US Tariff On India: ଖୁବ ଶୀଘ୍ର ଶେଷ ହେବ ଟାରିଫ ବିବାଦ, ଆମେରିକା ରାଜଦୂତ ଦେଲେ ବଡ଼ ସୂଚନା
ଭାରତ ଏବଂ ଆମେରିକା ମଧ୍ୟରେ ଟାରିଫ ବିବାଦ ଏବେ ଶେଷ ହେବାକୁ ଯାଉଛି। କିଛି ସପ୍ତାହ ମଧ୍ୟରେ ଦୁଇ ଦେଶ ମଧ୍ୟରେ ଏକ ଟାରିଫ ଡିଲ ସ୍ୱାକ୍ଷରିତ ହୋଇପାରେ।
ନୂଆଦିଲ୍ଲୀ: ଆମେରିକାର ରାଷ୍ଟ୍ରପତିଙ୍କ ଦ୍ୱାରା ଆରମ୍ଭ ହୋଇଥିବା ଟାରିଫ ମାଡ଼ ସମଗ୍ର ବିଶ୍ବ ଉପରେ ପଡ଼ିଥିବା ବେଳେ ଭାରତ ବି ସେଥିରୁ ବାଦ ପଡ଼ିନି । ଆମେରିକା ବର୍ତ୍ତମାନ ଦେଶ ଉପରେ 50 ପ୍ରତିଶତ ଶୁଳ୍କ ଲାଗୁ କରିଛି। ବାଣିଜ୍ୟ ଚୁକ୍ତି ସମ୍ପର୍କରେ ମାମଲା ଏପର୍ଯ୍ୟନ୍ତ ବିଚାରାଧୀନ ଅଛି।
କିନ୍ତୁ ଏହି ସମୟ ମଧ୍ୟରେ, ଭାରତରେ ପରବର୍ତ୍ତୀ ଆମେରିକୀୟ ରାଷ୍ଟ୍ରଦୂତ ସେର୍ଜିଓ ଗୋର୍ ଟାରିଫ ସମ୍ପର୍କରେ ଏକ ବଡ଼ ସୂଚନା ଦେଇଛନ୍ତି। ସେ କହିଛନ୍ତି ଯେ ଭାରତ ଏବଂ ଆମେରିକା ମଧ୍ୟରେ ଟାରିଫ ସମସ୍ୟାର ସମାଧାନ ଖୁବ୍ ଶୀଘ୍ର ହୋଇପାରେ। ସେ ଚୁକ୍ତି ବା ଡିଲକୁ ନେଇ ଏକ ପଜିଟିଭ୍ ସଙ୍କେତ ଦେଇଛନ୍ତି।
ତାଙ୍କ ନିଯୁକ୍ତି ନିଶ୍ଚିତ କରିବା ପାଇଁ ଡକାଯାଇଥିବା ଏକ ବୈଠକରେ ସେର୍ଜିଓ ଗୋର୍ କହିଛନ୍ତି ଯେ, ଭାରତ ଏବଂ ଆମେରିକା ମଧ୍ୟରେ ବନ୍ଧୁତା ବହୁତ ଗଭୀର ଏବଂ ଶୁଳ୍କ କ୍ଷେତ୍ରରେ ଉଭୟ ଦେଶ ବହୁତ ନିକଟତର। ଆଗାମୀ କିଛି ସପ୍ତାହ ମଧ୍ୟରେ ଏ ସମ୍ପର୍କରେ ନିଷ୍ପତ୍ତି ନିଆଯାଇପାରେ। କିଛି ଦିନ ପୂର୍ବରୁ, ରୁଷୀୟ ତେଲ କିଣିବା ନେଇ ଦୁଇ ଦେଶ ମଧ୍ୟରେ ମତଭେଦ ଥିଲା । କିନ୍ତୁ ଗୋର ବିଶ୍ୱାସ କରନ୍ତି ଯେ, ଏହି ବିବାଦ ଅଧିକ ଦିନ ଚାଲିବ ନାହିଁ।
ରୁଷୀୟ ତେଲ ଉପରେ ମଧ୍ୟ ବୟାନ ଆସିଥିଲା
ଆମେରିକି ରାଷ୍ଟ୍ରଦୂତ କହିଛନ୍ତି ଯେ ଭାରତକୁ ରୁଷୀୟ ତେଲ କିଣିବା ବନ୍ଦ କରିବା ଟ୍ରମ୍ପ ପ୍ରଶାସନର ପ୍ରାଥମିକତା। ତଥାପି, ଉଭୟ ଦେଶ ବିବାଦର ସମାଧାନ ପାଇଁ ବହୁତ ନିକଟତର ଏବଂ ଆମର ଭାରତଠାରୁ ବହୁତ ଆଶା ଅଛି। ସେ ଏହା ମଧ୍ୟ କହିଛନ୍ତି ଯେ ରାଷ୍ଟ୍ରପତି ଟ୍ରମ୍ପ ଭାରତକୁ ସମାଲୋଚନା କରନ୍ତି କିନ୍ତୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜଣେ ଭଲ ବନ୍ଧୁ। ସେ ଏହା ମଧ୍ୟ କହିଛନ୍ତି ଯେ, ଭାରତ ଏବଂ ଆମେରିକା ମଧ୍ୟରେ ସମ୍ପର୍କ ଚୀନ୍ ମଧ୍ୟରେ ସମ୍ପର୍କ ତୁଳନାରେ ଏବେ ଅଧିକ ସରଗରମ ଅଛି ।
ଚୁକ୍ତି କେଉଁଠି ଅଟକି ରହିଛି?
