ତୁର୍କୀ କଳାକାରଙ୍କୁ ବ୍ୟାନ କଲା ବଲିଉଡ, ସେଠାରେ ଶୁଟିଂ ମଧ୍ୟ କରିବେ ନାହିଁ

ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ବିବାଦରେ ତୁର୍କୀ ଲଗାତାର ପାକିସ୍ତାନକୁ ସମର୍ଥନ କରୁଛି। ଏହାର ପ୍ରତିକ୍ରିୟା ସ୍ୱରୂପ ଭାରତରେ ‘ବାୟକଟ ତୁର୍କୀ’ ଅଭିଯାନ ଆରମ୍ଭ ହୋଇଛି। ବିଭିନ୍ନ କ୍ଷେତ୍ରରୁ ତୁର୍କୀର ବିରୋଧ ଆରମ୍ଭ ହୋଇଥିବା ବେଳେ ଏବେ ଭାରତୀୟ ଚଳଚ୍ଚିତ୍ର ଶିଳ୍ପ ମଧ୍ୟ ଏହି ଅଭିଯାନରେ ସାମିଲ ହୋଇଛି। ଅଲ ଇଂଡିଆ ସିନେ ୱାର୍କର୍ସ ଆସୋସିଏସନ (AICWA) ତୁର୍କୀରେ ଭାରତୀୟ ଚଳଚ୍ଚିତ୍ର ଓ ଟିଭି ଶୋ ଶୁଟିଂ ଉପରେ ସମ୍ପୂର୍ଣ୍ଣ ପ୍ରତିବନ୍ଧକ ଲଗାଇଛି।

AICWAର କଡ଼ା ନିଷ୍ପତ୍ତି
AICWA, ଯାହା ଭାରତୀୟ ଚଳଚ୍ଚିତ୍ର ଶିଳ୍ପର ଶ୍ରମିକ, ଟେକ୍ନିସିଆନ, କଳାକାର ଓ ପ୍ରଫେସନାଲଙ୍କୁ ପ୍ରତିନିଧିତ୍ୱ କରେ, ଏକ ଆନୁଷ୍ଠାନିକ ଘୋଷଣାରେ କହିଛି ଯେ ତୁର୍କୀରେ କୌଣସି ବଲିଉଡ କିମ୍ବା ଭାରତୀୟ ଚଳଚ୍ଚିତ୍ର ପ୍ରୋଜେକ୍ଟର ଶୁଟିଂ ହେବ ନାହିଁ। ଏହି ନିଷ୍ପତ୍ତି ତୁର୍କୀର ପାକିସ୍ତାନ ପ୍ରତି ଲଗାତାର ସମର୍ଥନ ଏବଂ ଭାରତ ବିରୋଧୀ ଆଭିମୁଖ୍ୟକୁ ଦୃଷ୍ଟିରେ ରଖି ନିଆଯାଇଛି। ଏହା ସହିତ, ତୁର୍କୀର କଳାକାର, ନିର୍ମାତା ଓ ପ୍ରୋଡକ୍ସନ ହାଉସଗୁଡ଼ିକୁ ଭାରତୀୟ ଚଳଚ୍ଚିତ୍ର ଶିଳ୍ପରେ କାମ କରିବା ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି।

କାହିଁକି ଏହି ନିଷ୍ପତ୍ତି?
ଭାରତ-ପାକିସ୍ତାନ ବିବାଦରେ ତୁର୍କୀ ପାକିସ୍ତାନକୁ ସାମରିକ ଓ କୂଟନୈତିକ ସମର୍ଥନ ପ୍ରଦାନ କରୁଛି। ତୁର୍କୀର ବିଦେଶ ମନ୍ତ୍ରୀ ହାକାନ ଫିଦାନଙ୍କ ପାକିସ୍ତାନ ପ୍ରତି ସମର୍ଥନ ସୂଚକ ବୟାନ ଏବଂ ଭାରତର ‘ଅପରେସନ ସିନ୍ଦୁର’କୁ ନିନ୍ଦା କରିବା ଭାରତୀୟଙ୍କ ମନରେ ଅସନ୍ତୋଷ ସୃଷ୍ଟି କରିଛି। ଏହା ସହିତ, ଭାରତୀୟ ସେନା ଦାବି କରିଛି ଯେ ପାକିସ୍ତାନ ସୀମା ଅଞ୍ଚଳରେ ତୁର୍କୀ ନିର୍ମିତ ଡ୍ରୋନ ବ୍ୟବହାର କରୁଛି, ଯାହା ଭାରତରେ ତୁର୍କୀ ବିରୋଧୀ ଭାବନାକୁ ଆହୁରି ତୀବ୍ର କରିଛ “

କଡ଼ା ନିୟମ ଓ ନିରୀକ୍ଷଣ
AICWA ଘୋଷଣା କରିଛି ଯେ ତୁର୍କୀରେ ଶୁଟିଂ କିମ୍ବା ତୁର୍କୀ କଳାକାରଙ୍କ ସହ ସହଯୋଗ କରୁଥିବା ଯେକୌଣସି ଭାରତୀୟ ପ୍ରୋଡକ୍ସନ ହାଉସ, ନିର୍ଦ୍ଦେଶକ କିମ୍ବା ଫାଇନାନ୍ସର ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ। ଏହାସହ, ତୁର୍କୀ ସଂସ୍ଥାଗୁଡ଼ିକ ସହିତ ଥିବା ସମସ୍ତ ଚୁକ୍ତିକୁ ସମୀକ୍ଷା କରାଯାଇ ଯଥାସମ୍ଭବ ରଦ୍ଦ କରାଯିବ। AICWA ଏହି ନିର୍ଦ୍ଦେଶନାମାର ପାଳନ ନିଶ୍ଚିତ କରିବା ପାଇଁ ଭାରତୀୟ ଚଳଚ୍ଚିତ୍ର ପ୍ରଫେସନାଲ ଓ ସଂଗଠନଗୁଡ଼ିକର କାର୍ଯ୍ୟକଳାପ ଉପରେ କଡ଼ା ନଜର ରଖିବ।