତାଙ୍କ ପ୍ରେମିକଙ୍କୁ ବିବାହ କରିଛନ୍ତି। ସେ ଦାବି କରି କହିଛନ୍ତି ଯେ, ‘ଆମେ ଜାଣିବାକୁ ପାଇଛୁ ମେଘାଳୟ ପୋଲିସ ଦୁଇଟି ମଙ୍ଗଳସୂତ୍ର ଉଦ୍ଧାର କରିଛି।

ପରମ୍ପରା ଅନୁଯାୟୀ ସୋନମଙ୍କୁ ଗୋଟିଏ ମଙ୍ଗଳସୂତ୍ର ଉପହାର ଦିଆଯାଇଥିଲା, ଯେତେବେଳେ ସେ ଏବଂ ରାଜା ମେ ୧୧ ତାରିଖରେ ବିବାହ କରିଥିଲେ। ଦ୍ୱିତୀୟ ମଙ୍ଗଳସୂତ୍ର ସୋନମ ଏବଂ କୁଶୱାହାଙ୍କ ବିବାହ ସହିତ ଜଡିତ ହୋଇପାରେ। ସମ୍ଭବତଃ ସେମାନେ ଏଠାରେ ଲୁଚି ରହିଥିବା ସମୟରେ ବିବାହ କରିଥିବେ।’

ସେହି ସମୟରେ, ବିପିନ ଏହି ମାମଲାକୁ ହାଇକୋର୍ଟ ଏବଂ ଆବଶ୍ୟକ ହେଲେ ସୁପ୍ରିମକୋର୍ଟକୁ ନେବା ବିଷୟରେ କହିଥିଲେ। ସେ କହିଥିଲେ ଯେ ଆମ ଭାଇକୁ ନିଶ୍ଚୟ ନ୍ୟାୟ ମିଳିବ।

କେବଳ ଏତିକି ନୁହେଁ, ବିପିନ ସୋନମଙ୍କ ଭାଇ ଗୋବିନ୍ଦଙ୍କ ଭୂମିକା ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ଯେତେବେଳେ ଗୋବିନ୍ଦ ଏକ ବିବୃତ୍ତିରେ କହିଥିଲେ ଯେ ସେ ତାଙ୍କ ଭଉଣୀ ସୋନମଙ୍କୁ ଭେଟିବା ପାଇଁ ମେଘାଳୟ ଯାଇଥିଲେ। ଏହା ପରେ ରାଜାଙ୍କ ପରିବାରର ବିବୃତ୍ତି ଆସିଛି।

ରାଜାଙ୍କ ବଡ଼ ଭାଇ ବିପିନଙ୍କ ଅନୁଯାୟୀ, ଗୋବିନ୍ଦ ପୂର୍ବରୁ ତାଙ୍କ ଘରକୁ ଆସି କହିଥିଲେ ଯେ ସୋନମ ଦୋଷୀ ଏବଂ ତାଙ୍କର ତାଙ୍କ ସହିତ କୌଣସି ସମ୍ପର୍କ ନାହିଁ। କିନ୍ତୁ ଏବେ ଗୋବିନ୍ଦ ତାଙ୍କ ଭଉଣୀଙ୍କୁ ବଞ୍ଚାଇବାକୁ ଚେଷ୍ଟା କରୁଛନ୍ତି, ଯାହା ଆଶ୍ଚର୍ଯ୍ୟଜନକ।