ODI କ୍ୟାପ୍ଟେନ ହେବେ କି ଶୁଭମନ ଗିଲ୍? ହୋଇପାରେ ରୋହିତ ଶର୍ମାଙ୍କ ଖେଳ ଖତମ୍!

ନୂଆଦିଲ୍ଲୀ: ଟେଷ୍ଟ କ୍ରିକେଟ୍ ଏବଂ ଟି-୨୦ରୁ ଅବସର ନେଇଥିବା ରୋହିତ ଶର୍ମା ଏବେ କେବଳ ଓ୍ବାନଡେ ଖେଳିବେ । ସେ ଏବେ ଓ୍ବାନଡେ କ୍ରିକେଟର କ୍ୟାପ୍ଟେନ ରହିଛନ୍ତି ।

ତାଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ନିକଟରେ ଚାମ୍ପିଅନ୍ସ ଟ୍ରଫି ଜିତିଥିଲା । ହେଲେ ଏହାରି ଭିତରେ ଏକ ଖବର ବେଶ ଚର୍ଚ୍ଚା ହେଉଛି । ତାଙ୍କଠାରୁ ଓ୍ବାନଡେ ଅଧିନାୟକତ୍ୱ ଛଡ଼ାଇ ନିଆଯାଇପାରେ ।

ରିପୋର୍ଟ ଅନୁଯାୟୀ, ଶୁଭମନ ଗିଲଙ୍କୁ ଟେଷ୍ଟ ପରେ ଦିନିକିଆ କ୍ରିକେଟରେ ଟିମ୍ ଇଣ୍ଡିଆର ଅଧିନାୟକ କରାଯାଇପାରେ । ତଥାପି, ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଏପର୍ଯ୍ୟନ୍ତ ଏହାକୁ ନିଶ୍ଚିତ କରିନାହିଁ । ଭାରତୀୟ ଦଳ ଅଗଷ୍ଟରେ ଶ୍ରୀଲଙ୍କା ସହିତ ଏକ ଓ୍ବାନଡେ ସିରିଜ୍ ଖେଳିପାରେ ।

ଅଗଷ୍ଟରେ ବଡ଼ ଫୈସଲା- ଇଂଲଣ୍ଡ ଗସ୍ତ ପରେ, ଭାରତୀୟ ଦଳ ଶ୍ରୀଲଙ୍କା ବିପକ୍ଷରେ ଏକ ODI ସିରିଜ୍ ଖେଳିପାରେ । ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ସିରିଜ୍ ପାଇଁ BCCI ଏବଂ ଶ୍ରୀଲଙ୍କା କ୍ରିକେଟ୍ ବୋର୍ଡ ମଧ୍ୟରେ ଆଲୋଚନା ଆରମ୍ଭ ହୋଇଛି ।

ଯଦି ସବୁକିଛି ଠିକ୍ ରହେ, ତେବେ ଟିମ୍ ଇଣ୍ଡିଆ ଏବଂ ଶ୍ରୀଲଙ୍କା ମଧ୍ୟରେ ତିନୋଟି ODI ଏବଂ ତିନୋଟି T20 ମ୍ୟାଚ୍ ଖେଳାଯିବ । ରୋହିତ ଶର୍ମା ଏବଂ ବିରାଟ କୋହଲି ODI ସିରିଜ୍ ରେ ଫେରିପାରନ୍ତି, କିନ୍ତୁ ଏହି ସମୟ ମଧ୍ୟରେ ଦଳର ଅଧିନାୟକ କିଏ ହେବେ ସେନେଇ ବୋର୍ଡ ଖୁବଶୀଘ୍ର ନିଷ୍ପତ୍ତି ନେଇପାରେ ।

ରୋହିତ ଶର୍ମା ଏବଂ ବିରାଟ କୋହଲି କେବଳ ODI ମ୍ୟାଚ୍ ଖେଳିବାର ଦେଖାଯିବେ । ଏହି ଉଭୟ ଖେଳାଳି 2027 ମସିହାରେ ODI ବିଶ୍ୱକପ୍ ପର୍ଯ୍ୟନ୍ତ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି, କିନ୍ତୁ ସବୁକିଛି ସେମାନଙ୍କ ଫିଟନେସ୍ ଉପରେ ନିର୍ଭର କରିବ । ବର୍ତ୍ତମାନ ରୋହିତ ଶର୍ମାଙ୍କୁ ODI ଅଧିନାୟକ ପଦରୁ ଛଡ଼ାଇ ନିଆଯାଇପାରେ ବୋଲି ଚର୍ଚ୍ଚା ହେଉଛି ।