ଆମେରିକି ରାଷ୍ଟ୍ରପତି ପାରସ୍ପରିକ ଟାରିଫ ଘୋଷଣା କରିବା ପରଠାରୁ ଆମେରିକା ଏବଂ ଭାରତ ମଧ୍ୟରେ ଏହି ଡିଲ ବିଷୟରେ ଆଲୋଚନା ଚାଲିଛି। କିନ୍ତୁ ତା’ପରେ ମଧ୍ୟ, ଡିଲ ଏପର୍ଯ୍ୟନ୍ତ ହୋଇପାରି ନାହିଁ। ଫଳସ୍ୱରୂପ, ଆମେରିକା ଭାରତ ଉପରେ 50 ପ୍ରତିଶତ ଶୁଳ୍କ ବା ଟାରିଫ ଲାଗୁ କରିଛି। ବାସ୍ତବରେ, ଆମେରିକା ଭାରତର ଦୁଗ୍ଧ କ୍ଷେତ୍ର ବା ଡାଏରୀ ସେକ୍ଟର ଏବଂ ଜାପାନ ପରି କୃଷି କ୍ଷେତ୍ରରେ ଏହାର ଉତ୍ପାଦ ବିକ୍ରି କରିବାକୁ ଚାହୁଁଛି । ଯାହା ସମ୍ପର୍କରେ ପ୍ରଧାନମନ୍ତ୍ରୀ ମୋଦି ଏକ ବିବୃତ୍ତି ଦେଇଛନ୍ତି ଯେ ଆମେ ଦେଶର କୃଷକମାନଙ୍କ ସ୍ୱାର୍ଥ ସହିତ ସାଲିସ କରିବୁ ନାହିଁ।
ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ
ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ ସମ୍ପର୍କ ଏପର୍ଯ୍ୟନ୍ତ ବହୁତ ଭଲ ରହିଛି । ଏହାର ଏକ କାରଣ ହେଉଛି ଦୁଇ ଦେଶ ମଧ୍ୟରେ ପିପୁଲ ଟୁ ପିପୁଲ ସମ୍ପର୍କ ମଧ୍ୟ ଉତ୍କୃଷ୍ଟ। ଆମେରିକା ସରକାରଙ୍କ ତଥ୍ୟ ଅନୁଯାୟୀ, 2024 ମସିହାରେ ଆମେରିକା ଏବଂ ଭାରତ ମଧ୍ୟରେ ମୋଟ ବାଣିଜ୍ୟ $129.2 ବିଲିୟନ ଥିଲା। ଏହି ସମୟ ମଧ୍ୟରେ, ଆମେରିକା ଭାରତକୁ $41.8 ବିଲିୟନ ରପ୍ତାନି କରିଥିଲା ଏବଂ ଭାରତ ଆମେରିକାକୁ $87.4 ବିଲିୟନ ରପ୍ତାନି କରିଥିଲା। ଏଥିରେ ଅଟୋରୁ ଆରମ୍ଭ କରି ଟେକ୍ସଟାଇଲ୍ ଇଣ୍ଡଷ୍ଟ୍ରି ଏହା ଭିତରେ ଅନ୍ତର୍ଭୁକ୍ତ।