ବିଜେଡି ସଭାପତି ନବୀନଙ୍କୁ ଚିଠି ଲେଖିଲେ ପ୍ରତାପ ଜେନା, ସସ୍ମିତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ କଲେ ଦାବି

ଭୁବନେଶ୍ୱର: ରାଜ୍ୟସଭା ସାଂସଦ ସସ୍ମିତ ପାତ୍ରଙ୍କ ବିରୋଧରେ ଚିଠି କଲେ ପ୍ରତାପ ଜେନା। ବିଜେଡି ସଭାପତି ନବୀନ ପଟ୍ଟନାୟକଙ୍କୁ ପ୍ରତାପ ଜେନା ଚିଠି ଲେଖିଛନ୍ତି। ଚିଠି ଲେଖି ସେ ସସ୍ମିତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।

ୱାକଫ ବିଲ୍ ସପକ୍ଷରେ ସସ୍ମିତଙ୍କ ଭୋଟ୍ ନେଇ ଚିଠି ଲେଖିଛନ୍ତି ପ୍ରତାପ ଜେନା। ସେ ଏହି ଚିଠିରେ ଲେଖିଛନ୍ତି, “ସୋସିଆଲ ମିଡିଆରେ ସସ୍ମିତଙ୍କ ଦଳବିରୋଧୀ ଆଭିମୁଖ୍ୟ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏହି ମନ୍ତବ୍ୟ ଅତ୍ୟନ୍ତ ଦୁର୍ଭାଗ୍ୟଜନକ ଓ ପୀଡ଼ାଦାୟକ। ଏହା ପଛରେ ଗଭୀର ଷଡ଼ଯନ୍ତ୍ର ଥିବା ମୋର ହୃଦବୋଧ ହେଉଛି। ଷଡ଼ଯନ୍ତ୍ର ପଛରେ କିଏ ତାର ଅନୁଧ୍ୟାନ ହେବ ଆବଶ୍ୟକ ରହିଛି।”

ତାସ୍‌କେଣ୍ଟରୁ ଫେରିଲେ କହିବି: ୱକ୍‌ଫ ବିଲ୍‌କୁ ନେଇ ସାଂସଦ ସସ୍ମିତ ପାତ୍ରଙ୍କ ପ୍ରତିକ୍ରିୟା ସାମ୍ନାକୁ ଆସିଛି। ସସ୍ମିତ କହିଛନ୍ତି ଯେ, ମୁଁ ତାସ୍‌କେଣ୍ଟ ଗସ୍ତରେ ଅଛି। ସଂସଦ ପ୍ରତିନିଧିଙ୍କ ସହ ତାସ୍‌କେଣ୍ଟ ଆସିଛି। ତାସ୍‌କେଣ୍ଟରୁ ଫେରିବା ପରେ ମୁଁ ପ୍ରତିକ୍ରିୟା ଦେବି ବୋଲି ସସ୍ମିତ ପାତ୍ର କହିଛନ୍ତି।